Türkiyənin Həsən Kalyoncu Universitetinin müəllimi Enes Özen "Erasmus+" mübadilə proqramı çərçivəsində Azərbaycan Texniki Universitetində (AzTU) olub. O, səfər müddətində AzTU-nun Mühəndis fizikası və elektronika, Metallurgiya və materiallar texnologiyası, Elektrotexnika kafedralarında və Yeni Materiallar və Nanotexnologiya Elmi-Tədqiqat İnstitutunda görüşlər keçirib. Enes Özen kafedra və institut əməkdaşları üçün pilotsuz uçuş aparatları mövzusunda seminar keçirib.

“ALSTOM Transport Azərbaycan” MMC-nin nümayəndələri şirkətin təşkil edəcəyi növbəti təlimlərlə bağlı məlumat və qaydaları açıqlamaq üçün Azərbaycan Texniki Universitetinin (AzTU) Nəqliyyat və logistika fakültəsinin tələbələri ilə görüşüb. Görüşdə AzTU ilə şirkətin əməkdaşlıq əlaqələri barədə məlumat verilib. Növbəti təlimlərlə bağlı iştirak mərhələləri, təlimlərin tələbələrin karyeralarının inkişafındakı rolu bə digər məsələlər diqqətə çatdırılıb. Görüşün sonunda tələbələri maraqlandıran suallar cavablandırılıb.

Alman Akademik Mübadilə Xidməti (DAAD) tərəfindən Cənubi Qafqazın bir sıra universitetlərinin rektorları və prorektorlarının Almaniyanın bir sıra şəhərlərinə səfəri təşkil olunub. Məqsəd Almaniyanın qabaqcıl universitetləri ilə əlaqələrin genişləndirilməsi və yeni əməkdaşlıqların qurulması olub. Səfərdə Azərbaycan Texniki Universitetini (AzTU) elm və İnnovasiyalar üzrə prorektor professor Sübhan Namazov təmsil edib. Qonaqları Berlin Hökumətinin Əlaqələndirmə Ofisinin rəhbəri və DAAD-nin Cənubi Qafqaz üzrə ölkə sözçüsü Kai Franke salamlayaraq açılış nitqi ilə çıxış edib, həmçinin səfərin perspektiv imkanları barədə müzakirələr aparılıb. Proqram çərçivəsində Almaniyanın müxtəlif şəhərlərindəki universitetlərə (Maqdeburq-Stendal Tətbiqi Elmlər Universiteti, Brandenburg Texniki Universiteti Cottbus-Senftenberg, Jena Tətbiqi Elmlər Universiteti, Zwickau Tətbiqi Elmlər Qərbi Sakson Universiteti) ziyarətlər təşkil olunub. Həmçinin nümayəndə heyəti ilə universitetlərin rektorları və müvafiq rəhbər heyətinin görüşləri keçirilib. Universitetləri ziyarətlər çərçivəsində “Menecment və İnformasiya texnologiyaları” adlı yeni ikili diplom proqramı, “İqlimə uyğunlaşdırılmış torpaqdan istifadə konsepsiyaları”, “Almaniyada davamlı bioiqtisadiyyat”, “Beynəlxalq sahibkarlıq və innovasiya” və digər mövzularda məruzələr dinlənilib. Səfərlər zamanı elm, innovasiya, tədris, ikili diplom proqramları, tələbə-müəllim mübadiləsi, birgə layihələrin yerinə yetirilməsi barədə faydalı müzakirələr aparılıb.

Türkiyənin İstanbul Texniki Universitetinin (İTÜ) rektoru professor İsmayıl Koyuncunun başçılıq etdiyi nümayəndə heyəti ölkəmizə səfəri çərçivəsində Azərbaycan Texniki Universitetinin (AzTU) qonağı olub. Əvvəlcə hər iki universitetin rəhbərliyi və nümayəndələri Fəxri xiyabanda ulu öndər Heydər Əliyevin məzarını ziyarət edib, önünə gül dəstələri düzüblər. Görkəmli oftalmoloq alim, akademik Zərifə xanım Əliyevanın da xatirəsi ehtiramla yad olunub. Daha sonra Şəhidlər xiyabanında torpaqlarımızın ərazi bütövlüyü və suverenliyi uğrunda canlarından keçən Vətən övladlarının məzarı və “Türk Şəhidliyi” abidəsi ziyarət olunub. AzTU-da davam etdirilən görüşdə rektor Vilayət Vəliyev qonaqları universitetdə görməkdən məmnunluğunu ifadə edib. Bildirib ki, AzTU və İTÜ əlaqələri müxtəlif istiqamətlər üzrə inkişaf etdirilir. Rektor deyib ki, AzTU-da yeni yanaşmaların tətbiqi zamanı İTÜ-nün təcrübəsindən istifadə olunur. Yüksək qonaqpərvərliyə görə AzTU rəhbərliyinə təşəkkür edən İTÜ-nün rektoru professor İsmayıl Koyuncu qeyd edib ki, iki universitet arasında əlaqələrin inkişafı Türkiyə və Azərbaycan ali təhsil sisteminin inkişafına töhfə verməkdədir. Görüş zamanı müəllim və tələbə mübadiləsi, müvafiq istiqamətlər üzrə ikili diplom proqramlarına hazırlıqla bağlı məsələlər müzakirə olunub.

Azərbaycan Texniki Universitetində (AzTU) akademik və inzibati heyətin iştirakı ilə Qazaxıstan Mədəniyyəti Günü qeyd olunub. Mədəniyyət Günü Bolaşaq proqramı çərçivəsində AzTU-da elmi təcrübə keçən Qazaxıstanın Qorqud Ata Qızılorda Universitetinin nümayəndələrinin təşkilatçılığı ilə keçirilib. Qorqud Ata Qızılorda Universitetinin Energetika sənayesi, texnosferin təhlükəsizliyi və ekologiya kafedrasının müdiri Gülnar Sıdıkova və İnformatika, informasiya və kommunikasiya texnologiyaları üzrə baş müəllimi Janna Asanova Qazaxıstanın milli geyimləri və adətlərini nümayiş etdirib, iştirakçıları milli təamlara qonaq ediblər.    Tədbirdə həmçinin AzTU-nun rektoru Vilayət Vəliyev, professor-müəllim heyəti iştirak edərək Qızılorda Universitetinin nümayəndələrini elmi təcrübə proqramını uğurla başa vurmaqları münasibətilə təbrik edib və onlara sertifikat təqdim ediblər. Qızılorda Universitetinin nümayəndələri təcrübə müddətində yerinə yetirdikləri işlər və akademik heyətlə birgə planlaşdırılan yeni əməkdaşlıqlar barədə rektora və AzTU nümayəndələrinə məlumat verib. Tədbir zamanı Qazaxıstanın qarşıdan gələn Müstəqillik Günü münasibətilə də təbriklər səsləndirilib və iki universitet arasında əməkdaşlığın yeni istiqamətlər üzrə inkişaf etdirilməsi ilə bağlı müzakirələr aparılıb.

Enerji Məsələlərini Tənzimləmə Agentliyinin (EMTA) həyata keçirdiyi “Energy talks” (Enerji söhbətləri) layihəsi çərçivəsində Azərbaycan Texniki Universitetində (AzTU) seminar keçirilib. Tədbirdə Energetika Nazirliyinin, EMTA-nın nümayəndələri, AzTU-nun professor-müəllim heyəti, tədqiqatçılar, magistrant və tələbələr iştirak ediblər. Seminarı giriş sözü ilə açan AzTU-nun tədris işləri üzrə prorektoru professor Nurəli Yusifbəyli qurumlararası qarşılıqlı əməkdaşlıq əlaqələrinin və bu kimi görüşlərin əhəmiyyətindən danışıb. Agentliyin müşaviri Zeynab Kazımova AzTU ilə Agentlik arasında mövcud əlaqələrdən söz açaraq, bu əməkdaşlığın genişləndirilməsində maraqlı olduqlarını bildirib. Energetika Nazirliyinin mətbuat sektorunun müdiri Cahid Mikayılov nazirliyin fəaliyyət istiqamətləri barədə görüş iştirakçılarına ətraflı məlumat verib. Sonra EMTA-nın Strateji planlaşdırma və innovasiyalar şöbəsinin müdiri Hikmət Həsənov “Kommunal xidmətlərin dövlət tənzimlənməsi“, AzTU-nun doktorantı Elbəy Rüstəmzadə isə “Azərbaycanda enerji sisteminin idarə olunmasının enerji 4.0 modelinə transformasiyası” mövzularında təqdimatla çıxış ediblər. Müzakirə formatında baş tutan seminar maraq doğuran sualların cavablandırılması ilə yekunlaşıb.

Türkiyənin Çankaya Universitetinin rektoru professor Hadi Hakan Maraş və prorektor professor  Buket Akkoyunlu Azərbaycan Texniki Universitetinin (AzTU) qonağı olub. Qonaqlar AzTU-nun rektoru Vilayət Vəliyev və universitetin nümayəndələri ilə görüşüb. Hadi Hakan Maraş Çankaya Universitetinin fəaliyyəti barədə məlumat verib. Bildirib ki, 25 illik tarixi olan Çankaya Universiteti Türkiyənin aparıcı özəl universitetlərindən biridir. Universitet ali təhsil sahəsində müxtəlif beynəlxalq reytinqlərdə Türkiyə universitetləri arasında qabaqcıl yerlərdən birini tutur. Rektor təmsil etdiyi ali təhsil müəssisəsində tədris və tədqiqat sahəsində görülən işlər barədə də ətraflı məlumat verib. Qonaqları AzTU-da görməkdən məmnunluğunu ifadə edən rektor Vilayət Vəliyev universitetdə təhsilin müasir tələblərə uyğun qurulması, eləcə də tədris və tədqiqatın beynəlmiləlləşməsinin əhəmiyyətini vurğulayıb. Rektor Çankaya Universiteti ilə gələcək əməkdaşlıq istiqamətləri ilə bağlı fikirlərini bölüşüb. Görüşün sonunda hər iki universitet arasında əməkdaşlıq haqqında memorandum imzalanıb. Sonra qonaqlar AzTU-nun kampusu ilə tanış olublar.

IDTECH Akedemiyanın təlimçiləri Azərbaycan Texniki Universitetində (AzTU) "Gələcəyin peşələri" mövzusunda təlim keçib. Təlimdə İT, kibertəhlükəsizlik və proqramlaşdırma ilə bağlı zəruri məlumatlar tələbələrin diqqətinə çatdırılıb.  Sözügedən sahələr üzrə iş imkanları, beynəlxalq sertifikaların əldə olunması və əhəmiyyəti haqqında da ətraflı məlumat verilib. Təlimin sonunda tələbələrin sualları cavablandırılıb.

Azərbaycan Texniki Universitetinin (AzTU) Radiotexnika və telekommunikasiya kafedrasının dosenti Eldar Atayev vəfat edib. Eldar Atayev 1978-ci ildən AzTU-da müxtəlif vəzifələrdə çalışıb.                                    O, 4 dərs vəsaiti və 60-a yaxın elmi məqalənin müəllifi idi. AzTU-nun rəhbərliyi və kollektivi Eldar Atayevin vəfatından kədərlənir, ailəsinə və yaxınlarına başsağlığı verir. Allah rəhmət eləsin!

Azərbaycan Texniki Universitetinin (AzTU) İnformasiya və telekommunikasiya texnologiyaları fakültəsinin tələbələri Rəvan Əlizadə (Ankara Universiteti ilə ikili diplom proqramı, ixtisas: kompüter mühəndisliyi (tədris ingilis dilində)) və Selcan Kərimli (ixtisas: kompüter mühəndisliyi (tədris ingilis dilində)) “Heydər Əliyev adına təqaüd”ə layiq görülüb. Xatırladaq ki, Prezident İlham Əliyevin müvafiq Sərəncamına əsasən, “Heydər Əliyev adına təqaüd” ali təhsil müəssisələrində bakalavriat  səviyyəsində əyani formada təhsil alan, təhsildə yüksək nailiyyətləri olan 100 nəfər tələbəyə verilir. Təqaüd Elm və Təhsil Nazirliyi tərəfindən dövlət büdcəsinin vəsaiti hesabına 3000 manat məbləğində birdəfəlik ödənilir.