Avropa İttifaqı tərəfindən maliyyələşdirilən və Dünya Bankı tərəfindən həyata keçirilən Azərbaycan üçün Çevik Texniki Yardım Proqramı (AZTAF) çərçivəsində Azərbaycanda texniki təhsil və karyerada gender balansının təşviqi məqsədilə növbəti seminar Azərbaycan Texniki Universitetində (AzTU) keçirilib. Seminar texniki sahələrdə qadınların iştirakını artırmaq və əmək bazarında gender bərabərsizliyini azaltmaq yolu ilə Azərbaycanın iqtisadi inkişafına töhfə vermək məqsədi daşıyır. Tədbirdə universitetin professor-müəllim heyəti, karyera məsləhətçiləri iştirak edib. Seminarın əsas mövzularını texniki təhsil və əmək bazarında mövcud gender bərabərsizliyi, qadınların məşğulluğuna dair qanunvericilikdə son dəyişikliklər, Azərbaycanda “Qadınların Məşğulluğu Qarşısındakı Maneələrin Aradan Qaldırılması" üzrə Dünya Bankı hesabatının əsas nəticələri və texniki sahələrdə qadınların dəstəklənməsində təhsil müəssisələrinin rolu təşkil edib. Tədbir zamanı həmçinin Dünya Bankı və Avropa Yenidənqurma və İnkişaf Bankının birgə hazırladığı "Əməyin Təhlükəsizliyi, Sağlamlığı, Zorakılıq və Qısnama" adlı Azərbaycan və ingilis dillərində tərtib edilmiş onlayn təlim kursu təqdim edilib.

Oktyabrın 7-9 tarixlərində Dünyanını ən nüfuzlu reytinq agentliklərindən biri olan “Times Higher Education” (THE) ilə Mançester Universitetinin birgə təşkil etdiyi Dünya Akademik Sammitində Azərbaycan Texniki Universitetinin (AzTU) elm və innovasiyalar üzrə prorektoru Subhan Namazov və Tədqiqat və inkişaf şöbəsinin müdiri Bəxtiyar Bədəlov iştirak ediblər. Dünyanın müxtəlif ölkələrindən 500-dən çox nümayəndənin qatıldığı tədbirdə elm və təhsil sahəsində aktual mövzular müzakirə olunub.

Azərbaycan Texniki Universitetinin (AzTU) Kitabxana İnformasiya Mərkəzi (KİM) Bakı Ekspo Mərkəzində dahi Azərbaycan şairi və mütəfəkkiri Məhəmməd Füzulinin (1494-1556) anadan olmasının 530 illiyinə həsr olunan X Bakı Beynəlxalq Kitab Sərgisində təmsil olunub. Sərgidə AzTU-nun nəşrləri, professor-müəllim heyətinin dərs vəsaitləri nümayiş edilib.Sonda fəal iştirakına görə AzTU-ya təşkilatçılar tərəfindən sertifikat təqdim edilib.

Rusiya Federasiyasının Həştərxan şəhərində Xəzəryanı ölkələrin universitetlərinin tələbələri arasında 7-ci beynəlxalq idman oyunları keçirilir. Oyunlarda ölkəmizi Azərbaycan Texniki Univesitetinin (AzTU) İdman sarayının direktoru Elnur Camalxanovun rəhbərli ilə universitetin idmançıları təmsil edir. Səfər çərçivəsində nümayəndə heyəti Həştərxanda ulu öndər Heydər Əliyevin adını daşıyan parkda onun abidəsini ziyarət edib, xatirəsinə ehtiramlarını bildiriblər.

Ümummilli lider Heydər Əliyevin anadan olmasının 101-ci ildönümü münasibətilə ali təhsil müəssisələrinin tələbələri arasında təşkil edilən bədii yaradıcılıq müsabiqə-festivalı qaliblərinin mükafatlandırılma mərasimi keçirilib. Azərbaycan Texniki Universitetinin (AzTU) Maşınqayırma və robototexnika fakültəsinin 561a qrupunun tələbələri Rüqəyya İsalı “Vokal xalq mahnıları” nominasiyası üzrə 3-cu yer, “Xalq çalğı alətləri sənəti” nominasiyası üzrə Batuhan Eroğlu - 1 ci yerin qalibi olublar. Tədbirdə qaliblərə fəxri fərman və qiymətli hədiyyələr təqdim olunub. Qeyd edək ki, Elm və Təhsil Nazirliyi və Azərbaycan Təhsil İşçiləri Azad Həmkarlar İttifaqı Respublika Komitəsinin birgə qərarı ilə ali təhsil müəssisələrinin tələbələri arasında keçirilən ümummilli lider Heydər Əliyevin anadan olmasının 101-ci ildönümünə həsr olunmuş bədii yaradıcılıq müsabiqə-festivalında respublikada fəaliyyət göstərən 26 ali təhsil müəssisəsindən 3000-dən çox tələbə iştirak edib.Birinci mərhələdə ali təhsil müəssisələrində yaradılmış münsiflər heyətinin iştirakı ilə seçimlər aparılıb, ikinci mərhələdə isə seçilmiş ən yaxşı ifaçı və kollektivlər festivalın yekun konsertində iştirak etmək hüququ qazanıblar. 

Azərbaycan Texniki Universitetinin (AzTU) İnsan resursları departamenti, Həmkarlar İttifaqı Komitəsi və Tələbə Həmkarlar İttifaqı Komitəsinin Beynəlxalq Müəllimlər Günü münasibətilə birgə təşkil etdikləri “İnnovativ həllər” layihə müsabiqəsinə yekun vurulub. Layihə müsabiqəsində AzTU-nun professor-müəllim heyəti və tələbələri 10 komanda şəklində iştirak edib. Müsabiqə iştirakçıları tədris prosesində müxtəlif situasiyalarda yaranmış çətinliklərə qarşı innovativ həll yolları təklif edərək münsiflər heyəti qarşısında təqdimat ediblər. Münsiflər heyəti müsabiqəyə təqdim olunmuş layihə ideyalarını 5 meyar üzrə (innovativ və yaradıcı yanaşma, mövzuya uyğunluq, praktikada tətbiq edilmə, faydalılıq, komanda işi və təqdimatı) qiymətləndirib. Müsabiqənin nəticəsinə əsasən, Aynurə İsmayılova və Kəmalə Səmədovanın birgə təqdim etdiyi “AzTU-da dərs prosesinin təşkilinə yeni yanaşma” layihəsi birinci, Məhiş Məhərrəmzadə, Baloğlan Nəcəfov və Nuranə Camalzadənin “AzTU - 3S” layihəsi isə ikinci yerə layiq görülüb. “İnnovativ həllər” layihə müsabiqəsinin qaliblərinə AzTU tərəfindən pul mükafatı təqdim olunub.

Azərbaycan Texniki Universitetində (AzTU) Avropa Birliyinin “ERASMUS+ KA2” proqramı çərçivəsində həyata keçirilən “İnnovasiya və dayanıqlılıq prinsipləri ilə klasterlərin işlənməsinə başlamaqda və iştirakda universitetlərin potensialının artırılması” layihəsi (UniClaD) üzrə yekun beynəlxalq konfransı çərçivəsində AzTU rektoru Vilayət Vəliyev, Ukraynanın Poltava Dövlət Arqrar Universitetinin rektoru Oleksander Haliç və Moldovanın Komrat Dövlət Universitetinin rektoru Sergey Zaharia arasında görüş keçirilib. Görüş çərçivəsində tədris və tədqiqat istiqamətində razılaşdırılmış birgə əməkdaşlıq məsələləri üzrə AzTU və sözügedən universitetlər arasında Anlaşma Memorandumu imzalanıb.

Azərbaycan Texniki Universitetinin (AzTU) Həmkarlar İttifaqı Komitəsində (HİK) 5 Oktyabr - Beynəlxalq Müəllimlər Günü münasibətilə universitetin müharibə iştirakçısı olan müəllimləri ilə görüş keçirilib. AzTU HİK-in sədri Elvin Bəxtiyarlı bildirib ki, universitetin İnformasiya və telekommunikasiya texnologiyaları və Xüsusi texnika və texnologiya fakültələrinin müəllimləri Vətənimizin ərazi bütövlüyünün qorunmasında və müdafiəsində qəhrəmanlıq göstəriblər. Qeyd olunub ki, AzTU müəllimlərinin Vətən uğrunda göstərdikləri igidlik gələcək nəslin vətənpərvər ruhda tərbiyə olunmasında vacib rol oynayır. O da qeyd olunub ki, ATİAHİ RK-nin və AzTU HİK-in müvafiq qərarı ilə AzTU-nun müharibə iştirakçısı olan 7 müəllimi Beynəlxalq Müəllimlər Günü münasibətilə pul mükafatı ilə mükafatlandırılıb.

Azərbaycan Texniki Universitetində (AzTU) Avropa Birliyinin “ERASMUS+ KA2” proqramı çərçivəsində həyata keçirilən “İnnovasiya və dayanıqlılıq prinsipləri ilə klasterlərin işlənməsinə başlamaqda və iştirakda universitetlərin potensialının artırılması” layihəsi (UniClaD) üzrə yekun beynəlxalq konfrans öz işinə başlayıb.  Konfrans layihə konsorsiumunu əhatə edən İtaliya, İspaniya, Polşa, Litva, Avstriya, Moldova, Ukrayna və Azərbaycanı təmsil edən 20-dən çox ali təhsil və sənaye müəsisəsinin iştirakı ilə keçirilir. Konfrans çərçivəsində aqrar sektorda klasterlərin inkişafı və fəaliyyəti, habelə Avropa təcrübəsinin öyrənilməsi baxımından təqdimatlar nümayiş ediləcək. Konfransda layihənin 20 beynəlxalq tərəfdaş müəssisəsini təmsil edən 60-a yaxın nümayəndə iştirak edir.   Tədbirdə açılış nitqi ilə çıxış edən AzTU-nun rektoru Vilayət Vəliyev Avropa Birliyinin “ERASMUS+ KA2” proqramı çərçivəsində həyata keçirilən layihələrin ali təhsil müəssisələrinin tədris və tədqiqat potensialının artırılması və onlar arasında əməkdaşlığın gücləndirilməsindəki rolunu qeyd edib. Daha sonar çıxış edən Elm və Təhsil Nazirliyi yanında Elm və Ali Təhsil üzrə Dövlət Agentliyinin Beynəlxalq əməkdaşlıq şöbəsinin müdiri Müjdat Həsənov, Erasmus Milli Ofisinin direktoru Pərviz Bağırov, Kənd Təsərrüfatı Nazirliyinin nəzdində Aqrar İnnovasiya Mərkəzinin direktoru Anar Cəfərov, habelə layihədə tərəfdaş universitetlər Moldova Texniki Universitetinin rektoru Viorel Bostan, Poltava Dövlət Aqrar Universitetinin rektoru Oleksander Haliç və Komrat Dövlət Universitetlərinin rektoru Sergey Zaharia “Erasmus” layihələrinin ali təhsil müəssisələrinin inkişafına hərtərəfli töhfə verdiyini bildirib. Konfrans layihənin tərəfdaşları olan ali təhsil müəssisələri və təşkilatların fəaliyyətlərinin nəticələri barədə təqdimatlarla davam edib.

Azərbaycan Texniki Universitetinin (AzTU) tərəfdaş olduğu Avropa Birliyinin “Erasmus+ KA2” proqramı çərçivəsində həyata keçirilən “İnnovasiya və dayanıqlılıq prinsipləri ilə klasterlərin işlənməsinə başlamaqda və iştirakda universitetlərin potensialının artırılması” layihəsi (UniClaD) üzrə yekun beynəlxalq seminar və konfransı öz işinə başlayıb. Sözügedən tədbirlər layihə konsorsiumunu əhatə edən İtaliya, İspaniya, Polşa, Litva, Avstriya, Moldova, Ukrayna və Azərbaycanı təmsil edən 20-dən çox ali təhsil və sənaye müəsisəsinin iştirakı ilə keçirilir. Tədbir 30.09.2024 – 04.10.2024 tarixlərində AzTU-nun ev sahibliyi ilə təşkil olunub.   Seminar zamanı layihə çərçivəsində yaradılmış “Kənd təsərüfatında İT texnologiyalar”, “Aqro-Turizm”, “Süd məhsullarının istehsalı və emalı”, “Aqrobiotexnologiyalar” istiqamətində resurs mərkəzlərinin fəaliyyətləri, potensial inkişafı, klasterlərin inkişafı və imkanları müzakirə ediləcək.  Həmçinin seminar zamanı Avropa Birliyindən olan tərəfdaşların təqdimatı ilə tematik mövzular üzrə ən yaxşı təcrübə paylaşılacaq. Layihə çərçivəsində keyfiyyətin qiymətləndirilməsi və layihənin davamlılığı üçün müzakirələrin aparılması da nəzərdə tutulur.