Mənzil-qərargahı Çin Xalq Respublikasının Pekin şəhərində yerləşən “GEİDCO” təşkilatının (Global Energy Interconnection Development and Cooperaton Organization – Energetika Sahəsində Qlobal Qarşılıqlı Əlaqələrin İnkişafı və Əməkdaşlığı Təşkilatı) Əməkdaşlıq departamentinin direktor müavini Xu Ming-in rəhbərlik etdiyi nümayəndə heyəti Azərbaycan Texniki Universitetinin (AzTU) qonağı olub. Qonaqlar AzTU- elm və innovasiyalar üzrə prorektoru professor Sübhan Namazov və universitetin nümayəndələri ilə görüşüb. Nümayəndə heyətini salamlayan Sübhan Namazov AzTU haqda məlumat verərək Çin Xalq Respublikası ilə Azərbaycan Respublikası arasında bütün sahələrdə olduğu kimi, tədris və tədqiqat sahəsində də əlaqələrin yüksələn xətlə inkişaf etdiyini bildirib. Xu Ming təmsil etdiyi təşkilat barədə ətraflı məlumat verərək təşkilatın məramının Birləşmiş Millətlər Təşkilatının Dayanıqlı İnkişaf Məqsədlərinin həyata keçirilməsinə töhfə verilməsi olduğunu vurğulayıb. O, təşkilatın məqsədinin, dövlət və özəl enerji şirkətləri, tədqiqat qurumları və ali təhsil müəssisələrini bir araya gətirməklə bütün dünyada dayanıqlı və yaşıl enerji təchizatının təmin edilməsini diqqətə çatdırıb. Təşkilatın nəzdində fəaliyyət göstərən Universitetlər Alyansı bu baxımdan xüsusi əhəmiyyət kəsb edir. Görüş zamanı GEİDCO ilə AzTU arasında elektroenergetika sahəsində birgə layihələr, elmi tədbirlər və mütəxəssis hazırlığının həyata keçirilməsi imkanları müzakirə olunub. Qeyd edək ki, 2016-cı təsis olunmuş GEİDCO təşkilatının 141 ölkədən 1300-dən çox üzvü varr. Təşkilatın missiyası ölkələrarası qlobal enerji qoşulmalarını təşviq etmək və elektrik enerjisinə tələbatın yaşıl enerji hesabına təmin edilməsinə nail olmaqdır.

Türkiyədə Tokat Gaziosmanpaşa Universiteti və Azərbaycan Texniki Universitetinin (AzTU) birgə təşkilatçılığı ilə II Beynəlxalq İqtisadi və İnzibati Araşdırmalar Konfransı keçirilib. Tokat Gaziosmanpaşa Universitetinin İqtisadiyyat və idarəetmə fakültəsi və AzTU-nun İqtisadiyyat və statistika kafedrasının birgə əməkdaşlığı çərçivəsində təşkil olunan konfransda iqtisadi və inzibati elmlərin müxtəlif sahələri üzrə müzakirələr aparılıb. Tədbirdə bank və maliyyə, əmək iqtisadiyyatı və sənaye münasibətləri, ekonometrika, iqtisadiyyat, statistika, biznesin idarə edilməsi, dövlət idarəçiliyi, maliyyə və beynəlxalq iqtisadi münasibətlər mövzularında təqdimatlar edilib. Konfransda AzTU-nu İqtisadiyyat və statistika kafedrasının dosentləri -  Enerji və Dayanıqlı İnkişaf İnstitutunun direktoru Natəvan Namazova və Ömürboyu Öyrənmə Məktəbinin direktoru Aynurə İsmayılova təmsil ediblər. 

Azərbaycan Texniki Universiteti (AzTU) və Cəfər Cabbarlının ev-muzeyinin birgə təşkilatçılığı ilə 18 May – Beynəlxalq Muzeylər Gününə həsr olunmuş “Muzeylər tariximizdir” adlı tədbiri keçirilib. Tədbir çərçivəsində həmçinin muzeyin səyyar sərgisi təşkil olunub. Tədbirdə AzTU-nun müəllim və tələbə heyəti, muzey və kitabxana işçiləri iştirak ediblər. Cəfər Cabbarlının ev-muzeyinin hazırladığı, dahi dramaturqun zəngin ədəbi irsini əks etdirən səyyar sərgidə ədibin həyat və yaradıcılığıının müxtəlif dövrlərini əks etdirən maraqlı materiallardan və zəngin foto-arxivdən istifadə olunub. Onun müxtəlif ədəbi janrlarda yaratdığı əsərlər haqqında, həmçinin mədəniyyətin müxtəlif sahələrindəki fəaliyyəti barədə geniş məlumatlar təqdim olunub. Sərgi materialları arasında Cəfər Cabbarlının uzun illər geniş oxucu kütləsindən gizli saxlanılan ədəbi nümunələri (“Ədirnə fəthi”,”Trablis müharibəsi”), eləcə də siyasi fəaliyyəti (1923-1927), məhbəs yaradıcılığı haqqında da bir sıra faktlar diqqətə çatdırılıb. Tədbirdə çıxış edən Cəfər Cabbarlının ev-muzeyinin direktoru, dahi dramaturqun nəvəsi Qəmər Seyfəddinqızı tələbələrə Cəfər Cabbarlının Azərbaycan ədəbiyyatı və mədəniyyətinin inkişafındakı böyük xidmətlərindən, onun Azərbaycan Xalq Cümhuriyyəti (1918-1920) quruculuğundakı fəal iştirakından, həbsxana yaradıcılığından bəhs edib. AzTU-nun Humanitar fənlər kafedrasının müdiri Həbib Mirzəyev yazıçının ədəbi yaradıcılıqla bərabər incəsənətin müxtəlif vacib sahələrində gördüyü işlərdən, ədibin həm də istedadlı tərcüməçi və kino xadimi kimi tanınmasından danışıb. AzTU tələbələri Sərxan Mikayıllı, Durna Həsənli və Canpolad Quliyev dramaturqun “Ana”, “Mən bir susmaz duyğuyam ki” və “Azərbaycan bayrağına” şeirlərini səsləndiriblər. AzTU-nun məzunu, gənc müğənni Fərhad Rəhimli ədibin sözlərinə yazılmış “Gərək günəş dağları aşıb sönməyəydi” və “Həyat söylə sən kiminsən” mahnılarını ifa edib. Tədbirdə böyük sənətkarın həyat və yaradıcılığından bəhs edən film nümayiş olunub.

Azərbaycan Texniki Universitetinin (AzTU) Enerji effektivliyi və yaşıl enerji texnologiyaları kafedrasının müdiri professor Vaqif Həsənov Özbəkistan beynəlxalq elmi-praktiki konfransda iştirak edib. Səmərqənd Memarlıq və İnşaat Universiteti və İ.Kərimov adına Daşkənd Dövlət Texniki Universitetinin birgə təşkilatçılığı ilə keçirilən konfransda Vaqif Həsənov “Memarlıq, mühəndislik, təhsil və ətraf mühitin mühafizəsində innovativ texnologiyalar” mövzusunda məruzə ilə çıxış edib.  Konfrans iştirakçıları tərəfindən maraqla qarşılanan məruzə ətrafında müzakirələr aparılıb. Səfər çərçivəsində AzTU-nun professoru İ.Kərimov adına Daşkənd Dövlət Texkiki Universiteti və Səmərqənd Memarlıq və İnşaat Universitetinin aidiyyəti kafedralarında olub, elmi-tədqiqat laboratoriyalarına baxıb. Həmçinin hər iki universitetin struktur bölmələrinin rəhbərləri ilə görüşlər zamanı gələcək əməkdaşlıq üçün konkret istiqamətlər müəyyən edilib. Görüşlər zamanı universitetlər arasında əməkdaşlığın inkişaf etdirilməsi, birgə layihələrin həyata keçirilməsi, tələbə və müəllim mübadiləsi, birgə elmi nəşrlər və beynəlxalq proqramlarda iştirakla bağlı fikir mübadiləsi də aparılıb. Səfər kafedralar üçün beynəlxalq elmi əlaqələrin gücləndirilməsi, mühəndislik sahəsində innovativ texnologiyaların tətbiqi üzrə təcrübə mübadiləsi baxımından böyük əhəmiyyət daşıyır.

Mayın 13-də Azərbaycan Respublikasının Prezidenti İlham Əliyev Bakı Ekspo Mərkəzində XXX Yubiley Azərbaycan Beynəlxalq Qida Sənayesi - “InterFood Azerbaijan” və XVIII Azərbaycan Beynəlxalq Kənd Təsərrüfatı - “Caspian Agro” sərgiləri ilə tanış olub. Artıq milli brendə çevrilmiş “InterFood Azerbaijan” və “Caspian Agro” sərgiləri kənd təsərrüfatı və qida sənayesi sahələrində Xəzər regionunun ən böyük sərgiləridir. Sərgilərin coğrafiyası dünyanın bir çox yerini əhatə etməklə, olduqca genişdir. Burada ABŞ, Çin, Qazaxıstan, Özbəkistan, Rusiya, Türkiyə və digər ölkələrin aparıcı kənd təsərrüfatı istehsalçıları məhsullarını nümayiş etdirirlər.  Sərgi çərçivəsində Prezident İlham Əliyev Azərbaycan Texniki Universitetinin (AzTU) stendi ilə tanış olub. AzTU-nun İnformasiya texnologiyaları və telekommunikasiya fakültəsinin 3-cü kurs tələbəsi Selcan Kərimli “Nutlab” layihəsi haqqında Prezident İlham Əliyevə məlumat verib. Bildirib ki, layihə "AREA Azerbaijan” MMC ilə AzTU-nun birgə əməkdaşlığı çərçivəsində ərsəyə gəlib. Azərbaycanda kənd təsərrüfatı aqreqatlarının inkişafına təkan verən və "Made in Azerbaijan" brendi altında fəaliyyət göstərən, dövlətin subsidiya dəstəyi olan qurğu 15 at gücü və dizel mühərriki ilə işləyir. Fındıqçılığın inkişaf etdirilməsi üçün nəzərdə tutulan qurğunun yanlız fındıq toplamaq yox, həmçinin ot biçimi və siloslanması, kartof hasilatı və yer bellənməsi kimi funksionallığı da mövcuddur. Qeyd olunub ki, qurğunun emal prosesi AzTU-nun laboratoriyalarında daha da təkmilləşdiriləcək.

Bakı Ekspo Mərkəzində XXX Yubiley Azərbaycan Beynəlxalq Qida Sənayesi - “InterFood Azerbaijan” və XVIII Azərbaycan Beynəlxalq Kənd Təsərrüfatı - “Caspian Agro” sərgilərində Azərbaycan Texniki Universitetinin (AzTU) tələbələri startapları ilə təmsil olunur. Rektor Vilayət Vəliyev AzTU-nun stendini ziyarət edib. Tələbələrin startapları ilə maraqlanan rektor onlara uğurlar arzulayıb.  

Azərbaycan Texniki Universitetinin (AzTU) Mühəndis riyaziyyatı və süni intellekt kafedrasının təşkilatçılığı ilə Big Data üzrə dünyanın ən böyük şirkətlərindən olan “Databricks” şirkətinin baş proqram təminatı mühəndisi Məhəmməd Vəliyev AzTU tələbələrinə "Apache Spark" proqram təminatı haqqında seminar keçib. Kompüter elmləri, kompüter mühəndisliyi, informasiya təhlükəsizliyi ixtisasları üzrə təhsil alan tələbələrin (bakalavr, magistr, doktorant) iştirak etdiyi seminarda "Apache Spark" proqramının daxili komponentlerinin (Execution model, stages, tasks) işləmə texnologiyası, həmçinin müxtəlif problemlərin həllində (audio, video faylların analizində) istifadə üsulları barədə ətraflı məlumat verilib. Bundan başqa, böyük həcmli məlumatları bulud texnologiyasında (cloud storage, məsələn Amazon S3-də) “Delta Lake” formatında yaddaşda saxlamaq, “Delta Lake”in daxili fayl formatının işləmə prinsipi və digər formatlarla (Apache Iceberg) müqayisəsi izah edilib.

Azərbaycan Texniki Universitetinin (AzTU) 75 illik yubiley tədbirləri çərçivəsində universitetin təşəbbüsü və təşkilatçılığı, Türkiyə-Azərbaycan Universitetinin (TAU), Kiçik və Orta Biznesin İnkişafı Agentliyinin (KOBİA), Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının (ASK) və “Caspian Energy Club”un tərəfdaşlığı ilə “Universitet-sənaye əməkdaşlığı, istiqamətlər, nümunələr və süni intellekt” mövzusunda beynəlxalq forum keçirilib. Məqsəd universitet və sənaye arasında əməkdaşlıq modellərinin müzakirəsi, qabaqcıl beynəlxalq təcrübənin paylaşılması və yeni texnologiyaların, xüsusilə süni intellektin istehsalat mühitinə inteqrasiyası prosesində ali təhsil müəssisələrinin artan rolunun dəyərləndirilməsidir. Tədbiri giriş sözü ilə açan və qonaqları salamlayan AzTU-nun rektoru Vilayət Vəliyev universitet-sənaye əlaqələrinin dayanıqlı modeli və təcrübəyə əsaslanan birgə fəaliyyətin qurulmasının əhəmiyyətindən bəhs edib. Rektor AzTU-nun KOBİA ilə birgə ərsəyə gətirdiyi və uğurla fəaliyyət göstərən KOB Model Müəssisəsinin universitet-sənaye əməkdaşlığı üçün böyük töhfəsindən, bu cür təşəbbüslərin davamlı olmasının vacibliyindən danışıb. KOBİA-nın İdarə Heyətinin sədri Orxan Məmmədov mikro və kiçik sahibkarlıq fəaliyyətlərində ali təhsil müəssisələrinin iştirakı, gənc sahibkarların formalaşmasındakı rolundan bəhs edib. Bildirib ki, universitet-sənaye əməkdaşlığının effektivliyi üçün çağdaş çağırışları düzgün anlamaq və qəbul etmək, elmi-tədqiqat istiqamətlərini bazarın tələblərinə görə qurmaq, təcrübə proqramları, peşəkar kadr hazırlığı və maliyyə resurslarına çıxış vacibdir. Xəzər Universitetinin təsisçisi Hamlet İsaxanlı bildirib ki, çağdaş zamanda universitet-sənaye əməkdaşlığını qurmaq asan deyil. Yalnız elmi-tədqiqatlara önəm verib vəsaitlər ayıran araşdırma universitetləri bu cür yanaşmanı gerçəkləşdirə bilərlər. O, dünyanın ən nüfuzlu universitetlərinin iş prinsipini universitet-sənaye-süni intellekt üzrə qurduğunu və daha sonra sənayeyə yön verən və yeniliklər gətirən, çağdaş bazarın tələbləri ilə uyğunlaşan lider magistr və doktorlar yetişdirdiyini bildirib. “Caspian Energy Club”ın sədri və qrupun baş icraçı direktoru Telman Əliyev istehsalatda süni intellektin tətbiqi və bu sahədə ali təhsilin cavabdehliyindən bəhs edərək bildirib ki, çağdaş universitetlər təhsildən istehsala qədər süni intellektin təklif etdiyi imkanlardan yararlanmalı və eyni zamanda təhlükəsizlik məsələləri də paralel olaraq prioritet olmalıdır. Sahibkarlar (İşəgötürənlər) Təşkilatları Milli Konfederasiyasının prezidentinin baş məsləhətçisi Fərid Vəlizadə universitet-sənaye-dövlət üçbucağında əməkdaşlığın təşkilati və institusional mexanizmləri haqqında bölüşərək qeyd edib ki, həm universitet nümayəndələri, həm dövlət qurumlarının əməkdaşları, həm də sənaye təmsilçiləri birgə çalışaraq effektiv iş ortaya qoymalıdır. Daha sonra Türkiyə-Azərbaycan Universitetinin (TAU) prorektoru professor Mehmet Şimşir, TUBİTAK-ın sədr müavini professor Mesut Güner və İzmir Yüksək Texnologiya İnstitunun professoru Mustafa Güdən, “Azəralüminium” MMC-nin Gəncə İstehsalat Kompleksinin direktroru Cəmil Səfərov, Azərbaycan Milli Aviasiya Akademiyasının birinci prorektoru professor Ədalət Səmədov, Müdafiə Sənayesi Nazirliyinin şöbə müdiri Məmmədsaleh Əliyev, “Aselsan-Bakü” şirkətinin direktoru Özgür Kürüm, AzTU Texnoloji Transfer Ofisinin direktoru Yadullah Babayev universitetlərin texnologiya transferi və innovasiya mərkəzləri vasitəsilə sənayeyə elmi biliklər ötürməsi yolları, startap ekosistemində universitet-sənaye əlaqələrinin möhkəmləndirilməsi və yeni təşəbbüslərə dəstək mühiti, beynəlxalq texnologiya transferi ofislərinin təcrübələri, onların sənayeyə inteqrasiyada rolu, eləcə də müdafiə və aviasiya sənayesində ixtisaslı kadr hazırlığı və elmi-texniki təcrübənin birgə inkişafı kimi istiqamətlər haqqında ətraflı təqdimatlar ediblər. Tədbirdə 100-dən artıq sənaye nümayəndəsi və müxtəlif ölkələrdən akademik və texnoloji qurumların təmsilçiləri iştirak edib.

Yeni Azərbaycan Partiyası Nərimanov Rayon Təşkilatı və “EMEDIA GROUP” Media Təşkilatının birgə təşkilatçılığı ilə Azərbaycan xalqının Ümummilli Lideri Heydər Əliyevin əziz xatirəsinə və anadan olmasının 102-ci ildönümünə həsr olunmuş "Gələcəyin səmasında Azərbaycan imzası" tədbiri keçirilib. Tədbirdə dövlət nümayəndələri, Milli Məclisin deputatları, qeyri-hökumət təşkilatlarının rəhbərləri, media nümayəndələri, ictimai-siyasi xadimlər, Azərbaycan Texniki Universitetinin (AzTU) rəhbər heyəti, tələbələr və digər qonaqlar iştirak ediblər. Tədbir AzTU tələbələri tərəfindən hazırlanmış “M.AERO H10” adlı innovativ dron layihəsinin təqdimatı ilə yadda qalıb. Əvvəlcə tədbir iştirakçıları foyedə Ümummilli Lider Heydər Əliyevin büstü önünə gül dəstələri düzüb, xatirəsinə ehtiramını ifadə ediblər. Tədbirin açılışında Ulu Öndərin, ərazi bütövlüyümüz və suverenliyimiz naminə canlarından keçən qəhrəmanların əziz xatirəsi bir dəqiqəlik sükutla yad edilib və Dövlət Himni səsləndirilib. Sonra dronun əsas texniki xüsusiyyətləri barədə ətraflı məlumat verilib. Bildirilib ki, tam avtoritar rejimdə fəaliyyət göstərə bilən dron kəşfiyyat təyinatlı kamera sistemi, kamikadze funksiyası, yüksək manevr qabiliyyəti və amortizatorlu təkərlərə malikdir. Aerodinamik quruluşu ilə sanki küləklərlə danışa bilən səssiz lakin iradəli bir varlıq kimi havada süzür. Dronun bütün proqram təminatı - süni intellektdən idarəetməyə qədər - tələbələrin öz intellekt məhsuludur. Qeyd olunub ki, layihə Ulu Öndər Heydər Əliyevin gənclərə olan diqqət və qayğısının, onun uzaqgörən siyasətinin bariz nəticəsidir. “H10” adının “Heydər Əliyev 10” kimi seçilməsi də təsadüfi deyil – bu, tələbələrin Ulu Öndərə olan dərin sevgisi və ehtiramının rəmzidir. Onlar bu layihə vasitəsilə yalnız texnoloji yenilik yaratmayıb, Ümummilli Lider Heydər Əliyevin gənclərə aşıladığı siyasəti yaşadaraq, onun ideyalarını real nəticələrə çeviriblər. Layihədə əməyi keçən komanda üzvləri səhnəyə dəvət olunaraq ictimaiyyətə təqdim ediliblər: Layihə rəhbəri Rəşvin Şirəlizadə, mühəndis Anar Məmmədov, mexanik Adil Orucov, elektrik və elektronika mütəxəssisi İsmayıl Rəhimli, proqramçı Elmir Nəbiyev. 44 günlük haqq savaşımızda qazanılan şanlı Qələbədən ilhamlandıqlarını bildirən gənclər Vətən müharibəsində əldə edilən Zəfərdə qardaş ölkə Türkiyənin istehsal etdiyi pilotsuz uçuş aparatlarının rolunun böyük olduğunu xatırladıblar. Bildirilib ki, müasir texnologiyaların tətbiqinin gətirdiyi üstünlükləri nəzərə alaraq iki ay əvvəl layihənin icrasına başlanılıb. Hazırladıqları dron haqqında danışan gənclər qeyd ediblər ki, kameraya xüsusi yazılmış proqramlar sayəsində çəkilişlər daha dəqiq və funksional şəkildə həyata keçirilir. Havadakı sabitliyi və uçuş dəqiqliyi özəl alqoritmlərlə tənzimlənir. Hərəkətləri zərif, amma qətiyyətlidir. Sonra çıxış edən YAP Nərimanov rayon təşkilatının sədri Elçin Quliyev, Əsir və itkin düşmüş, girov götürülmüş vətəndaşlarla əlaqədar Dövlət Komissiyası işçi qrupunun rəhbərinin müavini Eldar Səmədov, müdafiə sənayesi nazirinin müşaviri Arif Babayev, Milli Məclisin deputatları – Jalə Əliyeva, Könül Nurullayeva, Aydın Mirzəzadə, Günay Ağamalı, Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova, Medianın İnkişafı Agentliyinin İcraçı direktorun müavini Natiq Məmmədli, Yeni Azərbaycan Partiyası Yasamal rayon təşkilatının sədri Bəxtiyar Nəbiyev, AzTU-nun prorektoru Rəşad Əliyev, “EMEDIA GROUP” Media Təşkilatının sədri Elşən Əliyev və başqaları Ulu Öndər Heydər Əliyevin əsasını qoyduğu dövlətçilik və gənclər siyasətinin bu gün onun layiqli davamçısı Müzəffər Ali Baş Komandan Prezident İlham Əliyev tərəfindən uğurla davam etdirildiyini bildiriblər. Elə həmin siyasətin nəticəsidir ki, 44 günlük Vətən müharibəsi zamanı ölkə başçısının bir çağırışı ilə minlərlə gənc könüllü şəkildə cəbhəyə axışaraq Vətən uğrunda savaşa atıldı. Bu həm birliyin, həm liderə inamın, həm də vətənpərvərliyin ən ali nümunəsi idi. Dron və PUA-ların İkinci Qarabağ müharibəsi zamanı hərbi əməliyyatların aparılmasında, Silahlı Qüvvələrin hücumuna dəstək verilməsində, yeni mövqelərin əldə olunmasında, həmçinin itkilərin minimuma endirilməsində Azərbaycana çox kömək etdiyini qeyd edən çıxışçılar gənclərin ərsəyə gətirdiyi texnologiyanı və onların peşəkarlığını yüksək dəyərləndirib, onun təkmilləşdirilməsi və yeni texnologiyaların hazırlanması istiqamətində təkliflərini verib, onların daha böyük uğurlar qazanacaqlarına əminliklərini ifadə ediblər. Sonda komanda üzvləri fəxri fərmanlarla təltif olunublar.

Azərbaycan Texniki Universitetində (AzTU) nüfuzlu “Springer Nature” beynəlxalq elmi nəşriyyatının vitse-prezidenti Aliaksandr Birokou tərəfindən seminar təşkil olunub. “Springer Nature” ilə beynəlxalq nəşr imkanları: Azərbaycan üçün perspektivlər” mövzusunda keçirilən seminarda AzTU-nun akademik heyəti fəal iştirak edib, iştirakçılar elmi məqalələrin beynəlxalq jurnallarda dərc olunması, açıq giriş (Open Access) modelləri, konfrans materiallarının nəşri və “Springer Nature” tərəfindən təqdim olunan digər nəşr imkanları haqqında ətraflı məlumat əldə ediblər. Seminar zamanı Birokou “Springer Nature” beynəlxalq elmi nəşriyyatı və onun iş prinsipləri haqqında məlumat verib. Daha sonra qonaq Azərbaycan alimlərinin beynəlxalq elmi platformalarda təmsil edilməsinin artırılması yolları və regiona xas tədqiqat mövzuları üzrə nəşr strategiyaları barədə fikir mübadiləsi aparıb. O bildirib ki, Azərbaycandan bir çox universitetlərin nəşrləri onların bazasında yer alır, AzTU isə bu bazaya 474 nəşrlə daxil olub. Azərbaycandan ən çox müraciət edilmiş tədqiqat mövzuları əsasən fizika, kimya, tətbiqi riyaziyyat, informatika və kompüter elmləri, mühəndislik və s. kimi sahələrdən seçilib. Seminarın sonunda AzTU-nun professor-müəllim heyətinin sualları cavablandırılıb.