Özbəkistan Respublikasının Daşkənd şəhərində Daşkənd Beynəlxalq Universitetinin ev sahibliyi ilə Türk Universitetlər Birliyinin (TÜRKÜNİB) 8-ci Baş Assambleyasının iclası keçirilib. İclasda Azərbaycan Texniki Universiteti (AzTU) də daxil olmaqla ümumilikdə Azərbaycanın 13 universiteti TÜRKÜNİB-ə yeni üzv qəbul olunub. Tədbir çərçivəsində üzv universitetlər arasında elm və təhsil sahəsində proqramların uyğunlaşdırılması, tələbə və müəllim mübadilələrinin artırılması, eləcə də birgə akademik fəaliyyət, layihə və konfransların təşkili, həmçinin mədəniyyət, elm və idman sahələrində müsabiqələrin keçirilməsi istiqamətində əməkdaşlıq imkanları müzakirə edilib.

Azərbaycan Texniki Universitetinin (AzTU) nümayəndə heyəti İsrail Dövlətində rəsmi səfərdə olub. Səfərin əsas məqsədi AzTU ilə İsrailin aparıcı universitetləri arasında elmi-tədqiqat, tədris və innovasiya sahələrində əməkdaşlıq əlaqələrinin qurulması və genişləndirilməsi olub. Səfər çərçivəsində nümayəndə heyəti İsrailin Tel-Aviv Universiteti, Bar-Ilan Universiteti, Ben-Qurion Neqev Universiteti, Holon Texnologiya İnstitutu kimi qabaqcıl ali təhsil müəssisələrini, “Check Point” kibetəhlükəsizlik şirkətini, Qüds İnnovasiya Mərkəzini ziyarət edib. Görüşlər zamanı AzTU nümayəndə heyəti təmsil etdikləri universitet barədə geniş məlumat verib. AzTU-nun ikitərəfli tədris və tədqiqat layihələrinin yerinə yetirilməsi, müəllim-tələbə mübadiləsi, beynəlxalq reytinqlərdə iştirak, birgə elmi məqalələrin yazılması, ikili diplom və elmi rəhbərliklərin həyata keçirilməsi istiqamətində əməkdaşlıqda maraqlı olduğu vurğulanıb. Səfər çərçivəsində nümayəndə heyəti həmçinin Holon Texnologiya Universitetində (HTİ) təşkil olunmuş “Süni Zəka, Dayanıqlılıq və Rəqəmsal İrs” mövzusunda HTİ və onun Avrasiya və Balkan Ölkələri Tərəfdaşlarının 4-cü İllik Seminarında iştirak etdib. Seminarda Rahid Ələkbərli məruzə ilə çıxış edib.  Qeyd edək ki, nümayəndə heyətində beynəlxalq əlaqələr üzrə prorektor Fariz Məmmədov, Müdafiə Texnologiyaları və Kibertəhlükəsizlik İnstitutunun direktoru Rahid Ələkbərli və Beynəlxalq əlaqələr şöbəsinin Layihələrin idarə olunması sektorunun müdiri Elşən Qurbanov təmsil olunub.

Azərbaycan Texniki Universitetinin (AzTU) Kommunikasiya şöbəsinin və 1 nömrəli Tələbə Poliklinikasının birgə təşkilatçılığı ilə tələbələr üçün “Sağlam bədəndə sağlam ruh olar” devizi altında maarifləndirici tədbir təşkil olunub. Dayanıqlı İnkişaf Məqsədləri (SDG) çərçivəsində keçirilən tədbirdə Kommunikasiya şöbəsinin əməkdaşı Mehti Namazov qeyd edib ki, fiziki və psixoloji sağlamlıq hər bir uğuru şərtləndirən əsas amillərdəndir. O, AzTU-da bu cür maarifləndirici tədbirlərin təşkilinə böyük önəm verildiyini diqqətə çatdırıb. Tələbə Poliklinikasının həkimləri – terapevt Nəcibə Quliyeva və infeksionist Gülnarə Allahverdiyeva tələbələri allergik xəstəliklər, o cümlədən suçiçəyi xəstəliyi və həmin xəstəliklərə qarşı mübarizə üsulları barədə maarifləndiriblər. Onlar gənclərə sözügedən xəstəliklərə qarşı düzgün davranış və profilaktik tədbirlər haqqında məlumat verərək, gigiyena qaydalarına riayət etməyi tövsiyə ediblər.

Azərbaycan Texniki Universitetinin (AzTU) Biotibbi Mühəndislik İnstitutunun direktoru, professor, tibb elmləri doktoru, Almaniyanın Reyn-Ziq bölgəsində klinika direktoru vəzifəsində çalışan Nuran Abdullayevin elmi araşdırması və məktubu “New England Journal of Medicine” (NEJM) jurnalında dərc edilib. Məqalədə Nuran Abdullayev piylənmənin müalicəsində istifadə olunan iki dərman – “Tirzepatid” (GIP-GLP-1 reseptor aqonisti - “Mounjaro”) və “Semaglutid” (GLP-1 reseptor aqonisti - “Wegovy”) arasındakı fərqləri elmi kontekstdə şərh edib. Professor vurğulayıb ki, bu tədqiqatlar əsasən çəki itkisinə və metabolik nəticələrə fokuslansa da, visseral orqan piylənməsi, əzələ kütləsindəki dəyişikliklər və sümük mineral sıxlığı (BMD) kimi mühüm komponentlər hələ də kifayət qədər öyrənilməyib. O, bu dərmanların metabolik sağlamlığa və skelet sistemi üzərinə təsirlərinin tam şəkildə qiymətləndirilməsi məqsədilə gələcək tədqiqatlar üçün MRT əsaslı bədən tərkibi ölçmələri və DXA+MRT kombinasiyası kimi müasir görüntüləmə metodlarının tətbiq olunmasını elmi əsasla təklif edib. Qeyd edək ki, dünyanın ən nüfuzlu tibb jurnallarından olan “New England Journal of Medicine”də hər hansı məqalənin dərc olunması tibb aləmində böyük hadisə, müəllif üçün yüksək elmi uğur sayılır. 1812-ci ildən nəşr edilən bu jurnal klinik tibb sahəsində ən mötəbər elmi mənbə sayılır. ABŞ-da çap olunan NEJM dünyada bütün tibbi nəşrlər arasında ən yüksək təsir əmsalına (Impact Factor) malik jurnallardandır. Jurnala məqalə qəbulu üçün çox ciddi seçim prosesi həyata keçirilir. Belə ki, nəşrə təqdim edilən məqalələrin çox az qismi – cəmi 10 faizi, xüsusən də dərin elmi əsaslandırmaya malik və beynəlxalq əhəmiyyətli elmi məqalələr dərc olunur. Böyük oxucu kütləsi olan jurnalda yayımlanan işlər dünyada həkimlər, alimlər, səhiyyə üzrə yüksəkvəzifəli siyasətçilər və beynəlxalq klinik protokol hazırlayan komissiyalar tərəfindən oxunur. Müalicə standartlarının dəyişdirilməsinə təsir edəcək səviyyəyə malik bu jurnalda hər hansı məqalənin yayımlanması həmin işin dünya miqyasında yüksək elmi və klinik dəyərini göstərir.

Mingəçevir Dövlət Universiteti (MDU), Azərbaycan–Türkiyə İş Adamları Birliyi (ATİB) və “HBN Group”un təşkilatçılığı ilə “Regional Universitet–Sənaye Birliyi Sammiti 2025” keçirilib. MDU-nun rektoru Anar Eminov sammitin məqsəd və əhəmiyyətindən danışıb. O, bildirib ki, “Regional Universitet–Sənaye Birliyi Sammiti 2025” ölkənin regionlarında təhsil müəssisələri ilə sənaye subyektləri arasında qarşılıqlı əməkdaşlıq mexanizmlərini gücləndirmək, gənclərin məşğulluq və innovasiya potensialını artırmaq baxımından mühüm addımdır. Çıxış edənlər ali təhsil müəssisələrinin sənaye ilə işbirliyinin vacibliyini qeyd edib, belə tədbirlərin sözügedən əməkdaşlığın inkişafında mühüm əhəmiyyət daşıdığını vurğulyıbar. Sammit çərçivəsində Dövlət Məşğilluq Agentliyi  ilə birgə Karyera Sərgisi təşkil olunub. Sərgidə Azərbaycan Texniki Universitetinin (AzTU) stendi də nümayiş olunub. Qeyd edək ki, sammitdə AzTU-nu Həmkarlar İttifaqı Komitəsinin sədri Elvin Bəxtiyarlı, “SmartTech” İnnovatorlar Mərkəzinin direktoru Azər Bayramov və Texnologiya Transfer Mərkəzinin əməkdaşı Sahib Əsgərov təmsil edib.

Müdafiə Sənayesi Nazirliyinin (MSN) nümayəndə heyəti Azərbaycan Texniki Universitetində (AzTU) olub. Görüşün məqsədi kimya və kimya mühəndisliyi istiqamətləri üzrə çalışan professor-müəllim heyəti, magistr və doktorantlarla birgə elmi-tədqiqat işlərinin həyata keçirilməsi, eləcə də bu sahədə birgə təlim proqramları və “bootcamp”ların təşkili ilə bağlı əməkdaşlıq imkanlarının müzakirəsi olub. Rektor Vilayət Vəliyev Müdafiə Sənayesi Nazirliyi ilə AzTU arasında mövcud səmərəli əməkdaşlıqdan məmnunluğunu ifadə edib. Rektor qeyd edib ki, Müdafiə Sənayesi Nazirliyi ilə əlaqələrin genişləndirilməsi, xüsusilə Xüsusi texnika və texnologiya fakültəsinin MSN-in müəssisələri ilə birgə fəaliyyətinin gücləndirilməsi mühəndis kadrların hazırlığı baxımından xüsusi əhəmiyyət kəsb edir. Müdafiə Sənayesi Nazirliyinin nümayəndələri universitet-sənaye əməkdaşlığı çərçivəsində AzTU ilə birgə həyata keçirilən layihələrin önəmini vurğulayıblar. Onlar MSN tərəfindən yaxın müddətdə həyata keçirilməsi nəzərdə tutulan yeni elmi və innovativ layihə haqqında geniş məlumat veriblər. Görüşdə hər iki tərəf layihənin məqsədi, qarşıya qoyulan hədəflər və gələcək əməkdaşlıq istiqamətləri barədə ətraflı fikir mübadiləsi aparıb. Sonda layihəyə yaxın vaxtlarda birgə start verilməsi razılaşdırılıb.

Azərbaycan Texniki Universiteti (AzTU) ilə SOCAR arasında əməkdaşlıq imkanlarının genişləndirilməsi məqsədilə görüş keçirilib. Görüşdə AzTU-nun rektoru Vilayət Vəliyev və universitetin nümayəndələri, həmçinin SOCAR-ın vitse-prezidentinin müavini Aytən Fərzəliyeva, İstedadların idarə edilməsi və biznes tərəfdaşlığı departamentinin rəisi Ülkər Behbudova, SOCAR “Downstream Management”in İnsan resursları və biznes tərəfdaşlığı üzrə meneceri Nərmin Abdullayeva, həmçinin Baş ofisin İşə qəbul şöbəsinin rəisi Həmid İsrafilov iştirak ediblər. Rektor Vilayət Vəliyev son illərdə AzTU-da həyata keçirilən layihələr və universitet-sənaye əməkdaşlığı çərçivəsində görülən işlər barədə məlumat verib. Görüşdə SOCAR-a daxil olan müəssisələrdə tələbələrin istehsalat təcrübəsinin təşkili, birgə elmi-tədqiqat layihələrinin icrası, müəllim və mütəxəssislərin qarşılıqlı təcrübə mübadiləsi, eləcə də seminar və təlimlərin birgə təşkili kimi əməkdaşlıq istiqamətləri müzakirə olunub. SOCAR-ın vitse-prezidentinin müavini Aytən Fərzəliyeva şirkətin “Gənc istedadlar” proqramı, eləcə də universitetlər üçün yaradılmış imkanlar barədə məlumat verib. O, həmçinin AzTU məzunlarının SOCAR-da keçdikləri təcrübə proqramları və sonrakı işə qəbul göstəriciləri barədə məlumatları qeyd edib. Görüşün sonunda tərəflər arasında qarşılıqlı əməkdaşlığı rəsmiləşdirmək məqsədilə anlaşma memorandumunun imzalanması barədə fikir mübadiləsi aparılıb.

Almaniyanın “German Academic Exchange Service” (DAAD) mübadilə proqramı çərçivəsində “Berlin Speaking” şirkətinin təsisçisi və Potsdam Universitetinin mühazirəçisi Pascal Heyman Azərbaycan Texniki Universitetində (AzTU) səfərdə olub. Səfər çərçivəsində Pascal Heyman gənc müəllimlərin startap layihələrinin inkişafına və təqdimat bacarıqlarının gücləndirilməsinə həsr olunmuş “Pitch Training” adlı təlim keçib. AzTU-nun “SmartTech” İnnovatorlar Mərkəzinin təşkilatçılığı ilə keçirilən təlimin məqsədi iştirakçıların innovativ ideyalarını təqdim etmək, məhsul və layihələr üçün effektiv “pitch”lər hazırlamaq, eləcə də Almaniyanın startap ekosistemi barədə biliklərini artırmaq olub. İnteraktiv formatda təşkil edilən təlim müddətində iştirakçılar həm nəzəri biliklər, həm də praktiki tapşırıqlar vasitəsilə ictimai çıxış, təqdimat, bədən dili və hekayə qurmaq bacarıqlarını inkişaf etdiriblər. Sessiyalar zamanı tələbə və müəllimlər öz startap ideyalarını təqdim edərək fərdi rəy və mentor dəstəyi alıblar. Təlimin sonunda iştirakçılar öz layihə ideyaları üzrə “pitch” çıxışlarını təqdim edib, mütəxəssis tərəfindən fərdi rəy və tövsiyələr alıblar.

Azərbaycan Texniki Universitetində (AzTU) “Azərbaycanda təhsil alan əcnəbi tələbələr arasında miqrasiya qaydaları, tibbi əlçatanlıq və ölkə tanıtımı” layihəsi çərçivəsində əcnəbi tələbələrlə maarifləndirici görüş keçirilib. AzTU-nun Beynəlxalq əlaqələr şöbəsinin müdiri Orxan Vətənxah çıxış edərək yeni dərs ili ilə bağlı tətbiq edilən yeniliklər və əcnəbi tələbələr üçün yaradılan şərait barədə məlumat verib. O, Dövlət Miqrasiya Xidməti (DMX) əməkdaşlarının əcnəbi tələbələrlə görüşlərinin əhəmiyyətini vurğulayıb. “Miqrasiya Sahəsinin İnkişafı” İctimai Birliyinin sədri Vidadi Fətullayev Azərbaycanın artan beynəlxalq nüfuzu və iqtisadi inkişafı fonunda ölkədə təhsil alan əcnəbi tələbələrin sayının yüksəldiyini qeyd edib. O, bu sahədə ali təhsil müəssisələrinin və dövlət qurumlarının birgə fəaliyyətindən danışaraq tədbirin təşkilinə dəstək göstərən DMX və AzTU rəhbərliyinə təşəkkürünü bildirib. DMX-nin Hüquqi təminat idarəsinin rəis müavini Xəyalə Abbasova miqrasiya qanunvericiliyi, ölkəyə gəlmə və ölkədən getmə qaydaları, müvəqqəti yaşama və qeydiyyat prosedurları barədə ətraflı məlumat verib. O, bu prosedurların vaxtında və düzgün şəkildə yerinə yetirilməsinin vacibliyini diqqətə çatdırıb. Tədbir zamanı tələbələrin ünvanladıqları sualları DMX-nin Miqrasiya nəzarəti baş idarəsinin baş inspektoru Tural Kərimov, Miqrasiya proseslərinin təhlili və informasiya təminatı baş idarəsinin inspektoru Ayxan Rzayev və Miqrasiya proseslərinin tənzimləmə baş idarəsinin baş inspektoru Ruslan Ağayev cavablandırıb. DMX-nin əməkdaşları miqrasiya qanunvericiliyinin əcnəbi tələbələrlə bağlı müddəaları haqqında ətraflı izahlar təqdim ediblər.

Azərbaycan Texniki Universitetində (AzTU)  xalq şairi Bəxtiyar Vahabzadənin 100 illik yubileyinə həsr olunan tədbir keçirilib. AzTU-nun Humanitar fənlər kafedrası və Tələbə Həmkarlar İttifaqı Komitəsinin (THİK) birgə təşkilatçılığı ilə keçirilən tədbirin aparıcısı şair Cəbrayıl Qənbər milli poeziyamızın görkəmli nümayəndəsi Bəxtiyar Vahabzadənin 100 illik yubileyinin keçirilməsi haqqında Prezident İlham Əliyevin 2025-cü il 21 fevral tarixli Sərəncamının əhəmiyyətini qeyd edib. Diqqətə çatdırıb ki, bu Sərəncam əsasında ölkənin bütün təhsil müəssisələrində və mədəniyyət ocaqlarında şairin silsilə yubiley tədbirləri keçirilir. AzTU-nun prorektoru Rəşad Əliyev Azərbaycan poeziyasının görkəmli nümayəndəsi kimi Bəxtiyar Vahabzadə yaradıcılığının Azərbaycan ədəbiyyatına dəyərli töhfə olduğunu bildirib. Humanitar fənlər kafedrasının müdiri Həbib Mirzəyev isə vətənpərvərlik duyğuları ilə zəngin Bəxtiyar Vahabzadə irsinin Azərbaycan poeziyasının parlaq səhifələrindən birini təşkil etdiyini bildirərək qeyd edib ki, şair dərin ictimai-siyasi və poetik-fəlsəfi məzmunlu əsərləri ilə Vətənə, millətə, doğma ana dilinə sonsuz məhəbbətini ifadə edib, milli müstəqillik şüuruna, azərbyacançılıq məfkurəsinə, ümumtürk ideallarına yüksək mənada bağlığlığını nümayiş etdirib. Həmçinin o, respublikamızın çox ağır və məşəqqətli günlərində yüksək vətəndaşlıq, əsl ziyalılıq prizmasından çıxış edərək taleyüklü məsələlərin həllində cəsarətli mövqe nümayiş etdirib və bu fədakarlığı sayəsində xalqın dərin rəğbətini qazanıb. Tədbirin bədii hissəsində Azərbaycanın və Özbəkistanın Xalq artisi Gülyanaq Məmmədova Bəxtiyar Vahabzadənin şeirlərinə bəstələnmiş sevilən musiqi nömrələri ilə tədbir iştirakçılarına xoş bir ovqat  bəxş edib. Sonra AzTU-nun məzunu, "TRT Müzik" kanalında yayımlanan "Ben şarkı söylersem" musiqi yarışmasının qalibi Fərhad Rəhimli, ADMİU-nun tələbəsi Ceyran Abbaslı, AzTU-nun tələbələri Əlican Əliyev, Lamiyə Zahidova və Maksim Frolov şairin sözlərinə yazılmış mahnıları ifa ediblər. Daha sonra Bəxtiyar Vahabzadənin poeziya nümunələrindən “Axı dünya fırlanır...”, “Qocalmır”, “Bir salama dəymədi”, “Uşaqlıq”; “Muğam”, “Unutmaq istərəm...”, “Bayraq” şeirləri qiraətçi Cəbrayıl Qənbər, dosent Həbib Mirzəyev, tələbələr Durna Həsənli, Fatih Emir Torun və Canpolad Quliyev tərəfindən  səsləndirilib. Tədbir zamanı Bəxtiyar Vahabzadənin həyat və yaradıcılığını, o cümlədən ulu öndər Heydər Əliyevin şair haqqında fikirlərini əks etdirən videoçarx nümayiş etdirilib. Həmçinin şairin “Azərbaycan-Türkiyə” və “Torpaqdan pay olmaz!” kimi şeirləri Türkiyə Cünhuriyyətinin Prezidenti Rəcəb Tayyib Ərdoğanın ifasında ekranda nümayiş etdirilməklə tədbr iştirakçılarının diqqətinə çatdırılıb.  Tədbirin sonunda Xalq artisti Gülyanaq Məmmədovaya və aparıcı - qiraətçi, şair Cəbrayıl Qənbərə AzTU rəhbərliyi adından təşəkkürnamə təqdim edilib. Tədbir şairin sözlərinə bəstələnmiş “Azərbaycan” mahnısının sədaları altında yekunlaşıb.