AzTU-da kimya tədqiqatlarında süni intellektin tətbiqinə həsr olunmuş təlim keçirilib
Azərbaycan Texniki Universitetinin (AzTU) Kitabxana İnformasiya Mərkəzində (KİM) “Kimya tədqiqatlarında süni intellekt: “Reaxys” platforması” mövzusunda təlim təşkil olunub.
Təlimin əsas məqsədi universitetin professor-müəllim heyətinin, tədqiqatçıların, doktorantların və tələbələrin elmi informasiya resurslarından istifadə bacarıqlarını inkişaf etdirmək, eləcə də müasir rəqəmsal texnologiyaların elmi-tədqiqat fəaliyyətində tətbiqini genişləndirmək olub.
Tədbir çərçivəsində iştirakçılara süni intellekt texnologiyalarının müasir elmi-tədqiqatlarda rolu və “Reaxys” platformasının funksional imkanları barədə ətraflı məlumat verilib. Platforma vasitəsilə kimyəvi məlumatların sürətli axtarışı, etibarlı elmi məlumatların əldə edilməsi və tədqiqat prosesinin optimallaşdırılması üsulları praktiki nümunələrlə nümayiş etdirilib.
Həmçinin son illərdə nəşr olunmuş müasir elektron kitablara (E-reader) çıxış imkanları, qlobal elmi informasiya resurslarından səmərəli istifadə mexanizmləri müzakirə olunub.
Təlim iştirakçılara rəqəmsal alətlərin elmi araşdırmaların keyfiyyətinin yüksəldilməsində, məlumatların əlçatanlığının artırılmasında və tədqiqat prosesinin daha səmərəli təşkilində rolu ilə yaxından tanış olmaq imkanı yaradıb.
