Azərbaycan Texniki Universitetinin (AzTU) SABAH Mərkəzinin təşkilatçılığı ilə “Risk və Komplayns” mövzusunda seminar təşkil edilib. Seminarda AKTA-nın Kibertəhdidlərlə mübarizə şöbəsinin müdiri Əli Məmmədzadə risklərin qiymətləndirilməsi, komplayns mədəniyyəti və kibertəhdidlərin idarə olunması ilə bağlı vacib məlumatları tələbələrin diqqətinə çatdırıb. İnteraktiv şəkildə davam edən seminarda tələbələri maraqlandıran suallar cavablandırılıb.

Özbəkistanın Daşkənd şəhərində "Quacquarelli Symonds" (QS) qlobal reytinq agentliyinin təşkilatçılığı və Mərkəzi Asiya Universitetinin ev sahibliyi ilə “Üfüqlərin Genişləndirilməsi: Ali Təhsildə Qlobal Körpülərin Qurulması” adlı Avrasiya Forumu keçirilib. Avropa və Asiyanın qabaqcıl universitetlərinin nümayəndələrinin iştirak etdiyi forumda Azərbaycan Texniki Universitetini (AzTU) tədris işləri üzrə prorektor professor Nurəli Yusifbəyli, beynəlxalq əlaqələr üzrə prorektor Fariz Məmmədov və Tədqiqat və inkişaf departamentinin direktoru Bəxtiyar Bədəlov təmsil edib. Forum çərçivəsində AzTU-nun elmi, tədris, tədqiqat sahəsində beynəlxalq reytinqinin yüksəldilməsi məqsədilə ikitərəfli əlaqələrin qurulması üçün iştirakçı universitetlərlə görüş və müzakirələr həyata keçirilib.

Azərbaycan Texniki Universitetinin (AzTU) tərəfdaşı olduğu Asiya İnkişaf Bankının Mərkəzi Asiya Regional İqtisadi Əməkdaşlıq (CAREC) proqramı çərçivəsində "Yaşıl Bacarıqların İnkişafının Gücləndirilməsi" regional texniki yardım layihəsi ilə bağlı Qırğızıstanın Bişkek şəhərində K. İ. Skryabin adına Qırğız Milli Aqrar Universitetində “CAREC regionunda iqlim dəyişikliklərinə uyğunlaşdırılmış kənd təsərrüfatı” mövzusunda növbəti regional seminar keçirilib. Seminarda Niderlandın Vaqeninqen Universiteti və CAREC proqramına üzv ölkələrin aparıcı aqrar və texniki universitetləri iştirak edib. Tədbirdə Azərbaycandan yeganə ali təhsil müəssisəsi olan AzTU-nu tədris işləri üzrə prorektoru professor Nurəli Yusifbəyli və Rəqəmsal iqtisadiyyat və maliyyə texnologiyaları kafedrasının müdiri Ceyhun Hacıyev təmsil edib. AzTU-nun prorektoru Nurəli Yusifbəyli iqlim dəyişikliyinə uyğun dayanıqlı kənd təsərrüfatının qurulmasında mühəndislik və rəqəmsal transformasiyanın vacibliyini qeyd edib, bu sahədə texniki universitetlərin rolunun önəmini diqqətə çatdırıb. Rəqəmsal iqtisadiyyat və maliyyə texnologiyaları kafedrasının müdiri Ceyhun Hacıyev “Just Transition” (“Ədalətli Keçid”) mövzusunda məruzə ilə çıxış edib. Mərizəsində kənd təsərrüfatının iqlim dəyişikliklərinə adaptasiyasında sosial ədalət, icmaların hazırlanması, risklərin idarə olunması və yaşıl iqtisadiyyatın transformasiyasının ali təhsil müəssisələri tərəfindən diqqətlə araşdırılması və həmin istiqamətlərdə sənayeyə və ictimaiyyətə dəstək göstərməsinin əhəmiyyətini vurğulayıb. O həmçinin müvafiq istiqamətlərdə AzTU təcrübəsini iştirakçılarla bölüşüb. Tədbir çərçivəsində həmçinin layihədə iştirak edən ali təhsil müəssisələri, Asiya İnkişaf Bankı və Vaqeninqen Universiteti arasında tərəfdaşlıq haqqında saziş imzalanıb. Sazişdə CAREC regionunda iqlim dəyişikliyinə davamlı və dayanıqlı kənd təsərrüfatının inkişafı üçün akademik əməkdaşlıq, tədqiqat layihələri və yeni təhsil proqramlarının yaradılmasını nəzərdə tutulub.

Azərbaycan Texniki Universitetinin (AzTU) İnkubasiya Mərkəzində Startap Günləri keçirilib. İki gün davam edən proqram çərçivəsində tələbələr innovativ ideyalarını təqdim edib, ekspert və mentorlarla sıx əməkdaşlıq şəraitində layihələrini inkişaf etdiriblər. Tədbirin ilk günü iştirakçıları salamlayan Azərbaycan İnternet Forumunun prezidenti və “Startap Azərbaycan” platformasının rəhbəri Osman Gündüz ölkədə startap ekosisteminin inkişafı, gənclərin innovativ təşəbbüslərə cəlb olunması və tədbirin əhəmiyyəti barədə danışıb. Daha sonra çıxış edənlər tələbələri qiymətləndirmə meyarları və növbəti mərhələlərin tələbləri barədə məlumatlandırıb. AzTU İnkubasiya Mərkəzinin koordinatoru Azad Musayev Startap Günlərinin ümumi konsepsiyası, mərhələləri və gözləntiləri barədə təqdimat edib, həmçinin tələbələrin suallarını cavablandırıb. Tədbirin ilk günü tələbələrin təqdim etdiyi 16 layihə arasından 6 ideya seçilərək növbəti mərhələyə vəsiqə qazanıb. Seçilmiş ideyalar əsasında komandalar formalaşdırılıb və həmin komandalara mentor dəstəyi ilə layihələrini inkişaf etdirmək üçün şərait yaradılıb. Tədbirin ikinci günü komandalar ekspert və mentorların iştirakı ilə layihələrinin prototipini və təqdimat strukturunu formalaşdırıb. Komandalara layihə hazırlanması, düzgün istiqamətin müəyyən edilməsi, komanda işi, təqdimat texnikası və münsiflər qarşısında çıxış zamanı vacib məqamlar barədə geniş məsləhətlər verilib. Komandalar layihələrini təqdim etdikdən sonra münsiflər heyəti (Orxan Əhmədov, Rəşad Əliyev, Fərid Kazımov, Günel Məmmədli, Aysel Sadıqova) layihələri innovativlik, aktual problemə yönəlmə, texniki əsaslandırma, komanda işi və reallaşdırma potensialı üzrə qiymətləndirib. Nəticələrə əsasən, “Lingo Aİ” komandası 1-ci, “Cyber Defence with Aİ” komandası 2-ci, “Bridge to Abroad” komandası isə 3-cü yerə layiq görülüb. Qaliblərə diplom və sertifikatlar təqdim olunub.

Azərbaycan Texniki Universitetində (AzTU) Biotibbi Mühəndislik İnstitutunun təşkilatçılığı ilə "Rəqəmsal sağlamlıq sistemlərində süni intellekt texnologiyaları və Big Data analitikası" mövzusunda infosessiya keçirilib. İnfosessiyada çıxış edən AzTU-nun rektoru Vilayət Vəliyev süni intellektin tibbdə tətbiqi istiqamətində Biotibbi Mühəndislik İnstitutunun bir il ərzində apardığı elmi-tədqiqatlardan danışıb. Rektor yaxın gələcəkdə institutun tibb müəssisələri ilə əməkdaşlığının planlaşdırıldığını deyib. Bu əməkdaşlığın qeyd olunan istiqamət üzrə mövcud problemlərin həlli üçün faydalı imkanlar yaradacağı da xüsusi vurğulanıb. Almaniya-Azərbaycan Radioloji və Neyroradioloji Cəmiyyətinin sədri, Almaniyanın Troisdorf şəhərində Radiologiya, Nuklear Tibb və Neyroradiologiya Klinikasının rəhbəri, Köln Universitetinin əməkdaşı və AzTU-nun Biotibbi Mühəndislik İnstitutunun direktoru professor Nuran Abdullayev rəhbərlik etdiyi institutun bir il ərzində gördüyü işlərdən danışıb. Bildirib ki, institut bu müddət ərzində Azərbaycanda bir sıra ilklərə imza atıb. Biotibbi Mühəndislik İnstitutu ölkədə mühəndislik və tibb sahəsində birgə elmi-tədqiqaltarın icra olunduğu ilk institutdur. İnstitutda aparılan elmi-tədqiqatlar beynəlxalq elmi jurnallarda dərc olunub. Nuran Abdullayev süni intellektin diaqnostika və müalicədə bir çox məsələlərin həllinə töhfəsindən də danışıb. O deyib ki, Azərbaycanda bütün qurumlar üçün institutun fəaliyyət sahəsi üzrə təkliflər planı artıq hazırdı və institut bu istiqamətdə də bütün əməkdaşlıqlara açıqdır. Respublika Klinik Xəstəxanasının direktoru, əməkdar həkim, onurğa cərrahı, ortoped-travmatoloq, idman həkimliyi üzrə mütəxəssis, fəlsəfə doktoru Elviz Qasımov AzTU-nun müvafiq dövlət qurumları ilə süni intellekt əsaslı biotibbi həllər üzrə strateji əməkdaşlıq qurmasını təqdirəlayiq addım adlandırıb. O, AzTU-nun Biotibbi Mühəndislik İnstitutunun səhiyyə sisteminin rəqəmsallaşdırılması prosesinə də töhfə verəcəyinə ümid etdiyini deyib. Sonra Biotibbi Mühəndislik İnstitutunun əməkdaşları Sevinc Əliyeva və Xalid Nəzərov institutun elmi-tədqiqatları haqqında geniş təqdimatla çıxış ediblər.

Azərbaycan Texniki Universitetinin (AzTU) əməkdaşı Kənan Əsgərli “50-ci ICPC – Universitetlərarası Beynəlxalq Proqramlaşdırma Müsabiqəsi”nin Azərbaycan üzrə regional mərhələsi çərçivəsində “İctimai Fəaliyyətə Görə Fəxri Mükafat”a layiq görülüb. ICPC Fondunun “İctimai Fəaliyyətə Görə Fəxri Mükafatı” Beynəlxalq Universitetlərarası Proqramlaşdırma Müsabiqəsinin təbliğində mühüm rol oynamış fərd və ya qrupa təqdim olunur. Qeyd edək, ki ICPC (Beynəlxalq Universitetlərarası Proqramlaşdırma Müsabiqəsi) 1977-ci ildən mütəmadi olaraq keçirilir. Hər il 110 ölkənin 3000-dən çox universitetindən 50000-dən çox tələbə bu müsabiqədə iştirak edir.

Özbəkistanın Beynəlxalq Türk Dövlətləri Universitetinin rektoru və eyni zamanda,Daşkənd Dövlət Nəqliyyat Universitetinin prorektoru Bahodır Turaevin rəhbərlik etdiyi nümayəndə heyəti Azərbaycan Texniki Universitetinin (AzTU) qonağı olub. Qonaqlar AzTU-nun elm və innovasiyalar üzrə prorektoru Sübhan Namazov və universitetin nümayəndələri ilə görüşüb. Sübhan Namazov universitetdə görülən işlər, həyata keçirilən layihələrlə bağlı qonaqlara məlumat verib. Bahodır Turaev də öz növbəsində yeni yaradılmış Beynəlxalq Türk Dövlətləri Universitetinin fəaliyyəti barədə ətraflı məlumat verib. Fəaliyyət göstərdiyi hər iki ali təhsil müəssisəsinin AzTU ilə əməkdaşlıq etməkdə maraqlı olduğunu bildirib. Görüş zamanı AzTU ilə Daşkənd Dövlət Nəqliyyat Universiteti arasında birgə elmi-tədqiqat layihələrinin hazırlanması, konfransların təşkili və tələbə-müəllim mübadiləsi kimi məsələlər müzakirə olunub.

Sərfəli təklifləri ilə seçilən mobil operator Nar ölkədə peşəkar kadr hazırlığı məqsədilə növbəti layihəsini həyata keçirib. On ildən çoxdur ki, davam edən tərəfdaşlıq çərçivəsində Nar Azərbaycan Texniki Universitetinin (AzTU) tələbələri üçün karyera planlaşdırılması təlimi təşkil edib. Təlim zamanı AzTU tələbələri ilə birgə mobil rabitə sektorunda karyera imkanları, gənc kadrlar üçün əsas tələblər və sürətlə dəyişən rəqəmsal mühitə uyğunlaşma yolları müzakirə olunub. Proqram çərçivəsində iştirakçılar tərcümeyi-hal (CV) tərtibatı, motivasiya məktublarının hazırlanması və işgüzar müsahibələr üzrə biliklər əldə ediblər.  Həmçinin Nar nümayəndələri iş mühitində effektiv ünsiyyət, nəticəyə fokuslanma, məsuliyyətli yanaşma və komanda ilə işləmək kimi peşəkar keyfiyyətlərin əhəmiyyəti barədə tələbələrlə öz təcrübələrini bölüşüblər. İnteraktiv formatda təşkil olunan təlimdə tələbələrin telekommunikasiya sahəsinə, mobil operatorun daxili proseslərinə və təcrübə proqramlarına dair sualları cavablandırılıb. Sonda Nar tərəfindən iştirakçılara təlimdə iştiraklarını təsdiq edən sertifikatlar təqdim edilib. Təlim zamanı xüsusi fərqlənən tələbələr Nar tərəfindən dəyərli hədiyyələrlə mükafatlandırılıb.

Azərbaycan Texniki Universitetinin (AzTU) Özbəkistanın Əndican Dövlət Texniki İnstitutu (ƏDTİ) ilə əməkdaşlığı çərçivəsində ƏDTİ-nin Nəqliyyat və logistika, həmçinin İqtisadiyyat kafedralarının ümumilikdə 14 nəfərdən ibarət professor-müəllim heyəti mübadilə proqramı ilə AzTU-nun qonağı olub.  AzTU-nun beynəlxalq əlaqələr üzrə prorektoru Fariz Məmmədov qonaqlara universitetin fəaliyyəti barədə məlumat verib. Daha sonra qonaqlar müvafiq olaraq AzTU-nun Nəqliyyat və logistika və Sənaye iqtisadiyyatı və menecment fakültələrinin müəllim və tələbələri ilə görüşüb, tədris prosesi ilə tanış olub, müxtəlif mövzularda seminarlar təşkil ediblər.  Görüş zamanı hər iki universitetin nümayəndələri arasında gələcəkdə birgə tədris və tədqiqat imkanları barədə müzakirələr aparılıb.

Azərbaycan Texniki Universitetinin (AzTU) tələbələrindən ibarət ESTIEM Lokal Qrupu (LG) Serbiyanın Niş şəhərində keçirilən ESTIEM Şəbəkəsinin LXXI Şura İclasında iştirak edib. Bu tədbir ESTIEM-in (Sənaye mühəndisliyi və idarəetmə ixtisası üzrə Avropa Tələbələri Assosiasiyası) əsas fəaliyyət istiqamətlərindən biri olub, lokal qrupların beynəlxalq əməkdaşlıq imkanlarını genişləndirmək, təcrübə mübadiləsi aparmaq və şəbəkənin qərarvermə prosesində iştirak etmək məqsədi daşıyır.    Tədbirdə AzTU ESTIEM Lokal Qrupunu tələbələr - Mühəmməd-Əli Salamov və Ülvi Cəfərli təmsil edib. Onlar şəbəkənin qərarvermə mexanizmlərində fəal iştirak edib. Təxminən 300 nəfərin qatıldığı iclasda AzTU tələbələrinin əsas hədəfi lokal qrupun Müşahidəçi (Observer) səviyyəsinə keçidini təmin etmək olub. AzTU nümayəndələrinin hazırlıq səviyyəsi və peşəkar təqdimatı nəticəsində paralel olaraq Qonaq (Guest) səviyyəsində iştirak edən digər lokal qruplardan fərqli olaraq, AzTU ESTIEM Lokal Qrupu növbəti mərhələyə ilk keçən qrup olub. AzTU tələbələri təqdimatlarında həm qrupun fəaliyyətini, həm də “Novruz Europe 3D” layihəsini uğurla nümayiş etdiriblər. Təqdimatdan sonra keçirilən səsvermə nəticəsində AzTU ESTIEM Lokal Qrupu rəsmi olaraq Müşahidəçi səviyyəsinə yüksəlib.