Azərbaycan Texniki Universitetinin (AzTU) Nəqliyyat və loqistika fakültəsinin baş müəllimi Sahib Əsgərov Bakı şəhərinin lisey və məktəblərində “Uşaqlar üçün yol hərəkətinin təhlükəsizliyi” layihəsi çərçivəsində təlim keçib. Layihənin əsas məqsədi məktəblilərə yol hərəkəti qaydalarını və yol hərəkətində təhlükəsiz davranış vərdişlərini öyrətmək, həmçinin onların yol hərəkəti mədəniyyətini formalaşdırmaq olub.  Təlimlər zamanı uşaqlara piyada keçidlərindən düzgün istifadə, nəqliyyat vasitələrinə yaxınlaşan zaman vacib qaydalar, siqnal işıqlarının mənaları və digər mövzular izah olunub.

Azərbaycan Texniki Universitetinin (AzTU) Maşınqayırma texnologiyası kafedrasının müdiri professor Nizami Yusubov və kafed­ranın dosenti Ərəstun Məmmədov Almaniyanın Bran­den­burq Texniki Universiteti Cottbus-Senftenberg-də (BTU C-S) “Network for energy supply and energy efficiency (NESEFF): Enerji təchizatı və enerji səmərəliliyi şəbəkəsinin 10 illiyi” adlı beynəlxalq konfransda iştirak edib. Konfrans çərçivəsində NESEFF-in fəal əməkdaşları fəxri fərmanla təltif olunub. Təltif olunanlar arasında professor Nizami Yusubov və dosent Ərəstun Məmmədov da olub. Konfransdan sonra iştirakçılar Almaniya Hava və Kosmik Araşdırmalar Mərkəzinə səfər edib, burada sınaq istilik nasosu ilə tanış olublar. Qeyd edək ki, beynəlxalq NESEFF şəbəkəsi 2015-ci ilin sentyabrında AzTU, BTU C-S, Milli Tədqiqat Universiteti – Moskva Energetika İnstitutu, Uk­ray­na Milli Dağ-Mədən Universitetlərinin iştirakı ilə Bakıda keçirilən “Enerji Təchizatı və Enerji Səmərəliliyi” üzrə beynəlxalq seminarda yaradılıb. Hazırda Azərbaycan, Almaniya, Çexiya, Polşa və Ukraynanın ümumilikdə 20-dən çox ali məktəb və tədqiqat mərkəzləri şəbəkə daxilində fəaliyyət göstərirlər.

Azərbaycan Texniki Universitetinin (AzTU) Maşınqayırma texnologiyası kafedrasının müdiri professor Nizami Yusubov və kafed­ranın dosenti Ərəstun Məmmədov  Azərbaycan Elm Fon­du­nun maliyyələşdirdiyi qrant layihəsi (Qrant No. AEF-MGC-2024-2(50)-16/01/1-M-01) çərçivəsində Almaniyada səfərdə olub.   Məqsəd birgə elmi təd­qiqatların daha da dərinləşdiril­mə­si, əldə olunan nə­ticə­lərin müzakirəsi, yerində prak­ti­ki təcrü­bələrin aparılması və aparılan tədqiqatların yüksək reytinqli elmi jurnallarda birgə dərc olunması məsələlərini müzakirə etmək olub. Layihə rəhbəri professor Nizami Yusubov və layihə icraçısı dosent Ərəstun Məmmədov Almaniyanın Bran­den­burq Texniki Univer­si­teti Cottbus-Senftenbergin (BTU C-S) Maşın­qayır­ma, elektrik və enerji sitemləri fakültəsinin Metalkəsən dəzgahlar kafedrasında elmi ezamiyyə çərçivəsində sözügedən qrant layihəsi üzrə işlərin müzakirəsi məqsədilə BTU C-S kafedra müdiri professor Sylvio Simon və əməkdaşlarla görüş keçiriblər. Səfər çərçivəsində AzTU nümayəndələrinin “Deutsche Bahn” Nəqliyyat Vasitələrinin Təmiri MMC-yə ekskursiyası təşkil edilib, görüşlərdə sənaye müəssisələri ilə elmi əməkdaşlıq və tex­no­loji istiqamət­lər müəyyənləşdirilib. Bundan başqa, Metalkəsən dəzgahlar laboratori­ya­sın­da bəzi ilkin eksperimental tədqiqatlar da aparılıb. Qeyd edək ki, qrant layihəsi çərçivəsində BTU-da hazırda tədqiqatlar uğurla davam etdirilir.  Bu əməkdaşlıq qrant layihəsinin beynəlxalq reytin­qi­nin artırılmasına lazımi töhfə verməkdədir. Yerinə yetirilən tədqiqatların yüksək reytinqli elmi jurnallarda birgə dərc olunması və gələcəkdə birgə doktorantların hazırlanması planlaşdırılır.

Azərbaycan Texniki Universitetinin (AzTU) Maşınqayırma texnologiyası kafedrasının müəllimi İlqar Abbasov Brandenburg Texniki Universiteti Cottbus-Senftenberg (BTU C-S)-də "Torna emalında enerji səmərəliliyinin artırılması metodikasının işlənməsi" mövzusunda dissertasiya işini uğurla müdafiə edərək Alman Doktor –Mühəndis (Dr.-Ing.) akademik elmi dərəcəsi alıb. Qeyd edək ki, o, Maşınqayırma texnoilogiyası kafedrasının doktorantı kimi (elmi rəhbər, prof. Nizami Yusubov) 2019-cu ildə Alman Akademik Mübadilə Xidmətinin (DAAD) 4 illik doktorantura təqaüdünü qazanaraq, 2020-ci ilin oktyabr ayından BTU C-S-in Maşınqayırma, elektrik və enerji sistemləri fakültəsində doktorantura təhsilinə baş­la­yıb. Burada onun elmi rəhbəri Metalkəsən dəzgahlar kafedrasının müdiri, AzTU-nun fəxri doktoru, professor Sylvio Simon olub. Tədqiqatın eksperimental mərhələləri yalnız Brandenburg Texniki Universitetində deyil, həmçinin Polşanın Jelenia Gora və Vroslav Texnologiya universitetlərində də həyata keçirilib və yüksək elmi nəticələr əldə olunub. 2024-cü ilin oktyabr ayında DAAD təqaüdü başa çatdıqdan sonra İlqar Abbasov həmin fakültədə elmi işçi və müəllim kimi fəaliyyətə başlayıb. Bu qərar BTU C-S-nin onun elmi potensialına və peşəkarlığına verdiyi yüksək qiymətin bariz göstəricisini nümayiuş etdirib və eyni zamanda universitetlərimiz arasında beynəlxalq əməkdaşlığın daha da möhkəmlənməsinə mühüm töhfə verib. Maşınqayırma texnologiyası kafedrasının müdiri, professor Nizami Yusubov BTU C-S-də yaradılan Müdafiə Şurasının üzvü və əsas rəyçilərdən biri kimi müdafiə prosesində, eləcə də kafedranın dosentı Ərəstun Məmmədov Müdafiə Şurasının iclasında qo­naq qismin­də iştirak ediblər.   İlqar Abbasovun müdafiə etməsi ilə əlaqədar AzTU-nun rektoru Vilayət Vəli­yev BTU C-S-in prezidenti professor Gesine Grandeyə tə­şək­kür məktubu göndərib. Rektorun məktubu dis­ser­ta­si­yanın müdafiəsindən sonra Gesi­ne Gran­de­yə təqdim edilib.

4–6 noyabr tarixlərində Cənubi Koreyanın Seul şəhərində “Quacquarelli Symonds” (QS) beynəlxalq reytinq agentliyinin təşkilatçılığı və Koreya Universitetinin ev sahibliyi ilə “QS Ali Təhsil: Asiya və Sakit Okean” sammiti keçirilib. Tədbirdə Avstraliya, Qazaxıstan, Vyetnam, Filippin, İndoneziya, Malayziya, Tailand, Misir və digər ölkələrin ali təhsil müəssisələri ilə yanaşı, Azərbaycan universitetləri də iştirak ediblər. Azərbaycan Texniki Universitetini (AzTU) sammitdə elm və innovasiyalar üzrə prorektor Sübhan Namazov, Tədqiqat və inkişaf departamentinin direktoru Bəxtiyar Bədəlov və Keyfiyyətin təminatı şöbəsinin müdiri Pərvanə Mövsümova təmsil ediblər. Sammit çərçivəsində “QS Stars” beynəlxalq qiymətləndirmə sistemindən uğurla keçən universitetlərin təltifolunma mərasimi keçirilib. AzTU bu qiymətləndirmədə 5 ulduzla təltif olunub. Tədbir çərçivəsində AzTU nümayəndə heyəti dünyanın müxtəlif ölkələrindən olan universitetlərin rəhbərləri və beynəlxalq reytinq qurumlarının təmsilçiləri ilə görüşlər keçirib, təcrübə mübadiləsi aparıb və gələcək əməkdaşlıq imkanlarını müzakirə ediblər. Səfər çərçivəsində AzTU nümayəndələri Azərbaycanın Koreyadakı səfirliyinin Zəfər Günü münasibətilə təşkil etdiyi rəsmi qəbulda iştirak ediblər.

Dövlət qulluğunun təbliği və təşviqi məqsədilə Azərbaycan Texniki Universitetinin (AZTU) 4-cü kurs tələbələri üçün məlumatlandırıcı sessiya təşkil olunub. Tədbirdə AzTU-nun Kommunikasiya şöbəsinin əməkdaşı Mehti Namazov çıxış edərək idarəetmə mədəniyyətinin inkişafında, şəffaf və peşəkar kadrların formalaşmasında dövlət qulluğunun əhəmiyyətini qeyd edib. O, tələbələrin bu cür mövzularda maarifləndirilməsinin vacibliyini vurğulayıb. Dövlət qulluğu üzrə təlimçi Samir Dəmirov gəncləri dövlət qulluğuna qəbul qaydaları, kateqoriya və təsnifatlar, vakant vəzifələr üzrə tələb olunan sertifikatlar və digər məsələlər barədə məlumatlandırıb. Sonda tələbələrin sualları cavablandırılıb.

Azərbaycan Texniki Universitetinin (AzTU) İnkubasiya Mərkəzində “Startap Günləri” ilə bağlı  infosessiya keçirilib. Tədbirin məqsədi tələbələrə universitetdə keçiriləcək “Startap Günləri” barədə ətraflı məlumat vermək, onları bu prosesə hazırlamaq və startap ekosistemi ilə yaxından tanış etmək olub. İnfosessiyada İnformasiya və telekommunikasiya texnologiyaları fakültəsinin tələbələri iştirak edib. Rektorun rəqəmsal məsələlər üzrə məsləhətçisi Osman Gündüz bildirib ki, “Startap Günləri” layihəsi “Startap Azərbaycan” platformasının dəstəyilə keçiriləcək. O, “Startap Günləri”nin mahiyyəti, məqsədləri və tələbələr üçün yaradacağı imkanlar barədə danışıb,  universitetdə startap mədəniyyətinin formalaşmasının vacibliyini vurğulayıb, tələbələri bu layihədə fəal iştirak etməyə çağırıb.Daha sonra AzTU İnkubasiya Mərkəzinin koordinatoru Azad Musayev çıxış edərək yaxın günlərdə keçiriləcək “Startap Günləri” haqqında geniş məlumat təqdim edib. O, bu günlərdə tələbələri gözləyən mərhələlər, komandaların formalaşması, ideya mərhələsindən prototipin hazırlanmasına qədər olan proseslər barədə danışıb. Sonda iştirakçıların sualları cavablandırılıb.

Rumıniyanın Buxarest İqtisadiyyat Universitetinin Xarici dillərdə biznesin idarə edilməsi fakültəsinin dekan müavini, Mühasibat uçotu kafedrasının professoru Georgiana Oana Stănilă və həmin kafedranın müəllimi Razvan Hoinaru ikitərəfli əməkdaşlıq çərçivəsində mübadilə ilə Azərbaycan Texniki Universitetinin (AzTU) qonağı olub. AzTU-nun beynəlxalq əlaqələr üzrə prorektoru Fariz Məmmədov qonaqlara universitetin fəaliyyəti və görülən işlər barədə məlumat verib. İki universitet arasında əməkdaşlıq sahələrinin genişləndirilməsi istiqamətində müzakirələr aparılıb. Daha sonra qonaqlar AzTU-nun Sənaye iqtisadiyyatı və menecment fakültəsinin müəllim və tələbələri üçün “Dayanıqlı inkişaf məqsədləri ilə bağlı maliyyə hesabatlılığı” mövzusunda seminar keçirib.

Heydər Əliyev Fondunun “Talassemiyasız həyat naminə” proqramı çərçivəsində Səhiyyə Nazirliyi Respublika Qan Bankı tərəfindən Azərbaycan Texniki Universitetində (AzTU) könüllü qanvermə aksiyası keçirilib. Aksiya talassemiya və digər qan xəstəliklərindən əziyyət çəkən insanlara yardım etmək, həmçinin cəmiyyətdə donor hərəkatının genişlənməsinə töhfə vermək məqsədilə təşkil olunub. “Konstitusiya və Suverenlik İli” çərçivəsində keçirilən aksiyada AzTU əməkdaşları iştirak edib.

Azərbaycan Texniki Universitetində (AzTU) Kommunikasiya şöbəsinin təşkilatçılığı ilə “Uşaq Hüquqları Aylığı” çərçivəsində maarifləndirici tədbir keçirilib. Kommunikasiya şöbəsinin əməkdaşı Mehti Namazov bildirib ki, AzTU hər zaman sosial mövzuları əhatə edən tədbirlərin təşkilinə də diqqət ayırır. O, uşaqların sağlam inkişafı, təhsil alması və zorakılıqdan kənar mühitdə böyüməsinin cəmiyyətin hər bir üzvü üçün vacib faktor olduğunu deyib. Hüquqşünas, mediator Mehri Rzayeva Azərbaycan Respublikasının uşaq hüquqları ilə bağlı qanunvericilik aktları, həmçinin BMT-nin Uşaq hüquqları haqqında Konvensiyasının əhəmiyyəti barədə danışıb. Sonda suallar cavablandırılıb.