19-20 sentyabr 2024-cü il tarixlərində Bakıda “Azərbaycan Respublikasının Ədliyyə Nazirliyi ilə Türkiyə Respublikasının Daxili İşlər Nazirliyi arasında məhkəmə ekspertizası sahəsində əməkdaşlıq haqqında Saziş” çərçivəsində 2024-cü il üzrə fəaliyyət planında nəzərdə tutulan “Polipropilen və yüksək sıxlıqlı polietilendən istehsal olunan məhsulların fiziki xassələrinin tədqiqinin xüsusiyyətləri” mövzusunda təlim təşkil olunub.

Təlimdə polimer materialların və onlardan hazırlanan məmulatların tədqiqatının nəzəri və metodiki əsasları, fiziki və mexaniki xüsusiyyətlərinin tədqiqat üsulları, fiziki və kimyəvi xassələrini müəyyən etmək üçün aparılan laboratoriya analizləri, analitik və spektral tədqiqat metodları izah edilib və təcrübi məşğələlər keçirilib.

Təlim Azərbaycan Texniki Universitetinin Mühəndis fizikası və elektronika kafedrasının müdiri, fizika elmləri doktoru, professor Mətanət Mehrabova, Elm və Təhsil Nazirliyi Radiasiya Problemləri İnstitutunun baş elmi işçisi, kimya elmləri üzrə fəlsəfə doktoru Rəna Xankişiyeva tərəfindən tədris edilib, təcrübi məşğələlərə Universitetin digər alim və mütəxəssisləri cəlb olunub.

Təlimdə Ədliyyə Nazirliyinin Məhkəmə Ekspertizası Mərkəzinin, Naxçıvan Muxtar Respublikası Ədliyyə Nazirliyinin Məhkəmə Ekspertizası Mərkəzinin, Türkiyə Respublikası Daxili İşlər Nazirliyi Jandarma Baş Komandanlığı Cinayət şöbəsi və Təhlükəsizlik Baş Komandanlığı Cinayət şöbəsinin kimyaçı ekspertləri iştirak edib, sonda iştirakçılara sertifikatlar verilib.

Qonaqlar həmçinin Məhkəmə Ekspertizası Mərkəzinin laboratoriyalarında iş prosesi və tədqiqatda istifadə olunan cihaz və avadanlıqlarla tanış olub, qarşılıqlı maraq doğuran məsələlər barədə fikir mübadiləsi aparıblar.