 |
Maşınqayırma və robototexnika Qarayev Malik Fikrət oğlu 6 fevral 1966-cı ildə Qazax rayonunun I Şıxlı kəndində anadan olub. 1983-cü ildə I Şıxlı kənd orta məktəbini əla qiymətlərlə bitirdikdən sonra Azərbaycan Politexnik İnstitutuna (indiki Azərbaycan Texniki Universiteti) daxil olub. İnstitutun I kursunu bitirdikdən sonra 1984-1986-cı illərdə hərbi xidmətdə olub.1990-cı ildə həmin institutu “Maşınqayırma texnologiyası, metalkəsən dəzgahlar və alətlər” ixtisası üzrə fərqlənmə diplomu ilə bitirib və gənc mütəxəssis kimi Maşınqayırma texnologiyası kafedrasında Tədris ustası vəzifəsində əmək fəaliyyətinə başlayıb. Kafedrada 1992-ci ilə qədər həmin vəzifədə fəaliyyət göstərib və bu müddət ərzində 1991-1992-ci illərdə Moskva Dövlət Texnoloji Universitetində elmi stajor kimi təkmilləşdirmə kursunu bitirib. 1992-1995-ci illərdə Moskva Dövlət Texnoloji Universitetində aspiranturada əyani təhsil alıb. Namizədlik dissertasiyasını 1996-cı ildə Moskva Dövlət Texnoloji Universitetində müdafiə edib. 1997-2005-ci illərdə Daxili İşlər Nazirliyinin və 2005-2012-ci illərdə Fövqəladə Hallar Nazirliyinin nəzdində baş müəllim, silsilə rəisi, Elmi-Təcrübə və İstehsalat Mərkəzinin rəis müavini və 2012-2019-cu illərdə Fövqəladə Hallar Nazirliyinin Akademiyasında Tədris şöbəsinin rəisi vəzifələrində çalışıb. Fövqəladə Hallar Nazirliyinin Elmi-texniki şurasının üzvi olmuşdur. Ehtiyatda olan polkovnikdir. Əmək fəaliyyəti dövründə AzTU-nun Maşınqayırma texnologiyası kafedrasında ixtisas fənlərindən və digər təhsil müəssisələrində isə bir sıra baza mühəndislik fənlərindən dərs deyib. 2016-cı ildə dosent elmi adını alıb. AzTU-nun Maşınqayırma texnologiyası kafedrasında dosent vəzifəsində çalışır. 24 yanvar 2020-ci il tarixində AzTU-nun Magistratura və doktorantura şöbəsinin müdiri vəzifəsinə təyin olunub. 21 yanvar 2022-ci il tarixində AzTU-nun Maşınqayırma və robototexnika fakültəsinin dekanı seçilib və hazırda həmin fakültəyə rəhbərlik edir. Bir sıra ixtisaslar üzrə təhsil proqramlarının, 38 elmi və tədris-metodiki işlərin, 1 dərsliyin, 2 metodik vəsaitin, 9 fənn proqramının, 27 elmi məqalənin, 1 səmərələşdirici təklifin müəllifidir və 1 layihəyə rəhbərlik etmişdir. Xarici ölkələrdə (Rusiya, Türkiyə, Belarus, Amerika) elmi məqalələri çap edilmişdir. Təhsil aldığı, xidmət etdiyi və elmi-pedaqoji fəaliyyət göstərdiyi dövrlərdə fəxri fərmanlar, döş nişanı və medallarla, o cümlədən 2018-ci ildə Azərbaycan Respublikasının Prezidenti tərəfindən “Hərbi xidmətlərə görə” medalı ilə təltif olunub. Ailəlidir, iki övladı var. |
