Almaniyanın nüfuzlu Axen Reyn-Vestfaliya Texniki Universitetinin (RWTH Aachen – Axen Texniki Universiteti) Tekstil texnologiyaları bölməsinin rəhbəri professor Tomas Qris və Axen Texniki Universitetinin nəzdindəki İTA Akademiyasının Türkiyə üzrə regional nümayəndəsi Esra Yuksel Yılmaz Azərbaycan Texniki Universitetinin (AzTU) qonağı olub. Görüşdə həmçinin “Synergia Academy” şirkətinin icraçı direktoru Rəna Əfəndiyeva və şirkətin təlim üzrə baş məsləhətçisi Aytən Cəbrayılova da iştirak edib. Qonaqlar AzTU-nun rektoru professor Vilayət Vəliyev və universitetin nümayəndələri ilə görüşüb. Rektor Vilayət Vəliyev AzTU ilə Almaniya universitetləri arasında uzunmüddətli tarixi əlaqələrin olduğunu bildirib. Tekstil və ümumilikdə materiallar texnologiyaları, habelə sənaye proseslərinin avtomatlaşdırılması və robototexnika istiqamətində Axen Texniki Universitetinin fəaliyyəti barədə məlumat verən professor Qris müasir dövrdə sənayenin bütün sahələrində yeni növ materiallara və proseslərin avtomatlaşdırılmasına tələbatın getdikcə artdığını diqqətə çatdırıb. Görüş zamanı Axen Texniki Universiteti ilə AzTU arasında professor-müəllim və tələbə mübadiləsi, mexatronika, materialşünaslıq və yaşıl enerji texnologiyaları sahəsində birgə tədqiqatlar və magistratura səviyyəsində müvafiq ixtisaslar üzrə ikili diplom proqramlarının həyata keçirilməsi imkanları müzakirə olunub.

Azərbaycan Texniki Universitetində (AzTU) "Əmək Bazarına Hazırlıq İndeksi" pilot layihəsi çərçivəsində Dövlət Məşğulluq Agentliyinin İdarə Heyəti sədrinin müavini Hasil Abbasov və agentliyin nümayəndələri ilə görüş keçirilib. Məqsəd tələbələrin əmək bazarına hazırlıq səviyyəsinin artırılması, onların zəruri səriştə və bacarıqlarla təmin olunması istiqamətində müzakirələr aparmaq olub. Rektor Vilayət Vəliyev bildirib ki, tələbələrin məşğulluğunun və əmək bazarına inteqrasiyasının təmin edilməsi məqsədilə həyata keçirilən pilot layihə onların fərdi inkişafı istiqamətində də faydalı olacaq. Dövlət Məşğulluq Agentliyinin İdarə Heyəti sədrinin müavini Hasil Abbasov tələbələrin fərdi inkişafı və gələcək məşğulluq imkanlarının artırılması üçün həyata keçirilən "Əmək Bazarına Hazırlıq İndeksi" layihəsi barədə məlumat verib. Görüş zamanı layihənin tətbiqi imkanları və test nümunələri təqdim olunub, layihədən gözləntilər müzakirə edilib.

Yasamal rayonunda ulu öndər Heydər Əliyevin anadan olmasının 102 illiyinə həsr olunan basketbol turniri başa çatıb. Bağlanış mərasimində Yasamal Rayon İcra Hakimiyyəti başçısının müavini Təravət Muradova, Bakı Şəhər Gənclər və İdman İdarəsinin Yasamal rayonu üzrə gənclər və idman sektorunun müdiri İlham Səfərov, YAP Yasamal rayon təşkilatının məsləhətçisi Fuad Həbibzadə, Azərbaycan Texniki Universitetin (AzTU) prorektoru Rəşad Əliyev, idman klublarının rəhbərliyi və yarış iştirakçıları iştirak edib.  Turnirdə ölkəmizin aparıcı ali təhsil müəssisələrini təmsil edən 4 komanda iştirak edib.Gərgin və maraqlı mübarizəsi şəraitində keçən turnirin finalında Azərbaycan Texniki Universitetinin (AzTU) komandası Azərbaycan Memarlıq və İnşaat Universitetinin (AzMİU) komandasına qalib gələrək birinci yerin sahibi olub.

Türkiyənin Antalya şəhərində dünyanın ən böyük robot olimpiadası olan “Fibonacci Beynəlxalq Robot Olimpiadası”nın Avrasiya çempionatının yarımfinal mərhələsi keçirilib. Yarışmada dünyanın 24 ölkəsindən 21 fərqli kateqoriya üzrə 580-dən çox komanda, 3000-dən artıq iştirakçı qələbə uğrunda mübarizə aparıb. Azərbaycan Texniki Universitetinin (AzTU) Mühəndis riyaziyyatı və süni intellekt kafedrasının müəllimi Türkanə Qəhrəmanlının mentorluğu ilə tələbələr “Entrepreneurship” kateqoriyası üzrə “Scantekh” layihəsi ilə yarışa qatılaraq I yerə çıxıblar. Qalib komandalar İtalyada keçiriləcək “Fibonacci Beynəlxalq Robot Olimpiadası”nın final mərhələsində iştirak hüququ qazanıblar. Qeyd edək ki, İtalyada əsası qoyulan “Fibonacci Beynəlxalq Robot Olimpiadası” dünyanın ən böyük robot olimpiadası hesab edilir.

Azərbaycan Texniki Universitetində (AzTU) “Caspian Energy Club”un rəhbər heyəti ilə keçirilən görüşdə universitet-sənaye əməkdaşlığının gücləndirilməsi istiqamətində müzakirələr aparılıb. Görüşdə AzTU-nun rektoru Vilayət Vəliyev, “Caspian Energy Club”un baş icraçı direktoru Telman Əliyev və hər iki tərəfdən nümayəndələr iştirak ediblər. Rektor Vilayət Vəliyev universitetdə informasiya texnologiyaları, süni intellekt və innovasiya sahələrində həyata keçirilən layihələr, eləcə də startap fəaliyyətləri haqqında ətraflı məlumat verib. Bildirib ki, universitet-sənaye əməkdaşlığı tələbələrin bilik və bacarıqlarının praktiki mühitdə inkişafı üçün mühüm imkanlar yaradır. “Caspian Energy Club”un baş icraçı direktoru Telman Əliyev universitetlərlə işgüzar dairələr arasında körpü rolunun gücləndirilməsinin önəmini vurğulayıb və əməkdaşlığa açıq olduqlarını qeyd edib. Görüşdə “Caspian Energy Club”un mütəxəssislərinin tələbələr üçün master-klass və təlimlər keçməsi, tələbələrin “Caspian Energy Club”un  şirkətlərində təcrübədə iştirak etməsi ilə bağlı müzakirələr aparılıb. Sonda qonaqlar AzTU-nun maddi-texniki bazası ilə tanış olublar.

Azərbaycan Texniki Universitetində (AzTU) fəaliyyət göstərən Cənubi Koreyadan olan qonaq professor Woojik Chunun (Vujik Çin) akademik fəaliyyəti davam edir. Professor İnformasiya texnologiyaları və telekommunikasiya fakültəsinin tələbələrinə “Obyekt yönümlü proqramlaşdırma”, “Şəbəkənin əsasları” və “Kompüter şəbəkələri” fənlərindən mühazirələr deyib.  O, eyni zamanda, müvafiq fənlərin tədrisi ilə bağlə beynəlxalq təcrübəsini AzTU müəllimləri ilə bölüşür.  Professor akademik fəaliyyət ilə yanaşı fakültənin beynəlxalq əlaqələrinin inkişafı istiqamətində məsləhətlər də verir. Məlumat üçün bildiririk ki, qonaq professor Cənubi Koreyanın Koreya Beynəlxalq Əməkdaşlıq Agentliyinin (KOICA) dəstəyi ilə Koreya Respublikasının Ticarət, Sənaye və Energetika Nazirliyi yanında Milli İnformasiya Texnologiyaları Sənayesinin Təşviqi Agentliyinin (NIPA) “Dünyanın Dostları Koreya (WFK) Məsləhətçiləri Proqramı” çərçivəsində AzTU-da fəaliyyət göstərir. 

Azərbaycan Texniki Universiteti (AzTU) Alman Akademik Mübadilə Xidmətinin (DAAD) dəstəyi və DAAD-nin AzTU-da alman dili müəllimi Klaudio Kasperlin təşkilatçılığı ilə “Falling Walls Lab” beynəlxalq müsabiqəyə ev sahibliyi edəcək. “Falling Walls Lab” müsabiqəsi ilk dəfə olaraq Azərbaycandan müraciət edəcək fərdi tədqiqatçılar və tələbələr üçün açıq elan olunub. Layihənin əsas məqsədi müstəsna yaradıcı ideyaları təbliğ etmək və elmin bütün sahələrindən perspektivli gənc alim və tələbələri qlobal səviyyədə tanınmış platformada birləşdirməkdir. İştirakçılara beynəlxalq müsabiqədə iştirak etməklə öz tədqiqatlarını, biznes modellərini və ya təşəbbüslərini həmyaşıdlarına, yüksək səviyyəli münsiflər heyətinə və geniş ictimaiyyətə təqdim etmək imkanı yaradılır. Namizədliyi təsdiq edilmiş müsabiqə iştirakçılarına təqdimat bacarıqları üzrə (piching) onlayn təlimlərin keçirilməsi nəzərdə tutulur. Müsabiqədə iştirak edəcək namizədlərin layihələri Azərbaycanın ali təhsil müəssisələri, elmi-tədqiqat institutları və sənaye müəssisələrindən ibarət olacaq münsiflər heyəti tərəfindən qiymətləndiriləcək. Müsabiqənin yekun tədbiri iyunun 17-də AzTU-nun ev sahibliyi ilə keçiriləcək. Müsabiqənin Azərbaycan üzrə qalibi 2025-ci ilin noyabr ayında Berlində keçiriləcək yekun müsabiqədə öz layihəsini təqdim edəcək. 

Müstəqil Dövlətlər Birliyinin (MDB) Dövlətlərarası Statistika Komitəsinin təşkilatçılığı ilə Böyük Vətən müharibəsində qazanılmış qələbənin 80-ci ildönümünə həsr olunan "Qələbənin rəqəmləri və faktları" mövzusunda onlayn statistik viktorina keçirilib. Viktorinada Azərbaycanı 6 ali təhsil müəssisəsinin tələbələri təmsil edib. Yarışmada 100 azərbaycanlı tələbə arasından 28 nəfər 100 baldan yuxarı nəticə göstərib. Onlardan biri də Azərbaycan Texniki Universitetinin (AzTU) Maşınqayırma və robotexnika fakültəsinin tələbəsi Kənan Niftəliyevdir. Kənan Niftəliyevə viktorinada iştirak sertifikatı təqdim olunub.

İqtisadi İslahatların Təhlili və Kommunikasiya Mərkəzinin operatoru olduğu “Azexport.az” portalının əməkdaşları Azərbaycan Texniki Universitetində (AzTU) görüş keçirib. Görüşün məqsədi AzTU tələbələrinə "Azexport.az portalının iqtisadiyyata töhfəsi və beynəlxalq elektron ticarət platformaları" mövzusunda ətraflı məlumat təqdim etmək, “Amazon”, “Ebay” və digər beynəlxalq platformalarda rəqəmsal ticarət və beynəlxalq bazarlara çıxış yolları barədə maarifləndirici müzakirələr aparmaq olub. Tədbiri giriş sözü ilə açan AzTU-nun maliyyə və təsərrüfat işləri üzrə prorektoru Rəşad Əliyev bildirib ki, çağdaş zamanda elektron ticarət rəqəmsal iqtisadiyyatın əsas bel sütunudur. Prorektor AzTU-nun tədris müəssisəsi kimi bu sahəyə gətirdiyi yeniliklər, dərslərin universitet-sənaye iş birliyi çərçivəsində daha praktiki keçirilməsi, tələbələrin problemlərə yaradıcı həll yolu kimi yanaşaraq startaplarını düşünməyin əhəmiyyəti və nəticədə biznes dünyasına qatacağı qatqılardan bəhs edib. O, bu sahədə uğur qazanmaq istəyən AzTU tələbələrinə rəqəmsal bacarıqlarını inkişaf etdirməyi, analiz və çevik qərar qəbul etmə qabiliyyətini formalaşdırmağı və adaptasiya, ən son tendensiyaları, trendləri öyrənməyi, ən əsası, süni intellektlə birgə işləməyi tövsiyə edib. "Azexport.az" portalının rəhbəri Ayxan Qədəşov öncə görüş üçün şərait yaratdığına görə AzTU rəhbərliyinə təşəkkürünü ifadə edib. O, daha sonra portalın təqdim etdiyi xidmətlər, elektron ticarət, onun üstünlükləri və riskləri haqqında məlumat verib. “Rəqəmsal özünüməşğulluq imkanları” mövzusunda təqdimatla çıxış edən Ayxan Qədəşov dünyada və Azərbaycanda elektron ticarətin nüfuzunun və istifadəçilərinin sayının ildən ilə artdığını qeyd edib və tələbələrin bu istiqamətə fokuslanmasını tövsiyə edib. Daha sonra o, “Amazon”, “e-Bay” kimi beynəlxalq elektron ticarət platformalarının iş prinsipləri, qaydaları və rəqəmsal dünyadakı satış prosesinin tələbləri haqqında bilgi və təcrübələrini AzTU tələbələri ilə bölüşüb. Çıxışlardan sonra sual-cavab sessiyası başlayıb və tədbir panel müzakirələri ilə yekunlaşıb.

Azərbaycan Texniki Universiteti (AzTU) Tələbə Gənclər Təşkilatının (TGT) təşkilatçılığı ilə "Kaş məni də dinləyəydilər” adlı natiqlik təlimi keçirilib. Təlimçi Zaur Cahangirovun iştirakı ilə keçirilən təlimin əsas məqsədi tələbələrin effektiv ünsiyyət qurmaq, təqdimatlarda və debatlarda uğurlu çıxış etmək, bədən dili və səs tonundan düzgün istifadə etmək, həmçinin tənqidi və analitik düşünmək bacarığını inkişaf etdirməkdir. AzTU-nun həyətində keçirilən təlim sual-cavab formatında davam edib.