Azərbaycan Texniki Universitetinin (AzTU) mühafizə xidmətində fəaliyyət göstərən “Kapital Security” QSC-nin əməkdaşları mükafatlandırılıb. Belə ki, AzTU rektoru Vilayət Vəliyev mühafizə xidmətinin kollektivini 31 Dekabr- Dünya Azərbaycanlılarının Həmrəyliyi Günü və Yeni il münasibətilə təbrik edib. Həmçinin onları il ərzində göstərdikləri səmərəli fəaliyyətə görə fəxri fərmanla təltif edib.  

Azərbaycan Texniki Universiteti (AzTU) ilə Xüsusi Rabitə və İnformasiya Təhlükəsizliyi Dövlət Xidməti (XRİTDX) arasında imzalanmış əməkdaşlıq Memorandumuna uyğun olaraq hər semestr AzTU tələbələri üçün silsilə ustad dərsləri təşkil olunur. Növbəti ustad dərsində “Rəqəmsal ekspertiza: kibertəhlükəsizlikdə və hüquqi proseslərdə etibarlı sübutların təmin edilməsi” mövzusu keçirilib. Çıxış zamanı rəqəmsal sübutların toplanması, qorunması və təhlili prosesləri, sübutların bütövlüyünün və dəyişməzliyinin təmin olunması, insidentlər zamanı rəqəmsal kriminalistika yanaşmalarının tətbiqi, həmçinin rəqəmsal artefaktların hüquqi qüvvəsinin saxlanılması üçün beynəlxalq standart və metodologiyalar iştirakçıların diqqətinə çatdırılıb. Eyni zamanda, kibertəhlükəsizlik insidentlərinin araşdırılmasında ekspertiza proseslərinin rolu və bu sahədə institusional potensialın gücləndirilməsinin əhəmiyyəti vurğulanıb. Ustad dərsində AzTU-nun Kibertəhlükəsizlik kafedrasının tələbələri və müəllim heyəti iştirak edib.

Rəqəmsal İnkişaf və Nəqliyyat Nazirliyi yanında Elektron Təhlükəsizlik Xidməti tərəfindən AzTU-nun İnformasiya texnologiyaları və telekommunikasiya fakültəsi tələbələri üçün “Süni intellekt: Məsuliyyətli və etik süni intellekt, süni intellekt sistemlərinin tətbiqi zamanı fərdi məlumatların mühafizəsi” mövzusunda təlim keçirilib. Elektron Təhlükəsizlik Xidmətinin rəhbəri Xəyalə Babayeva təlimin məqsədi, Azərbaycanda süni intellekt və məlumat mühafizəsi sahəsində görülən işlər, eləcə də gələcək mühəndis və proqramçıların innovasiyadakı rolu haqqında danışıb. Daha sonra Elektron Təhlükəsizlik Xidməti nümayəndələri Zeynəb Əliyeva və Rauf İbişov süni intellektə giriş, Süni İntellekt Akademiyası və təlim proqramları, ölkədə həyata keçirilən “AI” layihələri, həmçinin “deepfake” texnologiyaları və onların qarşısının alınması yolları barədə ətraflı məlumat verib. Tədbir interaktiv sual-cavab sessiyası ilə davam edib.

Azərbaycan Texniki Universitetində (AzTU) “Əmək bazarı üçün XXI əsr bacarıqları” mövzusunda təlim keçirilib. Əmək bazarının müasir tələblərinə uyğun bilik və bacarıqların formalaşdırılmasına həsr edilən təlim ICF standartlı karyera inkişaf koçu, TOT sertifikatlı təlimçi İlkana Əmirova tərəfindən aparılıb. Sessiya zamanı tələbələrə işəgötürənlər tərəfindən tələb olunan əsas bacarıqlar, karyera planlaması, şəxsi inkişaf, adaptasiya qabiliyyəti, effektiv kommunikasiya və kritik düşünmə mövzularında ətraflı məlumat verilib.İnteraktiv formatda keçirilən təlimdə iştirakçıları maraqlandıran suallar cavablandırılıb.

Xüsusi texnika və texnologiya fakültəsinin I kurs tələbələri Milli Azərbaycan Tarixi Muzeyinə ekskursiya ediblər.  Xüsusi texnika və texnologiya fakültəsinin Sosial məsələlər, ictimaiyyətlə əlaqələr və infrastruktur üzrə dekan müavini Amin Mamedov və Humanitar fənlər kafedrasının baş müəllimi Sonaxanım İmamovanın da iştirak etdiyi ekskursiyada tələbələrə Azərbaycan tarixinin ən qədim dövrlərindən indiyədək olan inkişaf mərhələləri barədə məlumat verilib. Muzeydə tələbələrə Azərbaycanın mühüm tarixi hadisələrini, dövlətçilik ənənələrini, mədəni irsi və milli dəyərlərini əks etdirən zəngin eksponatlar ətraflı şəkildə təqdim olunub. 

Azərbaycan Texniki Universitetində (AzTU) İnformasiya texnologiyaları və telekommunikasiya fakültəsinin tələbələri üçün “IT SkillSprint” rəqəmsal bacarıqlar üzrə beynəlxalq intensiv təhsil proqramı haqqında infosessiya keçirilib. Rəqəmsal İnkişaf və Nəqliyyat Nazirliyi, Elm və Təhsil Nazirliyi, İnnovasiya və Rəqəmdal İnkişaf Agentliti (İRİA), Elm və Ali Təhsil üzrə Dövlət Agentliyi (EATDA) və “Ironhack” qlobal tədris şirkətinin tərəfdaşlığı ilə təşkil olunan proqram tələbələrin müasir texnologiyalar üzrə bilik və bacarıqlarını daha da inkişaf etdirməyi hədəfləyir. İnfosessiyada çıxış edən İRİA-nın nümayəndəsi Leyla Zeynalova “IT SkillSprint” proqramına qeydiyyat prosesi, seçim turu, tədris prosesi haqqında geniş məlumat verib. Rəqəmsal İnkişaf və Nəqliyyat Nazirliyi nümayəndəsi İnarə Vəliyeva tələbələrə uğurlar arzu edib və proqramın əhəmiyyətindən danışıb. Tədbir zamanı İT sahəsinə dair əyləncəli viktorinalar keçiril, fərqlənən tələbələr mükafatlandırılıb.

Azərbaycan Texniki Universitetinin (AzTU) Nəqliyyat logistikası və hərəkətin təhlükəsizliyi kafedrasının baş müəllimi Çingiz Həşim Türkiyənin Ankara şəhərində 4-cü Beynəlxalq Yol Hərəkəti Təhlükəsizliyi Konqresində çıxış edib. Türkiyənin Polis Akademiyasının Trafik İnstitutunun təşkilatçılığı ilə keçirilən konfransda təqdimatlar “Yol hərəkəti mədəniyyəti və nəqliyyat təhlükəsizliyində innovativ həllər” mövzusuna həsr olub. Çingiz Həşim tədbirdə Nəqliyyat logistikası və hərəkətin təhlükəsizliyi kafedrasının müdiri dosent Razim Bayramovun, professor Şamil Heydərovun və özünün həmmüəllifi olduğu “Nəqliyyat təhlükəsizliyi üçün tətbiq olunan inteqrasiyalar. Ağıllı nəqliyyat sistemləri” mövzusunda məruzə ilə çıxış edib.

Azərbaycan Texniki Universitetinin (AzTU) Maşınqayırma və metallurgiya fakültəsinin proseslərin avtomatlaşdırılması mühəndisliyi ixtisası üzrə təhsil alan tələbəsi Sənan Mirzəyevin müəllifi olduğu “SupAutism” mobil tətbiqi Azərbaycan Gənclər Fondunun “Rəqəmsal” mövzulu qrant müsabiqəsinin qalibi olub. Mobil tətbiq autizmli uşaqların valideynlərinə psixoloji, pedaqoji və sosial dəstək göstərməyi hədəfləyir. Layihənn əsas məqsədi valideynlərin məlumat əldə etməsini asanlaşdırmaq, ilkin mərhələdə düzgün istiqamət göstərmək və cəmiyyətdə autizm barədə maariflənməni artırmaqdır. Mobil tətbiqdə “Autizm üzrə ilkin məlumatlandırıcı bölmə”, “Uşaq davranış testləri”, “Valideynlər üçün addım-addım təlimat və tövsiyələr”, “Autizmli uşaqların gündəlik həyatını asanlaşdıran praktik materiallar” adlı bölmələr var.

Özbəkistanın Daşkənd Dövlət Texniki Universitetinin Elektrik təchizatı kafedrasının müdiri professor İkramjan Rahmonov, Elektrik şəbəkələri, elektrik stansiyaları və elektroenergetik sistemlər kafedrasının müdiri professor Şerxan Lətibov, həmçinin Karakalpak Dövlət Universitetinin Elektroenergetika kafedrasının müdiri professor Kamal Reymov mübadilə proqramı çərçivəsində Azərbaycan Texniki Universitetinin (AzTU) qonağı olub. Səfər çərçivəsində Özbəkistan nümayəndələri ilə AzTU-nun tədris işləri üzrə prorektoru professor Nurəli Yusifbəyli və Energetika fakültəsinin dekanı professor Hüseynqulu Quliyev arasında görüş keçirilib. Görüş zamanı akademik və elmi fəaliyyət sahələrində qarşılıqlı təcrübə mübadiləsi, birgə tədqiqatların aparılması, kadr hazırlığı və təhsil proqramlarının inkişafı üzrə gələcək əməkdaşlığın prioritet istiqamətləri müzakirə olunub. Qonaq professorlar Energetika fakültəsinin tələbələri üçün elektroenergetikanın inkişaf perspektivləri mövzusunda mühazirə oxuyub.

Dekabrın 23-də Azərbaycan Texniki Universitetində (AzTU) “Konstitusiya və Suverenlik İli” və Azərbaycan Respublikası Müdafiə Sənayesi Nazirliyinin yaradılmasının 20 illik yubileyi münasibətilə “Suverenlik və Müdafiə Sənayesi: 20 ilin yolu” mövzusunda panel müzakirəsi təşkil edilib. Əvvəlcə Ulu Öndər Heydər Əliyevin və Azərbaycan Respublikasının suverenliyi və ərazi bütövlüyü uğrunda canlarını qurban vermiş qəhrəman Vətən övladlarının əziz xatirəsi bir dəqiqəlik sükutla yad olunub, dövlət himni səsləndirilib. Tədbirdə AzTU-nun rektoru Vilayət Vəliyev, Elm və Təhsil Nazirliyinin tabeliyində Təhsilin İnkişafı Fondunun İdarə Heyətinin sədri Nicat Məmmədli, müdafiə sənayesi nazirinin müşaviri Arif Babayev və Milli Məclisin deputatı Hikmət Babaoğlu çıxış ediblər. Natiqlər Azərbaycanın müstəqil dövlət kimi formalaşmasında Konstitusiyanın və suverenliyin əsas rolundan, Ulu Öndər Heydər Əliyevin müəyyən etdiyi milli dövlətçilik strategiyasının əhəmiyyətindən, eləcə də bu siyasi xəttin möhtərəm Prezident, Müzəffər Ali Baş Komandan cənab İlham Əliyev tərəfindən uğurla davam etdirilməsi nəticəsində ölkəmizin ərazi bütövlüyü və suverenliyinin tam bərpa olunmasından danışıblar. Müzakirələrdə son 20 il ərzində Azərbaycanın müdafiə sənayesinin keçdiyi inkişaf yoluna nəzər salınıb, bu strateji sektorun formalaşdırılması, istehsal və texnoloji imkanların genişləndirilməsi, innovativ və yüksək texnologiyalı hərbi məhsulların istehsalının təşkili istiqamətində görülən işlər haqqında məlumat verilib. Qeyd olunub ki, müdafiə sənayesinin inkişafı ölkənin müdafiə qabiliyyətinin və təhlükəsizliyinin təmin edilməsində mühüm rol oynamaqla yanaşı, iqtisadiyyatın şaxələndirilməsinə və elmi-texniki potensialın gücləndirilməsinə də əhəmiyyətli töhfə verir. Eyni zamanda, Müdafiə Sənayesi Nazirliyi ilə ali təhsil müəssisələri arasında əməkdaşlığın genişləndirilməsinin ixtisaslı kadr potensialının formalaşdırılması və elmi-tədqiqatların təşviqi baxımından mühüm əhəmiyyət daşıdığı vurğulanıb. Panel müzakirəsi çərçivəsində müdafiə sənayesində innovasiyaların tətbiqi, rəqəmsal texnologiyaların inteqrasiyası və gənc mütəxəssislərin bu sahəyə cəlb edilməsi məsələləri də müzakirə edilib. Tədbirin sonunda panel müzakirəsinin spikerlərinə, eləcə də Xüsusi texnika və texnologiya fakültəsinin fəaliyyətində fəal iştiraklarına görə Müdafiə Sənayesi Nazirliyinin və AzTU-nun bir qrup əməkdaşına, fakültənin tələbə və məzunlarına təşəkkür plaketləri və xatirə hədiyyələri təqdim olunub.