Abşeron Logistka Mərkəzinin İdarə Heyətinin sədri Ziya Ağayevin rəhbərlik etdiyi nümayəndə heyəti Azərbaycan Texniki Universitetinə səfər edib. Səfər çərçivəsində Abşeron Logistka Mərkəzinin İdarə Heyətinin sədri Ziya Ağayevlə AzTU-nun rektoru Vilayət Vəliyev arasında görüş keçirilib. Rektor bildirib ki, Abşeron Logistka Mərkəzində keçirilən sonuncu görüş zamanı verilən təkliflərin və müzakirə olunan məsələlərin daha operativ icrası ilə əlaqədar müştərək komissiya yaradılıb. Komissiyanın üzvləri ilkin olaraq görülən və görüləcək işlərlə bağlı plan hazırlayıblar. Plana uyğun olaraq komissiya tədris, elmi-tədqiqat və təcrübə istiqamətində müəyyən olunan məsələlərin icrasını həyata keçirəcəklər. Daha sonra qonaqlar AzTU-nun Logistika və Nəqliyyat İnstitutu ilə tanış olublar. Xatırladaq ki, fevralın 9-da Abşeron Logistka Mərkəzində AzTU-nun tədris mərkəzi istifadəyə verilib.  

Azərbaycan Texniki Universitetinin (AzTU) Xüsusi texnika və texnologiya fakültəsinin bir qrup tələbəsinin Hərb Tarixi Muzeyinə ekskursiyası təşkil edilib. Qeyd olunub ki, iki mərtəbədən ibarət olan Hərb Tarixi Muzeyi 1992-ci ildə yaradılıb. Azərbaycan hərb tarixinin qədim dövrdən bu günə kimi keçdiyi inkişaf yolu, ordumuzun istifadə etdiyi texnikalar, silahlar barədə tələbələrə məlumat verilib. Tələbələr muzeydə ulu öndər Heydər Əliyevin həyat və fəaliyyətini əks etdirən fotolar, sənədlər və ona məxsus əşyalar, hərbi geyim nümunəsi, ordu quruculuğu ilə bağlı gördüyü işlərlə tanış olublar. 44 günlük Vətən müharibəsinə həsr olunan Zəfər zalı, həmçinin muzeyin həyətində nümayiş olunan hərbi texnikalar barədə də tələbələrə ətraflı məlumat verilib.  

                                                                                Erasmus+ proqramı üzrə həyata keçirilən “Azərbaycanda Rektorlar Konfransının yaradılması” (ECAR) layihəsi çərçivəsində Tələbə və məzunlarla iş üzrə komitənin ilk iclası keçirilib. Onlayn təşkil olunan iclasda Azərbaycan Texniki Universitetini (AzTU) Karyera və məşğulluq mərkəzinin müdiri Elnur Rüstəmov və Tədris hissəsinin nəzdində Qeydiyyat, qiymətləndirmə və monitorinq şöbəsinin müdiri Tuti Abdullayeva təmsil edib. Görüş zamanı müzakirə olunan əsas mövzular komitə üzvləri ilə tanışlıq, sahə üzrə ilkin müzakirələrin aparılması, komitənin funksiyaları, sədrliyə namizədliklə bağlı tələblər, həmçinin idarə heyəti və sədrin seçilməsi qaydaları olub. İclasın gedişində qeyd olunan məsələlərlə bağlı tərəfdaşların rəyləri dinlənilərək müvafiq düzəlişlər edilib.   Daha sonra İdarə Heyətinin sədri vəzifəsinin tutulması üçün 3 nəfərin namizədliyi irəli sürülüb. 65 faiz səs çoxluğu ilə Bakı Biznes Universitetinin təlim-tərbiyə işləri üzrə prorektoru Cavidan Heydarov İdarə Heyətinin sədri seçilib. Növbəti mərhələdə sədr müavini vəzifəsinin tutulması üçün səsververmə keçirilib. Azərbaycan Turizm və Menecment Universitetinin Karyera və kommunikasiya şöbəsinin müdiri Səidə Məmmədova və Bakı Mühəndislik Universitetinin Müəssisələrlə əlaqələr və karyera departamentinin direktoru Gülçöhrə İbrahimova sədrin müavinləri seçiliblər. Qeyd edək ki, ECAR layihəsi çərçivəsində yaradılacaq Azərbaycan Rektorlar Konfrasının tərkibində Beynəmiləlləşmə, Tədris işləri və keyfiyyət təminatı, Elmi işlər, Strateji inkişaf və Tələbə və məzunlarla iş üzrə komitələrin fəaliyyəti nəzərdə tutulub.                                                                                                                                                                                                                                    

Azərbaycan Texniki Universitetində (AzTU) 21 fevral - Beynəlxalq Ana Dili Gününə həsr olunan “Dilim varsa, mən varam!” adlı tədbir keçirilib. Tədbirdə AzTU-nun sosial məsələlər və ictimaiyyətlə əlaqələr üzrə prorektoru Nərmin Rzayeva çıxış edib. Ana dilimizin zənginliyindən danışan prorektor ulu öndər Heydər Əliyevin milli-mənəvi dəyərlərimizə daim xüsusi önəm verdiyini xatırladıb. Qeyd olunub ki, dilimizin rəsmi dövlət dili statusu alması ümummilli lider Heydər Əliyevin adı və fəaliyyəti ilə bağlıdır. Nərmin Rzayeva Prezident İlham Əliyevin Azərbaycan dilinin saflığının qorunması və onun inkişafı ilə bağlı imzaladığı sənədlərin əhəmiyyətindən də danışıb. Humanitar fənlər kafedrasının müdiri Həbib Mirzəyev və kafedranın dosenti Afaq Əsgərova belə bir görüşün keçirilməsini əhəmiyyətli və təqdirəlayiq bir hadisə kimi dəyərləndirib. Bildirilib ki, mənəviyyatın formalaşmasında və inkişafında dil ən mühüm vasitədir. Bu baxımdan ana dilimizin qorunması və inkişaf etdirilməsi hər bir vətəndaşın müqəddəs borcudur. İnsanın mənəvi aləminin zənginləşməsində, mükəmməl təhsil almasında ana dilinin mühüm rolu xüsusi vurğulanıb. Qeyd olunub ki, dilimizin saflığının və zənginliyinin qorunması istiqamətində ulu öndər Heydər Əliyevin düşünülmüş siyasəti hazırda Prezident İlham Əliyev tərəfindən uğurla davam etdirilir. Tədbirdə videoçarx nümayiş etdirilib və tələbələrin ifasında ana dili haqqında şeirlər səsləndirilib.   

Azərbaycan Basketbol Federasiyasının təşkilatçılığı ilə Azərbaycan Texniki Universitetinin (AzTU) İdman sarayında keçirilən Basketbol üzrə Tələbə Liqasının oyunları davam edir. Liqanın 10-cu turunda AzTU komandası Azərbaycan Dövlət Bədən Tərbiyəsi və İdman Akademiyasının (ADBTİA) komandası ilə qarşılaşıb. Maraqlı mübarizə şəraitində davam edən oyun 103:82 hesabı ilə AzTU komandasının xeyrinə yekunlaşıb.  Qeyd edək ki, liqanın oyunlarında AzTU, ADBTİA, ADAU, ADNSU, UNEC, BMU və Xəzər Universitetinin komandaları iştirak edir. Oyunları “AzTU TV” yutub kanalından canlı izləyə bilərsiniz.

Fevralın 16-da Elm və Təhsil Nazirliyinin Medianın İnkişafı Agentliyi ilə birgə təşkilatçılığı ilə “Effektiv kommunikasiya” mövzusunda təlim-seminar keçirilib.  Təlim-seminarın keçirilməsində əsas məqsəd elmi müəssisələrin və universitetlərin sosial media hesablarının təhlili, kommunikasiyanın düzgün təşkili və digər bu kimi mövzularla bağlı bilik, bacarıqları təkmilləşdirmək, media sahəsində peşəkar vərdişlərin inkişafına dəstək olmaqdır. Təlim-seminarda nazirliyin tabeliyindəki elmi müəssisə və universitetlərin ictimaiyyətlə əlaqələrə məsul əməkdaşları, eləcə də media nümayəndələri iştirak ediblər. Açılış mərasimində çıxış edən Medianın İnkişafı Agentliyinin İcraçı direktoru Əhməd İsmayılov media sahəsində aparılan islahatlardan danışıb. Əhməd İsmayılov bildirib ki, bu islahatların əsas hissəsi cəmiyyətlə düzgün kommunikasiyanın təşkil edilməsidir.   Elm və təhsil nazirinin müşaviri Elnur Nəsibov çıxışında qeyd edib ki, nazirliyin tabeliyindəki müəssisələrin kommunikasiyasının gücləndirilməsi əsas prioritetlərdəndir. Nazir müşaviri əlavə edib ki, ötən ilin dekabrından elm sahələrinin ehtiyaclarının müəyyənləşdirilməsi istiqamətində monitorinqlərə başlanılıb. Yaxın zamanlarda elmi müəssisələrin yeni əsasnamələrinin təsdiqi gözlənilir.  Elm və təhsil nazirinin müşaviri Nicat Məmmədli də öz növbəsində bildirib ki, bu gün əsas məsələ elmin populyarlaşdırılmasıdır. İnformasiyaların daha çox fakta yönləndirilməsi, yanlış məlumatların verilməməsi olduqca vacibdir və elmin cəmiyyətdə təbliği üçün ciddi addımlar atılmalıdır.  Daha sonra çıxış edən AMEA-nın vitse-prezidenti, İnformasiya Texnologiyaları İnstitutunun baş direktoru Rasim Əliquliyev sözügedən təlim-seminarın təşkilindən məmnunluğunu ifadə edib. Rasim Əliquliyev nazirlik və ona tabe olan qurumlar arasında mövcud əlaqələrin gücləndirilməsini, kommunikasiya işinin effektiv təşkilinin vacibliyini önə çəkib, bu kimi təlimlərin əhəmiyyətli olduğunu nəzərə çatdırıb.  Daha sonra Elm və Təhsil Nazirliyinin İctimaiyyətlə əlaqələr sektorunun müdiri Cəsarət Valehov "Elmi müəssisə və universitetlərin sosial media hesablarının təhlili" mövzusunda təqdimatla çıxış edib.  Təlim-seminarın davamında Medianın İnkişafı Agentliyinin eksperti Pərvanə İbrahimova "Media savadlılığı", "Alibayov" Kommunikasiya və Konsultinq şirkətinin rəhbəri Vəli Əlibəyov "Uğurlu kommunikasiyanın qurulması, kommunikasiya alətlərindən düzgün istifadə", təlimçilər Toğrul Ələkbərov "Effektiv təqdimat bacarıqları", Fəxri Ağayev "Şəxsi və peşəkar inkişaf", Azər Nəzərov "Təhsil müəssisələri üçün PR və kommunikasiyanın əsasları", həmçinin Təhsil TV-nin rəhbəri Rəşad Cəfərov "Təhsil TV ilə əməkdaşlıq imkanları" mövzularında çıxış edərək təcrübələrini bölüşüblər. Təlim-seminar çərçivəsində müzakirələr aparılıb, iştirakçıları maraqlandıran suallar cavablandırılıb.

Azərbaycan Texniki Universitetinin (AzTU) Elmi şurasının növbəti iclası keçirilib. İclasda 2022/2023-cü tədris ilinin qış imtahan sessiyasının nəticələri barədə hesabat təqdim olunub. Həmçinin təhsilin keyfiyyətinin yüksəldilməsi ilə bağlı müzakirələr aparılıb.   Bundan başqa, 2022-ci ildə AzTU-nun elmi-tədqiqat və innovasiya fəaliyyəti haqqında da hesabat verilib. Bildirilib ki, 2022-ci ildə aparılan tədqiqat işlərinin nəticələrinə uyğun AzTU-da professor-müəllim heyəti üçün Differensial Əməkhaqqı Sisteminin tətbiqi ilə bağlı təqdim edilən məlumatlar təsdiqlənib. Belə ki, professor-müəllim heyəti arasından 64 nəfərin əməkhaqqına 2023-cü il ərzində əlavələrin edilməsi, həmçinin 85 əməkdaşın beynəlxalq bazalara daxil olan elmi nəşrlərdə dərc olunan məqalələrə görə mükafatlandırılması təsdiq edilib.   Müzakirələrdən sonra əməkdaşların layihə əsaslı tədqiqat və nəşr işinin gücləndirilməsi, həmçinin sənaye əhəmiyyətli tədqiqatların aparılmasına diqqətin artırılması barədə qərar qəbul edilib.

“EİFL”in təşkilatçılığı ilə “Open science train the trainer bootcamp” onlayn beynəlxalq təlimi keçirilib. "Open Science", "Open Access", "Creative Commons Licenses", "Open Access Publishing", "Digital Repositories", "Research Data Management" və digər mövzularda keçirilən təlimdə Azərbaycan Texniki Universitetinin (AzTU) Kitabxana İnformasiya Mərkəzinin direktoru Xəyalə Hacıyeva və rəqəmsallaşdırma və kitabxana sistemləri üzrə baş məsləhətçi İltifat İbrahimov iştirak edib. Təlimdə müasir informasiya resurslarının əlçatanlığı, elmi araşdırmalara resurs və xidmət baxımından dəstək, açıq repozitoriyaların qurulması, elmi araşdırmaların uzunmüddətli şəkildə qorunması, beynəlxalq səviyyəli jurnallarda məqalə nəşrinə dəstək, ölkədə açıq əlyetərlilik təşəbbüslərinin inkişaf etdirilməsi və digər istiqamətlərdə vacib məlumatlar iştirakçıların diqqətinə çatdırılıb. Bir həftə davam edən təlimin sonunda kursu müvəffəqiyyətlə başa vuran AzTU əməkdaşlarına sertifikat təqdim olunub. Həmçinin onlar təlimçi olmaq hüququ əldə ediblər.    

Azərbaycan Texniki Universitetinin (AzTU) üç tələbəsi 2022/2023 tədris ilinin yaz semestrində Erasmus+ proqramı çərçivəsində xaricdə təhsil alacaq.  Belə ki, AzTU-nun Metallurgiya və materialşünaslıq fakültəsinin II kurs tələbəsi İlqar Qənbərov Türkiyənin Bursa Texniki Universitetində, İqtisadiyyat və idarəetmə fakültəsinin III kurs tələbələri Emil Gebekbəyov və Ramiz Səlimov isə Rumıniyanın Buxarest İqtisadiyyat Universitetində bir semestrlik təhsil almaq üçün təqaüd qazanıblar. AzTU-nun rektoru Vilayət Vəliyev tələbələrlə görüşüb, onlara dərslərində uğurlar arzulayıb.    

Azərbaycan Texniki Universitetinin (AzTU) rektoru Vilayət Vəliyev son günlər hazırladıqları startapları ilə məşhurlaşan AzTU-nun “InTech” komandasının üzvləri Nəqliyyat və logistika fakültəsinin IV kurs tələbəsi Mirsahib Ağazadə, İnformasiya və telekommunikasiya texnologiyaları fakültəsinin III kurs tələbəsi Ömər Ələsgərov və Energetika və avtomatika fakültəsinin I kurs tələbəsi Sübhan Ələsgərlə görüşüb.   Rektor Azərbaycanda ilk dəfə doğma ana dilimizdə proqramlaşdırılan 3D printer hazırladıqlarına görə tələbələrə təşəkkür edib. Bildirib ki, bu layihədə AzTU-nun mentorlarının tələbələrlə birgə fəaliyyət göstərməsi təqdirəlayiqdir. Bu həm də universitetdə tələbə-müəllim münasibətlərinin inkişaf etdiyini göstərir. Rektor tələbələrin yeni layihələrinin həyata keçirilməsi üçün universitetdə bütün şəraitin yaradılacağını da qeyd edib.    Tələbələr də öz növbəsində onların hazırladıqları layihələrə diqqət göstərdiyi üçün rektor Vilayət Vəliyevə təşəkkür ediblər. Qeyd olunub ki, Azərbaycan dilində proqramlaşdırılan 3D printer təhsil müəssisələri və şəxsi istifadə üçün nəzərdə tutulub. Artıq bununla bağlı bir neçə sifarişin qəbul olunduğu da diqqətə çatdırılıb.   Qeyd edək ki, AzTU-nun Tələbə Həmkarlar İttifaqı Komitəsinin (THİK) təşəbbüsü ilə keçirilən görüşün sonunda tələbələrə təşəkkürnamə və mükafat təqdim olunub.