Sabiq Rektorlarımız

Azərbaycan Texniki Universitetinin (AzTU) ilk rektoru Mahmud Tağı oğlu Məmmədov 1909-cu ildə anadan olub. 1933-cü ildə Azərbaycan Kənd Təsərrüfatı İnstitutunu (indiki Azərbaycan Dövlət Aqrar Universiteti) bitirib və həmin institutda müəllim, dekan vəzifəsində çalışıb. 1939-cu ildə Moskvada Kənd Təsərrüfatının Mexanikləşdirilməsi və Elektrikləşdirilməsi İnstitutunun aspiranturasını bitirərək namizədlik dissertasiyasını müdafiə edib. 1942–1950-ci illərdə Azərbaycan Kənd Təsərrüfatı nazirinin müavini, Nazirlər Sovetinin sədr müavini işləyib və 1950–1954-cü illərdə Azərbaycan Politexnik İnstitutunun (indiki AzTU) rektoru olub.

Professor Əliyev Abuzər Əsgər oğlu 1911-ci ildə anadan olub. O, 1937-ci ildə Azərbaycan Sənaye İnstitutunun Memarlıq-İnşaat fakültəsini bitirib. Böyük Vətən Müharibəsi illərində Bakı şəhərində tikilən hərbi zavodda baş mühəndis və respublika tikinti nazirinin müavini vəzifəsində çalışıb. O, Azərbaycanda tikinti üzrə ilk namizədlik dissertasiyasını müdafiə edən alimdir.

Azərbaycanın görkəmli memarı və dövlət xadimi Ənvər Əlibəy oğlu Qasımzadə 1912-ci il fevralın 12-də Salyan şəhərində anadan olub. 1936-cı ildə Azərbaycan Sənaye İnstitutunun Memarlıq-inşaat fakültəsini bitirib. 1936–1942-ci illərdə Azərbaycan Dövlət Layihə İnstitutunda memar və baş mühəndis, 1946–1962-ci illərdə isə Nazirlər Sovetində Memarlıq işləri idarəsinin rəisi, Bakı Soveti sədrinin birinci müavini, Dövlət Tikinti Komitəsinin sədri, Azərbaycanda tikinti naziri və Memarlar İttifaqının sədr müavini vəzifələrində çalışıb. Böyük Vətən Müharibəsinin fəal iştirakçısı olmuş, “Qırmızı Ulduz” və “Qırmızı Bayraq” ordenləri ilə təltif olunub.

Professor Bədəlov Rza Əbdül oğlu 1915-ci il sentyabrın 25-də Bakı şəhərində anadan olub. Azərbaycan Sənaye İnstitutunu (ASİ) bitirdikdən sonra 1945–1968-ci illərdə Əzizbəyov Neft Trestinin Mexaniki Təmir Zavodunda mühəndis-konstruktor və sex rəisi, ASİ-də aspirant, assistent, baş müəllim, dosent, professor, dekan müavini, dekan və Nəzəri Mexanika kafedrasının müdiri vəzifələrində çalışıb. Azərbaycan Milli Elmlər Akademiyasının müxbir üzvü olub.

Professor Mirzəağa Əyyub oğlu Bağırov 1927-ci il iyunun 16-da Lənkəran şəhərində anadan olub. 1949-cu ildə Azərbaycan Sənaye İnstitutunun Energetika fakültəsini bitirib. 1956–1963-cü illərdə Azərbaycan EA-nın Energetika və Fizika İnstitutunda laboratoriya müdiri, 1959–1967-ci illərdə Akademiyanın partiya komitəsinin katibi vəzifəsində çalışıb. 1966-cı ildə Moskvada Qubkin adına Neft-Kimya və Qaz İnstitutunda doktorluq dissertasiyasını müdafiə edib. 1974–1976-cı illərdə Azərbaycan EA-nın radiasiya tədqiqatları şöbəsinin müdiri olub.

Professor Ramiz Qurbanov 1935-ci ildə Salyan şəhərində anadan olub. 1956-cı ildə Azərbaycan Sənaye İnstitutunun Neft-mədən fakültəsini neft yataqlarının işlənilməsi və istismarı ixtisası üzrə fərqlənmə ilə bitirib. NQÇİ-də operator kimi əmək fəaliyyətinə başlayıb, sonra usta köməkçisi, neft və qaz hasilatı üzrə usta və böyük mühəndis vəzifələrində işləyib. 1961-ci ildən etibarən Azərbaycan Neft və Kimya İnstitutunun (AzNKİ) Nəzəri Mexanika kafedrasında assistent, baş müəllim, dosent, professor və kafedra müdiri olub. 1989-cu ildən Azərbaycan Milli Elmlər Akademiyasının müxbir üzvüdür.

Professor Sadıxov Əli Hidayət oğlu 29 iyun 1938-ci ildə Bakı şəhərində anadan olub. 1962-ci ildə Azərbaycan Politexnik İnstitutunu (indiki AzTU) bitirərək maşınqayırma texnologiyası, metalkəsən dəzgahlar və alətlər ixtisası üzrə mühəndis-mexanik diplomu alıb. 1964-cü tədris ilinin əvvəlində Maşınqayırma Texnologiyası kafedrasında assistent vəzifəsinə müsabiqə yolu ilə qəbul edilib, 1966–1969-cu illərdə kafedranın aspirantı olub və 1971-ci ildə Kuybışev Politexnik İnstitutunda namizədlik, 2008-ci ildə isə AzTU-nun İxtisaslaşdırılmış Dissertasiya Şurasında doktorluq dissertasiyasını müdafiə edib. Onun rektorluğu dövründə — 1991-ci ildə — institut universitet statusu qazanaraq Azərbaycan Texniki Universiteti adlandırılıb.

Professor Orucov Allahverdi Oruc oğlu 1944-cü ildə Füzuli rayonunun Yağuvənd kəndində anadan olub. 1964–1969-cu illərdə AzPİ-nin (indiki AzTU) Elektrotexnika fakültəsində təhsil alıb. 1975-ci ildə AzPİ-də assistent olaraq işə başlayıb. 1992-ci il noyabrın 6-dan 2000-ci il yanvarın 3-dək AzTU-nun tədris işləri üzrə prorektoru vəzifəsində çalışıb. 1993-cü il iyulun 2-dən həmin ilin dekabrına qədər AzTU-nun rektor səlahiyyətlərinin icrası ona həvalə edilib.

Professor Rafiq Mehdiyev 1936-cı ildə Cəbrayıl rayonunda anadan olub. 1958-ci ildə Azərbaycan Politexnik İnstitutunun (indiki AzTU) Mexanika fakültəsini bitirib. 1964-cü ildə namizədlik, 1981-ci ildə isə Leninqrad Politexnik İnstitutunda doktorluq dissertasiyasını müdafiə edib. Hazırda İstanbul Texniki Universitetində professor kimi fəaliyyətini davam etdirir.

Professor Məmmədov Havar Əmir oğlu 1945-ci il oktyabrın 9-da İmişli rayonunun Qızılkənd kəndində anadan olub. 1963-cü ildə İmişli rayon 34 saylı dəmiryolu orta məktəbini fərqlənmə ilə bitirərək Azərbaycan Politexnik İnstitutunun (indiki AzTU) Avtomatika və Hesablama Texnikası fakültəsinin avtomatika və telemexanika ixtisasına qəbul olunub. 2000–2016-cı illərdə AzTU-nun rektoru, 2017–2023-cü illərdə isə Bakı Mühəndislik Universitetinin rektoru vəzifəsində çalışıb.

Professor Yahudov Xalıq Məcid oğlu 14 avqust 1946-cı ildə Zaqatala rayonunun Suvagil kəndində anadan olub. 1964-cü ildə Suvagil kənd orta məktəbini əla qiymətlərlə bitirdikdən sonra S.M.Kirov adına Azərbaycan Dövlət Universitetinin (indiki BDU) İqtisad fakültəsinə daxil olub. 1969-cu ildə D.Bünyadzadə adına Azərbaycan Xalq Təsərrüfatı İnstitutunu bitirib və Dövlət Plan Komitəsinin Elmi-Tədqiqat İqtisadiyyat İnstitutuna işə göndərilib. 1981-ci ildən etibarən AzTU-da müxtəlif akademik və inzibati vəzifələrdə çalışıb. 2016-cı ilin sentyabrından 2019-cu il iyulun 31-dək AzTU-nun rektoru olub.