Ümumi məlumat
Elektrotexnika kafedrası Azərbaycan Texniki Universitetinin yaradıldığı ilk gündən fəaliyyət göstərən kafedralardan biridir.
2021-ci il fevral ayının 9-da Azərbaycan Texniki Universitetinin Elmi şurasının qərarı ilə Elektrotexnika və elektrik avadanlığı kafedrasının adı dəyişdirilərək Elektrotexnika adlandırlıdı.
Hazırda kafedrada elektrik və elektronika mühəndisliyi ixtisası üzrə bakalavr hazırlığı həyata keçirilir.
Kafedrada 2023-2024-cü tədris ilindən bakalavr səviyyəsində Türkiyənin Gazi Universiteti ilə “Elektrik və elektronika mühəndisliyi “ ixtisası üzrə ikili diplom proqramı çərçivəsində birgə təhsilə başlamışdır. Bu proqram çərçivəsində qəbul olunan tələbələr I və II kurslar AzTU-da, III və IV kurslar isə Türkiyədə Ankara şəhərində Gazi Universitetində təhsil alacaqlar. Təhsilini müvəffəqiyyətlə başa vuran tələbələrə həm AzTU-nun, həm də Gazi Universitetinin diplomu veriləcək.
Kafedrada mütəxəssis hazırlığı həyata keçirilən ixtisaslarda Azərbaycandan olan tələbələrlə yanaşı, bir sıra xarici ölkələrin (Türkiyə, İran, Rusiya, Gürcüstan, və s.) tələbələri də təhsil alırlar.
Təhsil alanlar elektrik və elektronika mühəndisliyi ixtisasları üzrə fundamental və nəzəri biliklərlə yanaşı, əmək bazarının tələblərinə uyğun olaraq praktiki hazırlıq keçirlər. Müasir elektrotexnikanın ən son nailiyyətləri mənimsəmələri təcrübəyə və sistemli təfəkkürə malik olmaları məzunların əmək bazarının tələblərinə asanlıqla uyğunlaşmasına və müvafiq işlə təmin olunmasına imkan verir.
Məzunların əksəriyyəti Elektroenergetika, Bərpa olunan enerji mənbələri, rabitə və telekommunikasiya, bank, neft, müdafiə sənayesi sektorlarında və s. sahələrdə elektrik mühəndisi olaraq fəaliyyət göstərirlər.
KAFEDRANIN İSTİFADƏ ETDİYİ TƏDRİS MODELİ
Elektrotexnika kafedrasının təklif etdiyi tədris modeli əsasən mühəndis təhsil sistemində dual təlim texnilogiyasının istifadəsinə istiqamətlənmişdir.
Dual təhsilin tətbiqinin effektləri:
Bir çox hallarda məzunların işədüzəlmə məsələləri həll olunur (Bir çox tələbələr praktiki dərsləri keçdikləri müəssisələrdə qalıb işləyirlər);
Tədrisin məzmununun işə qəbul tələblərinə uyğunluğu təmin edilir (İş təminediciləri müəssisələrdə tədrisin aparılma ardıcıllığını özləri hazırlayıb nəzəri təhsillə uyğunlaşdırırlar və razılaşdırırlar).
Nəzəri və Praktiki Təhsil sisteminin kifayət qədər maliyyələşdirilməsi məsələsi həll olunur (Maliyyələşdirilmə əsasən və ya onun əksər hissəsi müəssisənin hesabına olur, o cümlədən, tələbələrin əməkləri üçün ödəniş (əmək haqqı), sərf olunan materiallar, ali təhsil müəssisələrinin material-texniki təminatına olan köməkliklər).
Dual tədris formasının tətbiq olunması texniki təhsilin əsas problemlərini- nəzəriyyə və praktika arasında olan boşluğu həll etməyə imkan verir.
