 |
Maşınqayırma texnologiyası kafedrasının Nizami Dəmir oğlu Yusubov 2 fevral 1965-ci ildə Lənkəran şəhərində qulluqçu ailəsində anadan olub və 1972-1982-ci illərdə Lənkəran şəhərinin 2 saylı orta məktəbində orta təhsil alıb. Eyni zamanda 1981-1982-ci tədris ilində orta məktəbin 10-cu sinif şagirdi kimi M.V.Lomonosov adına Moskva Dövlət Universitetinin iki illik Qiyabi Fizika məktəbini bir ilə qurtarıb. Orta məktəbdə oxuduğu illərdə şəhərin ictimai həyatında fəal iştirak edib, müxtəlif fənn olimpiadalarının iştirakçısı və qalibi olub. 1982-ci ildə Azərbaycan Politexnik İnstitutuna maşınqayırma texnologiyası, metalkəsən dəzgahlar və alətlər ixtisası üzrə daxil olub, 1983-1985-ci illərdə, Sovetlər Birliyində qəbul olunan qərara əsasən, institutun birinci kursunu bitirib ordu sıralarında xidmət edib. Ordu sıralarında 2-illik xidməti başa vurduqdan sonra 1985-1989 illərdə yenidən təhsilini Azərbaycan Politexnik İnstitutunda davam edib. Ali məktəbdə təhsil aldığı illərdə dərs əlaçısı və Lenin təqaüdçüsü olub. N.D.Yusubov 1989-cu ildə Azərbaycan Politexnik İnstitutunu maşınqayırma texnologiyası, metalkəsən dəzgahlar və alətlər ixtisası üzrə tam kursu fərqlənmə diplomu ilə bitirib və Maşınqayırma texnologiyası kafedrasnın tövsiyəsi və Maşınqayırma fakultəsi Elmi şurasının qərarı ilə stajkeçən tədqiqatçı kimi kafedrada saxlanılıb. N.D. Yusubov 1990-cı ilin sentyabrından Çelyabinsk Politexnik İnstitutuna (sonralar Çelyabinsk Dövlət Texniki Universiteti (ÇDTU), hazırda Cənubi Ural Dövlət Universiteti (CUrDU)) məqsədli aspiranturaya göndərilmiş və 1993-cü il yanvar ayının 25-də ÇDTU-da 05.02.08-Maşınqayırma texnologiyası ixtisası üzrə "Torna-revolver avtomatlarında səthlərin emal planlarının məhsuldarlıq kriteriyası üzrə optimallaşdırılması" mövzusunda namizədlik dissertasiyasını vaxtından əvvəl müdafiə edərək texnika elmləri namizədi elmi dərəcəsini alıb. N.D.Yusubov 1993-cü ilin oktyabr ayından Maşınqayırma texnologiyası kafedrasında assistent, 1994-cü ilin noyabrından baş müəllim və 1995-ci ilin noyabr ayından dosent, 2013-cü ilin noyabr ayından 09 sentyabr 2015-ci ilə qədər professor vəzifəsində çalışıb. Azərbaycan Respublikası Təhsil Naziri Mikayıl Cabbarovun 09 sentyabr 2015-ci il tarixli 11/944 saylı əmri ilə professor Nizami Dəmir oğlu Yusubov Lənkəran Dövlət Universitetinin (LDU) tədris işləri üzrə prorektoru təyin edilib. 29.03.2016-30.05.2016-cı il tarixində N.D.Yusubova LDU-nun rektor vəzifəsinin icrası müvəqqəti olaraq həvalə edilib. N.D.Yusubov 1998-ci ilin fevral ayının 2-də Azərbaycan Respublikası Prezidenti yanında Ali Attestasiya Komissiyasının qərarı ilə Maşınqayırma texnologiyası kafedrası üzrə dosent elmi adını alıb. N.D.Yusubov 02 dekabr 2009-cu ildə AzTU-nun nəzdindəki D. 02. 171 Dissertasiya Şurasında 05.02.08-«Maşınqayırma texnologiyası» ixtisası üzrə Torna avtomat - dəzgahlar qrupunda çoxalətli emalın səmərəliliyinin yüksəldilməsi mövzusunda doktorluq dissertasiyasını müdafiə edib və 07 yanvar 2011-ci ildə Azərbaycan Respublikası Prezidenti yanında Ali Attestasiya Komissiyasının qərarı ilə texnika üzrə elmlər doktoru elmi dərəcəsini alıb. N.D. Yusubov 2015-ci ilin may ayının 22-də Azərbaycan Respublikası Prezidenti yanında Ali Attestasiya Komissiyasının qərarı ilə Maşınqayırma texnologiyası kafedrası üzrə professor elmi adını alıb 350-dən çox elmi və tədris-metodiki işin, o cümlədən 1 sorğu materiallarının (Rusiyada çap olunub), 1 istiqamətləndirici texniki materialların, 5 ixtira, 4 monoqrafiya (bunlardan 3-ü Almaniyanın Saarbryükken şəhərində yerləşən AV Akademikerverlag Gmbh & Co. KG / LAP LAMBERT Academic Publishing nəşriyyatında çap olunub), 3 dərslik, 10 dərs vəsaiti (bunlardan 1-i Rusiyada çap olunub), 10 metodiki göstəriş, 1 metodiki vəsait və 75 fənn proqramının müəllifidir. Elmi əsərlərindən 58-i ABŞ, Almaniya, İsveç, İsveçrə, Fransa, Malaysiya, Rusiya, Türkiyə, Belarusiya, Ukrayna və Kazaxstanın qabaqcıl texniki dərgi və məcmuələrində çap olunub. Müxtəlif beynəlxalq, eləcə də respublika elmi-texniki və metodiki konfranslarda çıxış edib. 1 doktorantı texnika üzrə fəlsəfə doktoru dissertasiyasını müdafiə edib. N.D.Yusubov kafedranın tədris etdiyi fənnlərdən LDU-nun tədris işləri üzrə prorektoru vəzifəsinə təyin edilənədək AzTU-nun Maşınqayırma texnologiyası kafedrasında mühazirələr oxuyub, laboratoriya və məşğələ dərslərini aparıb, kurs layihəsi və buraxılış işlərinə, tədris və istehsalat təcrübələrinə rəhbərlik edib. Kafedra üzrə dövlət büdcəli elmi-texniki işin məsul içraçısı olub və hazırda da elmi tədqiqatlara rəhbərlik edir. N.D.Yusubov 04.08.1996-26.09.1996-cı il tarixində Almaniyanin İzerlon şəhərində Höte İnstitutunda Deutsch Kurs (Alman dili) kursunu bitirib. N.D.Yusubov DAAD (Almaniya Akademik Mübadilə Xidməti) xətti ilə Almaniya Federativ Respublikasının Braunşveyq Texniki Universitetinin Metalkəsən dəzgahlar və maşınqayırma texnologiyası institutunda (1 il 2 ay 27.09.1996-15.11.1997), Drezden Texniki Universitetinin İstehsal Texnologiyası İnstitutunda (3 ay 01.08.2001-31.10.2001) və Aaxen Ali Texniki Məktəbinin Metalkəsən Dəzgahlar Laboratoriyasının Metalkəsən dəzgahlar kafedrasında (2 ay 01.08.2012-30.09. 2012) elmi tədqiqatlar aparıb və elmi mübadilələrdə, eləcə də alman ali təhsil sistemi ilə bağlı elmi kollokviumlarda iştirak edib. N.D.Yusubov 21.02.2015-15.03.2015-ci ildə ABŞ-da Dövlət Departamentinin International Visitor Leadership Proqram (IVLP) üzrə "ABŞ-da ali təhsilin idarə olunması" təlim kursunu keçib və beynəlxalq sertifikat alıb. N.D.Yusubov 01.06.2015-31.07.2015-ci ildə DAAD xətti ilə Almaniyada Drezden Texniki Universitetinin İstehsal Texnologiyası İnstitutunda qonaq professor kimi elmi tədqiqatlar aparıb və məruzə ilə elmi kollokviumda çıxış edib. Nizami Yusubov 01.07.2023-30.09.2023 –cü ildə elmi-tədqiqat işi aparmaq üçün DAAD-nin dəvəti ilə Almaniyanın Rostok şəhərinin İstehsal Texnologiyasında Böyük Konstruksiyalar Fraunhofer İnstutunda və Rostok Universitetinin İstehsal Texnologiyaları kafedrasında fəaliyyət göstərib. N.D.Yusubov 1994-1996-ci illərdə Maşınqayırma fakültəsinin elmi işlər üzrə dekan müavini vəzifəsində çalışın, 2006-2010-cu və 2011-2014-cü illərdə AzTU-nun nəzdindəki D02.171 Dissertasiya Şurasının elmi seminarının üzvü, 2011-2014-cü illərdə AzTU-nun nəzdində fəaliyyət göstərən, elmi dərəcə verən (fəlsəfə doktoru və elmlər doktoru) D. 02. 171 Dissertasiya şurasının üzvü olub. N.D. Yusubov 03.02.2020-dən 01.11.2022-ci ilədək ED 2.32 Dissertasiya Şurasılnın üzvü və Dissertasiya Şurasının nəzdində 3313.01- “Maşınqayırma texnologiyası” ixtisası üzrə seminarın sədri olub. N.D.Yusubov 14.09.2015-01.11.2016-cı il müddətində Lənkəran Dövlət Universitetinin (LDU) Elmi şurasının üzvü, 02.11.2015-01.11.2016-ci il müddətində LDU-nun Elmi-metodiki şurasının sədri olub. N.D.Yusubov 2024-cü ildə Azərbaycan Elm Fondunun “Yaşıl Dünya Naminə Həmrəylik İli”nə həsr etdiyi “Əsas Qrant Müsabiqəsi-2024” üzrə (AEF-MGC-2024-2(50)) qaliblər sirasında olmuşdur.. N.D.Yusubov 01.04.2014-cü ildən Rusiyanın Çelyabinsk şəhərində yerləşən Cənubi Ural Dövlət Universitetinin "Вестник ЮУрГУ" jurnalının "Машиностроение" seriyasının redaksiya heyətinin üzvü, 17.04.2015-ci ildən 2016-cı ilin sonunadək Azərbaycan Respublikası Prezidenti yanında Ali Attestasiya Komissiyasının Texnika elmləri bölməsi üzrə Ekspert şurasının üzvü olmuşdur. Hazırda MACHINE SCIENCE və CIFRA. МАШИНОСТРОЕНИЕ jurnallarının redaksiya heyətinin üzvüdür. N.D. Yusubova Azərbaycan Respublikası Prezidentinin 2020-ci il 30 dekabr tarixli 2394 nömrəli Sərəncamı ilə “Əməkdar mühəndis” fəxri adı verilib. N.D. Yusubov AzTU-da işlədiyi müddətdə universitet, fakultə və kafedranın ictimai işlərində də fəal iştirak edib.
Evlidir, 3 övladı (2 qız və 1 oğlan) var. |
