AzTU müəllimi Qazaxıstan universitetində tələbələrə mühazirə deyib
Azərbaycan Texniki Universitetinin (AzTU) İnformasiya texnologiyaları və telekommunikasiya fakültəsinin Kibertəhlükəsizlik kafedrasının müəllimi Qahirə Əliyeva Orhun Mübadilə Proqramı çərçivəsində Qazaxıstanın Türküstan şəhərində yerləşən Xoca Əhməd Yəsəvi adına Beynəlxalq Qazax-Türk Universitetində akademik mobillikdə iştirak edib.
Səfərin əsas məqsədi iki ali təhsil müəssisəsi arasında elmi-pedaqoji əlaqələrin gücləndirilməsi, tədris təcrübəsinin qarşılıqlı mübadiləsi, kibertəhlükəsizlik sahəsində bilik və bacarıqların paylaşılması olub.
Bir həftə davam edən səfər çərçivəsində Qahirə Əliyeva universitetin Mühəndislik fakültəsinin Kompüter mühəndisliyi və Elektrik mühəndisliyi kafedralarında, eləcə də Beynəlxalq əməkdaşlıq şöbəsində görüşlər keçirib. Görüşlər zamanı informasiya təhlükəsizliyi üzrə tədris proqramlarının və fənn məzmunlarının müqayisəli müzakirəsi aparılıb, hər iki universitetin bu sahədəki akademik və praktiki təcrübəsi bölüşülüb.
Akademik mobillik proqramı çərçivəsində Qahirə Əliyeva Mühəndislik fakültəsinin tələbələri üçün “Məlumatların şifrələnməsi üçün blok tipli simmetrik standart: DES alqoritmi” və “İnformasiya təhlükəsizliyinin əsasları: müasir kibertəhlükələr” mövzularında mühazirələr oxuyub.
