Müstəqil Dövlətlər Birliyinin (MDB) Dövlətlərarası Statistika Komitəsinin təşkilatçılığı ilə Böyük Vətən müharibəsində qazanılmış qələbənin 80-ci ildönümünə həsr olunan "Qələbənin rəqəmləri və faktları" mövzusunda onlayn statistik viktorina keçirilib. Viktorinada Azərbaycanı 6 ali təhsil müəssisəsinin tələbələri təmsil edib. Yarışmada 100 azərbaycanlı tələbə arasından 28 nəfər 100 baldan yuxarı nəticə göstərib. Onlardan biri də Azərbaycan Texniki Universitetinin (AzTU) Maşınqayırma və robotexnika fakültəsinin tələbəsi Kənan Niftəliyevdir. Kənan Niftəliyevə viktorinada iştirak sertifikatı təqdim olunub.

Yasamal rayonunda ulu öndər Heydər Əliyevin anadan olmasının 102 illiyinə həsr olunan basketbol turniri başa çatıb. Bağlanış mərasimində Yasamal Rayon İcra Hakimiyyəti başçısının müavini Təravət Muradova, Bakı Şəhər Gənclər və İdman İdarəsinin Yasamal rayonu üzrə gənclər və idman sektorunun müdiri İlham Səfərov, YAP Yasamal rayon təşkilatının məsləhətçisi Fuad Həbibzadə, Azərbaycan Texniki Universitetin (AzTU) prorektoru Rəşad Əliyev, idman klublarının rəhbərliyi və yarış iştirakçıları iştirak edib.  Turnirdə ölkəmizin aparıcı ali təhsil müəssisələrini təmsil edən 4 komanda iştirak edib.Gərgin və maraqlı mübarizəsi şəraitində keçən turnirin finalında Azərbaycan Texniki Universitetinin (AzTU) komandası Azərbaycan Memarlıq və İnşaat Universitetinin (AzMİU) komandasına qalib gələrək birinci yerin sahibi olub.

Azərbaycan Texniki Universiteti (AzTU) Alman Akademik Mübadilə Xidmətinin (DAAD) dəstəyi və DAAD-nin AzTU-da alman dili müəllimi Klaudio Kasperlin təşkilatçılığı ilə “Falling Walls Lab” beynəlxalq müsabiqəyə ev sahibliyi edəcək. “Falling Walls Lab” müsabiqəsi ilk dəfə olaraq Azərbaycandan müraciət edəcək fərdi tədqiqatçılar və tələbələr üçün açıq elan olunub. Layihənin əsas məqsədi müstəsna yaradıcı ideyaları təbliğ etmək və elmin bütün sahələrindən perspektivli gənc alim və tələbələri qlobal səviyyədə tanınmış platformada birləşdirməkdir. İştirakçılara beynəlxalq müsabiqədə iştirak etməklə öz tədqiqatlarını, biznes modellərini və ya təşəbbüslərini həmyaşıdlarına, yüksək səviyyəli münsiflər heyətinə və geniş ictimaiyyətə təqdim etmək imkanı yaradılır. Namizədliyi təsdiq edilmiş müsabiqə iştirakçılarına təqdimat bacarıqları üzrə (piching) onlayn təlimlərin keçirilməsi nəzərdə tutulur. Müsabiqədə iştirak edəcək namizədlərin layihələri Azərbaycanın ali təhsil müəssisələri, elmi-tədqiqat institutları və sənaye müəssisələrindən ibarət olacaq münsiflər heyəti tərəfindən qiymətləndiriləcək. Müsabiqənin yekun tədbiri iyunun 17-də AzTU-nun ev sahibliyi ilə keçiriləcək. Müsabiqənin Azərbaycan üzrə qalibi 2025-ci ilin noyabr ayında Berlində keçiriləcək yekun müsabiqədə öz layihəsini təqdim edəcək. 

Azərbaycan Texniki Universitetində (AzTU) "Əmək Bazarına Hazırlıq İndeksi" pilot layihəsi çərçivəsində Dövlət Məşğulluq Agentliyinin İdarə Heyəti sədrinin müavini Hasil Abbasov və agentliyin nümayəndələri ilə görüş keçirilib. Məqsəd tələbələrin əmək bazarına hazırlıq səviyyəsinin artırılması, onların zəruri səriştə və bacarıqlarla təmin olunması istiqamətində müzakirələr aparmaq olub. Rektor Vilayət Vəliyev bildirib ki, tələbələrin məşğulluğunun və əmək bazarına inteqrasiyasının təmin edilməsi məqsədilə həyata keçirilən pilot layihə onların fərdi inkişafı istiqamətində də faydalı olacaq. Dövlət Məşğulluq Agentliyinin İdarə Heyəti sədrinin müavini Hasil Abbasov tələbələrin fərdi inkişafı və gələcək məşğulluq imkanlarının artırılması üçün həyata keçirilən "Əmək Bazarına Hazırlıq İndeksi" layihəsi barədə məlumat verib. Görüş zamanı layihənin tətbiqi imkanları və test nümunələri təqdim olunub, layihədən gözləntilər müzakirə edilib.

Azərbaycan Texniki Universitetində (AzTU) fəaliyyət göstərən Cənubu Koreyadan olan qonaq professor Woojik Chunun (Vujik Çin) akademik fəaliyyəti davam edir. Professor İnformasiya texnologiyaları və telekommunikasiya fakültəsinin tələbələrinə “Obyekt yönümlü proqramlaşdırma”, “Şəbəkənin əsasları” və “Kompüter şəbəkələri” fənlərindən mühazirələr deyib.  O, eyni zamanda, müvafiq fənlərin tədrisi ilə bağlə beynəlxalq təcrübəsini AzTU müəllimləri ilə bölüşür.  Professor akademik fəaliyyət ilə yanaşı fakültənin beynəlxalq əlaqələrinin inkişafı istiqamətində məsləhətlər də verir. Məlumat üçün bildiririk ki, qonaq professor Cənubu Koreyanın Koreya Beynəlxalq Əməkdaşlıq Agentliyinin (KOICA) dəstəyi ilə Koreya Respublikasının Ticarət, Sənaye və Energetika Nazirliyi yanında Milli İnformasiya Texnologiyaları Sənayesinin Təşviqi Agentliyinin (NIPA) “Dünyanın Dostları Koreya (WFK) Məsləhətçiləri Proqramı” çərçivəsində AzTU-da fəaliyyət göstərir. 

Azərbaycan Texniki Universitetində (AzTU) ümummilli lider Heydər Əliyevin anadan olmasının 102 illiyinə həsr olunmuş “Mütərəqqi texnologiyalar və innovasiyalar” mövzusunda X Respublika elmi-konfransı öz işinə başlayıb. AzTU-nun rektoru Vilayət Vəliyev iştirakçıları salamlayaraq hər il ənənəvi formada keçirilən konfransa bu il marağın daha da artdığını bildirib. Tədqiqatların yekun nəticəsinin sənayeyə transformasiya edilməsinin vacibliyini qeyd edən rektor müdafiə sənayesi, təhlükəsizlik məsələləri və müxtəlif texnologiya mövzularının ölkə üçün strateji əhəmiyyət daşıdığını və bu sahədə AzTU-nun akademik heyətinin davamlı çalışdığını konfrans iştirakçılarının diqqətinə çatdırıb. Bundan əlavə, AzTU rektoru tədqiqat işləri və elmi məqalələr içində ən yaxşı 50 məqalənin “Scopus”, “Web of Science” kimi nüfuzlu beynəlxalq elmmetrik bazalarda yayımlanmasının və gələcəkdə konfransa xarici tərəfdaşların da cəlb olunmasının əhəmiyyətini vurğulayıb. Milli Məclisin deputatı Rizvan Nəbiyev bildirib ki, bu gün rəqəmsal texnologiyaların inkişafı ölkələrin iqtisadi gücünü əsaslı surətdə artırır. O deyib ki, kadr hazırlığı əslində ölkənin milli təhlükəsizlik məsələsi kimi qiymətləndirilməlidir. Hazırkı dövrdə  müdafiə sənayesinin qüdrətli olması ölkəmiz  üçün əsas prioritetlərdəndir. Elektron Təhlükəsizlik Xidmətinin baş mütəxəssisi Ayxan Hüseynli “Kibertəhlükəsizlik - rəqəmsal dövrün təməl sütunu” mövzusunda elmi məruzəsində dünyada, eləcə də ölkədə dövlət qurumlarına olan müxtəlif kiberhücumlardan bəhs edib. Tədqiqatçının fikrincə, baş verən kibertəhdid hadisələri sadəcə dövlətlərin nüfuzuna ziyan vurmur, həm də real iqtisadi və sosial təhlükələr yaradır. Ölkə üçün strateji məsələ kimi yüksək peşəkar kadr hazırlığı davamlı olmalı və bu sahədə tədqiqat işlərinin sayı artırılmalıdır. İnformasiya texnologiyaları və telekommunikasiya fakültəsinin tələbəsi Rəsul Qocayev “Layfay texnologiyası: arxitekturalar və məlumat ötürülməsi mexanizmləri” mövzusunda  təqdimatla çıxış edib.  Rəsul Qocayev gələcəyin texnologiyası sayılacaq “Layfay” (Li-Fi) və hazırda aktual olan “Vayfay” (Wi-Fi) texnologiyaları arasında anologiya apararaq hər birinin üstünlükləri və çatışmayan cəhətləri barədə konfrans iştirakçılarına məlumat verib.   Bu il konfransa AzTU ilə yanaşı, Azərbaycan Dövlət Neft və Sənaye Universiteti (ADNSU), Azərbaycan İqtisad Universiteti (UNEC), Sumqayıt Dövlət Universiteti (SDU), Naxçıvan Dövlət Universiteti (NDU), Odlar Yurdu Universiteti (OYU), Qərbi Kaspi Universiteti kimi ali təhsil müəssisələrindən ümumilikdə 550-dən çox elmi məqalə göndərilib. Bölmə iclasları ilə davam edən konfrans işini mayın 2-də yekunlaşdıracaq. 

İqtisadi İslahatların Təhlili və Kommunikasiya Mərkəzinin operatoru olduğu “Azexport.az” portalının əməkdaşları Azərbaycan Texniki Universitetində (AzTU) görüş keçirib. Görüşün məqsədi AzTU tələbələrinə "Azexport.az portalının iqtisadiyyata töhfəsi və beynəlxalq elektron ticarət platformaları" mövzusunda ətraflı məlumat təqdim etmək, “Amazon”, “Ebay” və digər beynəlxalq platformalarda rəqəmsal ticarət və beynəlxalq bazarlara çıxış yolları barədə maarifləndirici müzakirələr aparmaq olub. Tədbiri giriş sözü ilə açan AzTU-nun maliyyə və təsərrüfat işləri üzrə prorektoru Rəşad Əliyev bildirib ki, çağdaş zamanda elektron ticarət rəqəmsal iqtisadiyyatın əsas bel sütunudur. Prorektor AzTU-nun tədris müəssisəsi kimi bu sahəyə gətirdiyi yeniliklər, dərslərin universitet-sənaye iş birliyi çərçivəsində daha praktiki keçirilməsi, tələbələrin problemlərə yaradıcı həll yolu kimi yanaşaraq startaplarını düşünməyin əhəmiyyəti və nəticədə biznes dünyasına qatacağı qatqılardan bəhs edib. O, bu sahədə uğur qazanmaq istəyən AzTU tələbələrinə rəqəmsal bacarıqlarını inkişaf etdirməyi, analiz və çevik qərar qəbul etmə qabiliyyətini formalaşdırmağı və adaptasiya, ən son tendensiyaları, trendləri öyrənməyi, ən əsası, süni intellektlə birgə işləməyi tövsiyə edib. "Azexport.az" portalının rəhbəri Ayxan Qədəşov öncə görüş üçün şərait yaratdığına görə AzTU rəhbərliyinə təşəkkürünü ifadə edib. O, daha sonra portalın təqdim etdiyi xidmətlər, elektron ticarət, onun üstünlükləri və riskləri haqqında məlumat verib. “Rəqəmsal özünüməşğulluq imkanları” mövzusunda təqdimatla çıxış edən Ayxan Qədəşov dünyada və Azərbaycanda elektron ticarətin nüfuzunun və istifadəçilərinin sayının ildən ilə artdığını qeyd edib və tələbələrin bu istiqamətə fokuslanmasını tövsiyə edib. Daha sonra o, “Amazon”, “e-Bay” kimi beynəlxalq elektron ticarət platformalarının iş prinsipləri, qaydaları və rəqəmsal dünyadakı satış prosesinin tələbləri haqqında bilgi və təcrübələrini AzTU tələbələri ilə bölüşüb. Çıxışlardan sonra sual-cavab sessiyası başlayıb və tədbir panel müzakirələri ilə yekunlaşıb.

Azərbaycan Texniki Universiteti (AzTU) Tələbə Gənclər Təşkilatının (TGT) təşkilatçılığı ilə "Kaş məni də dinləyəydilər” adlı natiqlik təlimi keçirilib. Təlimçi Zaur Cahangirovun iştirakı ilə keçirilən təlimin əsas məqsədi tələbələrin effektiv ünsiyyət qurmaq, təqdimatlarda və debatlarda uğurlu çıxış etmək, bədən dili və səs tonundan düzgün istifadə etmək, həmçinin tənqidi və analitik düşünmək bacarığını inkişaf etdirməkdir. AzTU-nun həyətində keçirilən təlim sual-cavab formatında davam edib.

Azərbaycan Texniki Universitetində (AzTU) ümummilli lider Heydər Əliyevin anadan olmasının 102 illiyinə həsr olunmuş Spartakiadanın futzal yarışı üzrə bağlanış mərasimi keçirilib. AzTU-nun Tələbə Həmkarlar İttifaqı Komitəsinin (THİK) təşkilatçılığı ilə keçirilən tədbirdə universitetin və AFFA-nın nümayəndə heyəti, tələbələr və qonaqlar iştirak edib. Oyunun nəticələrinə əsasən, Metallurgiya və kimya texnologiyası fakültəsi 1-ci, İqtisadiyyat və idarəetmə fakültəsi 2-ci, İnformasiya texnologiyaları və telekommunikasiya fakültəsi isə 3-cü yerə layiq görülüb. Qalib komandalar diplom, medal və kuboklarla təltif olunublar. 

Azərbaycan Texniki Universiteti (AzTU) və Azərbaycan Tələbə Gənclər Təşkilatları İttifaqının dəstəyi, AzTU Tələbə Gənclər Təşkilatının (TGT) təşkilatçılığı ilə “Eco” sərgi keçirilib.Məqsəd ətraf mühitin mühafizəsi mövzusunda maarifləndirməni artırmaq, tələbələrdə ekoloji şüurun formalaşdırılması və ekoloji problemlərə diqqətin artırılmasıdır. Layihə çərçivəsində həmçinin davamlı inkişaf, tullantıların idarə olunması, yenilənə bilən enerji mənbələri və ekoloji texnologiyalar kimi mövzularda məlumatlar paylaşılıb, innovativ ideyalar və ekoloji təşəbbüslər nümayiş etdirilib.