İnnovasiya və Rəqəmsal İnkişaf Agentliyi, Azərbaycan Respublikasının Təhsil İnstitutu, Azərbaycan Texniki Universitetinin  (AzTU) Təhsildə İnformasiya Texnologiyaları və Metodik Dəstək İnstitutu və “ÖzünÖyrən” MMC-nin birgə təşkilatçılığı ilə AzTU-da “Bebras” İnformatika və Alqoritmik Düşüncə müsabiqəsinin super final turu keçirilib. Müsabiqədə Respublikanın müxtəlif bölgələrindən 100-ə yaxın şagird (1-9-cu siniflər) iştirak edib. Bu müsabiqədə şagirdlərin alqoritmik təfəkkürləri və kompüter vərdişləri yoxlanılıb və avtomatik qiymətləndirilib. Müsabiqə bebras.az portalı vasitəsilə keçirilib. İştirakçılara sualları cavablandırmaq üçün 45 dəqiqə vaxt verilib. Yekun olaraq “Bebras” İnformatika və Alqoritmik Düşüncə müsabiqəsinin hər yaş kateqoriyası üzrə ilk üç yerin qalibləri müəyyənləşdirilib. Qeyd edək ki, müsabiqənin 2024-cü ilin dekabr ayında onlayn formatda keçirilmiş təsnifat mərhələsində Azərbaycanın 69 bölgəsindən 376 ümumtəhsil məktəbinin 1–10-cu siniflərini təmsil edən 17.564 şagird iştirak edib. Nəticədə 667 şagird yarımfinal mərhələsinə vəsiqə qazanıb. 12 aprel 2025-ci il tarixində AzTU-da keçirilmiş yarımfinal mərhələsində isə 418 şagird iştirak edib, onlardan 100-ü final mərhələsinə yüksəlib. 2024-cü ildə dünya üzrə 80-dən çox ölkədən təqribən 3.900.000 şagird “Bebras” müsabiqəsində iştirak edib. Qeyd edək ki, bu müsabiqə Azərbaycanda 2014-cü ildən etibarən təşkil olunur. 11–15 may 2025-ci il tarixlərində Cənubi Koreyanın Seul şəhərində keçirilmiş beynəlxalq “Bebras” konfransında ölkəmiz tamhüquqlu üzv statusu qazanıb. Müsabiqənin əsas məqsədi interaktiv və maraqlı məsələlər vasitəsilə şagirdlərdə informasiya texnologiyaları və kompüter elmlərinə marağın artırılmasıdır.

Türkiyənin Koç Universitetinin professoru Varqa Kələntərov Azərbaycan Texniki Universitetinin (AzTU) İnformasiya texnologiyaları və telekommunikasiya fakültəsində seminar keçib. "Mühəndislikdə riyazi metodların tətbiqi" mövzusunda təşkil olunan seminarda Mühəndis riyaziyyatı və süni intellekt və Mexatronika kafedralarının əməkdaşları iştirak edib. Seminarda riyaziyyatın mühəndisliyin müxtəlif sahələrində müasir metodlarla tətbiqi haqqında ətraflı məlumat verilib.    Sonda suallar cavablandırılıb.

Azərbaycan Texniki Universiteti (AzTU) 2–4 iyun 2025-ci il tarixlərində Bakı Ekspo Mərkəzində keçirilən Bakı Enerji Həftəsində uğurla iştirak edib. Universitetin Mexatronika kafedrası innovativ “Mavi Enerji – Ağıllı Dalğa Enerjisi Çeviricisi” layihəsi ilə startap zonasında yer alıb. Layihə müəllifi Mexatronika kafedrasının müəllim köməkçisi İlkin Əliyev və tələbə Eldar Dərvişov tərəfindən təqdim olunan startap həm yerli, həm də beynəlxalq şirkətlərin böyük marağına səbəb olub və bir sıra əməkdaşlıq təklifləri ilə nəticələnib. Layihə dəniz dalğalarının həm şaquli, həm də üfüqi hərəkətlərindən istifadə edərək davamlı elektrik enerjisi istehsalını hədəfləyir.

“AWE Consulting” şirkətinin Azərbaycan üzrə baş direktoru Elmira Cavadova və şirkətin nümayəndələri Azərbaycan Texniki Universitetində (AzTU) olub. Qonaqlar AzTU-nun rektoru Vilayət Vəliyev və universitetin nümayəndələri ilə görüşüb. Görüşdə şirkət haqqında ətraflı məlumat verilib. Bildirib ki, “AWE Consulting” dayanıqlı inkişafa, eləcə də sosial təsirə yönəlmiş regenerativ marketinq, qabaqcıl biznes strategiyalar və transformativ ideyalar üzrə ixtisaslaşmış qlobal konsaltinq şirkətidir. Şirkər AzTU ilə marketinq, kommunikasiya və innovasiya sahələrində tədrisin keyfiyyətinin artırılması, eləcə də bu istiqamətdə təcrübə mübadiləsi aparılmasında maraqlıdır. Görüşdə AzTU ilə şirkət arasında marketinq və kommunikasiya sahəsində birgə təlimlərin təşkili, müəllim, əməkdaş və tələbələr üçün müxtəlif tədris və tədqiqat layihələrində iştirak imkanları ilə bağlı müzakirələr aparılıb. Bundan başqa, dünya şöhrətli marketinq mütəxəssisi Filip Kotlerin “Müasir Marketinqin Əsasları” (Essentials of Modern Marketing-EOMM) kitabının Azərbaycan nəşrinin oxucuların istifadəsinə verildiyi qeyd olunub. Məqsəd dünya marketinq təcrübəsini Azərbaycana gətirmək və ölkənin innovativ nailiyyətlərinin və uğur hekayələrinin qlobal səhnədə tanınmasını təmin etməkdir.

Azərbaycan Texniki Universitetinin (AzTU) 1 saylı Tələbə Poliklinikasında tələbələr, akademik və inzibati heyət üçün ödənişsiz stomotoloji müayinə keçirilib. Müayinəni Azərbaycan Tibb Universitetinin Tədris Stomatoloji Klinikasının rezident və həkimkləri həyata keçiriblər. 5 saat davam edən müayinə zamanı dişində problem aşkarlanan şəxslərə tibbi məsləhətlər verilib. Həmçinin dişlərin sağlamlığı üçün zəruri tövsiyələr diqqətə çatdırılıb.

Azərbaycan Texniki Universitetinin (AzTU) MBA proqramının beynəlxalq logistika və təchizat zəncirinin idarə edilməsi ixtisaslaşmasının 1-ci və 2-ci kurs, Nəqliyyat və logistika fakültəsinin bakalavr səviyyəsi üzrə logistika və nəqliyyat texnologiyaları mühəndisliyi ixtisasının 2-ci və 3-cü kurs tələbələri Abşeron Logistika Mərkəzinə səfər ediblər. Tələbələri səfərdə Nəqliyyat və logistika fakültəsinin dekan müavinləri Qəzənfər Axundov, Sevinc Abdinzadə və Nəqliyyat logistikası və hərəkətin təhlükəsizliyi kafedrasının baş müəllimi Əvəz Əsgərov müşayiət edib. Burada tələbələrə Abşeron Logistika Mərkəzinin tarixi, geostrateji yerləşmə mövqeyi, texniki imkanları və burada yaradılan iş imkanları barədə məlumat verilib. Tələbələr AzTU-nun mərkəzdə fəaliyyət göstərən tədris mərkəzi ilə də tanış olublar. Səfər çərçivəsində tələbələrə müvafiq istiqamətlərdə pratiki dərslər keçirilib.

Azərbaycan Texniki Universitetində (AzTU) “Koreyada Təhsil və Tədqiqat fürsətləri” mövzusunda Beynəlxalq Gün keçirilib. Tədbirdə Koreyanın Milli İnformasiya Texnologiyaları Sənayesinin Təşviqi Agentliyinin (NIPA) “Dünyanın Dostları Koreya (WFK) Məsləhətçiləri Proqramı” çərçivəsində AzTU-da fəaliyyət göstərən qonaq professor Woojik Chun (Vujik Çun) çıxış edərək Koreyada təhsil və tədqiqat imkanları barədə müəllim və tələbələrə məlumat verib. Daha sonra Koreya mədəniyyətinə dair video təqdimatlar və stendlər nümayiş olunub. Həmçinin Koreya mətbəxinə aid təamlar da iştirakçılara təqdim olunub.

Azərbaycan Texniki Universitetinin (AzTU) rektoru Vilayət Vəliyevin rəhbərlik etdiyi nümayəndə heyəti Bakı Kristal Zalında olub. Qonaqlar “Bakı Kristal Zalı” MMC-nin direktoru Bahar Dadaşova və müəssisənin əməkdaşları ilə görüşüblər. Görüş zamanı AzTU-nun Bakı Kristal Zalının fəaliyyət istiqamətlərinə uyğun ixtisasları üzrə bakalavriat səviyyəsində təhsil alanların istehsalat təcrübələrinin, uyğun ixtisaslaşmalar üzrə isə magistrantların elmi-tədqiqat təcrübələrinin təşkili, həmçinin tədris planlarının və proqramlarının təkmilləşdirilməsi istiqamətində əməkdaşlıqla bağlı müzakirələr aparılıb. Bundan başqa, AzTU-nun doktorant və dissertantlarının elmi-tədqiqat işlərində Bakı Kristal Zalının istehsalat fəaliyyətində aktual olan mövzuları araşdırması barədə razılığa gəlinib. Tərəflər qeyd olunan məsələləri əməkdaşlıq haqqında memorandumla rəsmiləşdirib. İmzalanma mərasimindən sonra AzTU nümayəndə heyəti Bakı Kristal Zalının ərazisi ilə tanış olub.

Elm və Təhsil Nazirliyi, Mədəniyyət Nazirliyi və Azərbaycan Dövlət Mədəniyyət və İncəsənət Universitetinin (ADMİU) təşkilatçılığı ilə həyata keçirilən “PİLLƏ 3” Respublika Tələbə Tamaşaları Festivalının bağlanış və mükafatlandırma mərasimi keçirilib. Festivalda iştirak edən Azərbaycan Texniki Universitetinin (AzTU) Teatr Klubunun nümayiş etdirdiyi Mirzə Fətəli Axundovun "Müsyö Jordan və dərviş Məstəli şah" komediyası əsasında səhnələşdirilən eyniadlı tamaşa mükafata layiq görülüb. Tamaşanın quruluşçu rejissoru, AzTU Teatr Klubunun üzvü, Xüsusi texnika və texnologiya fakültəsinin 3-cü kurs tələbəsi Xəyal Abdullayev Dərviş Məstəli Şah obrazına görə “Ən yaxşı kişi rolu” nominasiyasında qalib olub. 

Azərbaycan Texniki Universitetində (AzTU) bakalavriat və magistratura (əyani) səviyyələrində 2024/2025-cü tədris ilinin yaz semestrinin yay imtahan sessiyası başlayıb. Sessiya iyulun 5-də yekunlaşacaq. Qiyabi təhsil alanlar üçün imtahan sessiyası isə 10-16 iyun tarixlərini əhatə edəcək. İmtahanlar əyani təhsil alan I və II kurslar üçün test, yazılı-elektron, III kurslar üçün şifahi və test üsulu ilə keçirilir. Qiyabi təhsil alan I, II, III, IV kurslar üçün imtahanlar test üsulla təşkil edilib. Magistratura səviyyəsində isə imtahanlar şifahi üsulla keçirilir. Sessiya zamanı üzrlü səbəblərdən imtahanda iştirak etməyən tələbələrə iyulun 10-dan 15-dək həmin fənlərdən imtahan vermək üçün şərait yaradılacaq. Qeyd edək ki, sessiyanın gedişinə nəzarət, həmçinin şəffaflığın təmin olunması məqsədilə AzTU-da Apelyasiya Komissiyası, İmtahan Qərargahı və "Qaynar xətt" (+99412 539 11 25) fəaliyyət göstərir.