Azərbaycan Texniki Universitetinin (AzTU) rektoru Vilayət Vəliyevin rəhbərlik etdiyi nümayəndə heyəti “Quacquarelli Symonds” (QS) reytinq agentliyinin “Ali Təhsil Pre-sammiti: Asiya regionu 2024” tədbirində iştirak çərçivəsində Qazaxıstan Respublikasının Almatı şəhərində yerləşən qabaqcıl universitetlərdə işgüzar səfərdə olub. Nümayəndə heyətində elm və innovasiyalar üzrə prorektor Sübhan Namazov, beynəlxalq əlaqələr üzrə prorektor Fariz Məmmədov və Tədqiqat və inkişaf şöbəsinin müdiri Bəxtiyar Bədəlov təmsil olunub. Səfərin əsas məqsədi AzTU-nun Qazaxıstanın beynəlxalq reytinqlərdə, xüsusilə “Quacquarelli Symonds” (QS), habelə digər qlobal və regional universitet reytinqlərində yüksək mövqedə olan universitetləri ilə əməkdaşlıqların genişləndirilməsi, tədqiqat və təhsil layihələrinin yerinə yetirilməsi sahəsində birgə fəaliyyətlərin həyata keçirilməsindən ibarət olub. Rektor Vilayət Vəliyev Almatı Energetika və Telekommunikasiya Universiteti, K.İ.Satbayev adına Qazax Milli Tədqiqat Texniki Universitetinin rektorları və digər rəhbər heyəti ilə görüşlər zamanı AzTU barədə təqdimatla çıxış edərək ikitərəfli tədqiqat layihələrinin yerinə yetirilməsi, qarşılıqlı müəllim-tələbə mübadiləsi, beynəlxalq və regional layihələrin həyata keçirilməsi, birgə elmi məqalələrin nəşri, magistrant və doktorantlar üçün ikili elmi rəhbərliklərin reallaşdırılması istiqamətində əməkdaşlıqda maraqlı olduğunu vurğulayıb. Tərəflər hər bir universitetin xüsusiyyətlərinə uyğun gələcək fəaliyyətlərlə bağlı yol xəritəsinin hazırlanması barədə razılığa gəlib. Qazaxıstan universitetlərinin rektorları AzTU ilə əməkdaşlıqda maraqlı olduqlarını bildiriblər. Səfər çərçivəsində AzTU ilə Almatı Energetika və Telekommunikasiya və K.İ.Satbayev adına Qazax Milli Tədqiqat Texniki Universitetləri arasında ikitrəfli Anlaşma Memorandumları imzalanıb. Tərəflər iki və çoxtərəfli əlaqələrin qurulmasında maraqlı olduqlarını vurğulayıblar.

Azərbaycan Texniki Universitetinin (AzTU) rektoru Vilayət Vəliyevin rəhbərlik etdiyi nümayəndə heyəti “Quacquarelli Symonds” (QS) beynəlxalq reytinq agentliyinin təşkilatçılığı ilə Qazaxıstan Respublikasının Almatı şəhərində Əl-Fərabi adına Qazax Milli Universitetində keçirilən Avropa və Asiyanın qabaqcıl universitetlərinin iştirak etdiyi “Ali Təhsil Pre-sammiti: Asiya regionu 2024”  sammitində iştirak edib. Nümayəndə heyətində elm və innovasiyalar üzrə prorektor Sübhan Namazov, beynəlxalq əlaqələr üzrə prorektor Fariz Məmmədov və Tədqiqat və inkişaf şöbəsinin müdiri Bəxtiyar Bədəlov təmsil olunub. Rektor Vilayət Vəliyev sammitin “Beynəlxalq məqsədlərin təhsilə İnteqrasiyası” adlı panelində spiker qismində “Mühəndislik təhsilinin beynəlxalq çağırışlara uyğun dizaynı” mövzusunda məruzə ilə çıxış edib.  O, AzTU nümunəsində yerinə yetirilən fəaliyyətlər və Dayanıqlı İnkişaf Məqsədləri (SDG) istiqamətində perspektivlər barədə fikirlərini bölüşüb. Sammit çərçivəsində AzTU-nun elmi, tədris, tədqiqat sahəsindəki beynəlxalq reytinqinin yüksəldilməsi məqsədilə ikitərəfli əlaqələr qurulması üçün iştirakçı universitetlərlə görüş və müzakirələr həyata keçirilib.

Azərbaycan Texniki Universitetində (AzTU) İqlim Dəyişikliyi Sammiti keçirilib. Sammitdə Azərbaycan və Türkiyədən olan gənclər və alimlər bir araya gəlib. Zirvənin məqsədi COP29 konfransına qədər gənclərin iqlim dəyişikliyi haqqında məlumatlılığını artırmaq, onları iqlimlə mübarizədə fəal olmağa təşviq etmək və davamlı həllər istehsal etmək üçün onları gücləndirməkdir. Sammit Türkiyənin Bahçeşehir Universiteti, Bilimsenol Platforması ilə əməkdaşlıq və müxtəlif qeyri-hökumət təşkilatlarının iştirakı ilə keçirilib. Tədbir gənc iştirakçılara öz bilik və təcrübələrini bölüşmək və yeni əməkdaşlıqlar inkişaf etdirmək imkanı təqdim edib. AzTU-nun prorektoru professor Nurəli Yusifbəyli sammitin əhəmiyyətindən danışıb. Bahçeşehir Universiteti rektorunun müşaviri İhsan Alpargın sammit Türkiyə və Azərbaycan gənclərinin regional və beynəlxalq mövzularda birgə həll yolu tapmaq üçün önəmli platforma olduğunu deyib. Sammit lisey şagirdlərinin iqlim dəyişikliyinə həsr etdikləri səhnəciklər və maraqlı təqdimatlarla davam edib.

Azərbaycan Texniki Universitetinin (AzTU) “AzTU6” komandası “49-cu ICPC - Tələbələrin Beynəlxalq Proqramlaşdırma Müsabiqəsi”nin yarımfinalına vəsiqə qazanıb. “AzTU6” komandası 13-15 dekabr 2024-cü il tarixində Gürcüstanda keçiriləcək “49-cu ICPC - Tələbələrin Beynəlxalq Proqramlaşdırma Müsabiqəsi”nin yarımfinal mərhələsində və Cənubi Qafqaz açıq çempionatında (komanda və fərdi) iştirak edəcək. Xatırladaq ki, 23 ali təhsil müəssisəsindən ümumilikdə 174 komandanın qatıldığı müsabiqənin səkkizdəbir final mərhələsində AzTU-nun “AzTU6” və “AzTU2” komandaları seçilərək dörddəbir final mərhələsinə vəsiqə qazanıb. 22 ali təhsil müəssisəsindən hər biri 3 tələbədən və 1 liderdən ibarət 51 komandanın iştirakı ilə keçirilən dörddəbir final mərhələsində isə “AzTU6” komandası yarımfinalda iştirak hüququnu rəsmiləşdirib. AzTU-nu müsabiqədə SmartTech İnnavatorlar Mərkəzinin əməkdaşı, Mühəndis riyaziyyatı və süni intellekt kafedrasının baş müəllimi Vüqar Hüseynli, SmartTech İnnavatorlar Mərkəzinin əməkdaşı Kənan Əsgərli və AzTU SABAH qruplarının dekanı Aytən Sadıqovanın rəhbərliyi ilə 15 komanda təmsil edib.  

Mobil rabitə bazarında sərfəli təklifləri və təhsilə verdiyi önəmlə tanınan “Nar”, ölkədə rəqəmsal biliklərin inkişafını dəstəkləyən layihələrə davam edir. “Nar”ın korporativ sosial məsuliyyət strategiyasına uyğun olaraq, telekommunikasiya ixtisasları üzrə təhsil alan tələbələrə davamlı olaraq “Mobil rabitənin əsasları” təlimi keçilir.  “Nar” texniki heyətinin hazırladığı və keçdiyi bu təlim mobil rabitə sahəsinin yerli peşəkarlarını hazırlamağı və tələbələrin məzun olduqdan sonra uğurlu karyera qurmasını hədəfləyir. Azərbaycan Texniki Universitetində (AzTU) keçilən budəfəki təlimin mövzuları mobil texnologiyanın təkamülü, mobil rabitə şəbəkəsinin quruluşu, əşyaların interneti (IoT), 5-ci nəsil texnologiya, mobil rabitənin strukturu, naqilsiz transmissiya şəbəkəsi, mobil rabitədə tezliklər kimi mövzuları əhatə edib.

Azərbaycan Texniki Universitetinin (AzTU) rektoru Vilayət Vəliyevin rəhbərlik etdiyi nümayəndə heyəti Özbəkistan Respublikasının qabaqcıl universitetlərində işgüzar səfərdə olub. Nümayəndə heyətində elm və innovasiyalar üzrə prorektor Sübhan Namazov, beynəlxalq əlaqələr üzrə prorektor Fariz Məmmədov və Tədqiqat və inkişaf şöbəsinin müdiri Bəxtiyar Bədəlov təmsil olunub. Səfərdə əsas məqsəd AzTU-nun Özbəkistanın beynəlxalq reytinqlərdə, xüsusilə “Quacquarelli Symonds” (QS), habelə digər qlobal və regional universitet reytinqlərində yüksək mövqedə olan universitetləri ilə əməkdaşlıqlarının genişləndirilməsi, tədqiqat və təhsil layihələrinin yerinə yetirilməsi sahəsində birgə fəaliyyət platformalarının qurulmasından ibarət olub. Rektor Vilayət Vəliyev Daşkənd Dövlət Texniki Universiteti, Daşkənd Milli Universiteti, Daşkənd Turin Politexnik Universiteti, Milli Tədqiqat İnstitutu, Daşkənd Kənd Təsərrüfatı İrriqasiya və Mexanizasiya Mühəndisləri İnstitutu, Daşkənd Dövlət Nəqliyyat Universiteti, Daşkənd İnha Universiteti, Kimya Texnologiya İnstitutu, Yeni Əsr Universitetinin rektorları və rəhbər heyəti ilə görüşüb. Görüşlər zamanı AzTU barədə geniş təqdimatla çıxış edən rektor ikitərəfli tədqiqat layihələrinin yerinə yetirilməsi, qarşılıqlı müəllim-tələbə mübadiləsi, beynəlxalq və regional layihələrin həyata keçirilməsi, birgə elmi məqalələrin yazılması, ikili diplom və elmi rəhbərliklərin reallaşdırılması istiqamətində əməkdaşlıqda maraqlı olduğunu vurğulayıb. Tərəflər hər bir universitetin xüsusiyyətlərinə uyğun gələcək fəaliyyətlər üçün yol xəritəsinin hazırlanması barədə razılığa gəliblər. Özbəkistan tərəfdən universitetlərin rektorları AzTU ilə əməkdaşlıqda maraqlı olduqlarını bildiribər. Səfər çərçivəsində Daşkənd Dövlət Texniki Universiteti, Daşkənd Milli Universiteti, Daşkənd Turin Politexnik Universiteti ilə AzTU arasında Anlaşma Memorandumları imzalanıb. Tərəflər iki və çoxtərəfli əlaqələrin qurulmasında maraqlı olduqlarını vurğulayıblar.

Azərbaycan Texniki Universiteti (AzTU) və Daxili İşlər Nazirliyinin Baş Narkotiklərlə Mübarizə İdarəsinin birgə təşkilatçılığı ilə “Narkotik vasitələrdən və psixotrop maddələrdən istifadənin fəsadları, həmçinin onların qanunsuz dövriyyəsi haqqında qanunvericiliyin tələbləri” mövzusunda AzTU tələbələri üçün maarifləndirici tədbir keçirilib. Tədbirdə çıxış edən AzTU-nun Kommunikasiya şöbəsinin müdiri Səfa Bağırov narkotik vasitələrdən istifadənin insan həyatı üçün təhlükəsindən danışıb. O, tələbələri pis vərdişlərdən uzaq olmağı, onlara elm öyrənməyi, idmanla məşğul olmağı və digər faydalı işlərə maraq göstərməyi tövsiyə edib. Daxili İşlər Nazirliyinin Baş Narkotiklərlə Mübarizə İdarəsinin əməkdaşı Natiq İsbatov tələbələrə narkotik vasitələrdən və psixotrop maddələrdən istifadənin fəsadlarını ətraflı izah edib. Natiq İsbatov gənclərin bu istiqamətdə mütəmadi maarifləndirilməsinin vacibliyini qeyd edib. Bildirib ki, AzTU narkomaniyaya qarşı mübarizə ilə bağlı tələbələr arasında maarifləndirmə aparan ali təhsil müəssisələrindəndir. Tədbir tələbələrin “Narkomaniya ilə mübarizə” mövzusunda hazırladıqları videoçarxın nümayişi ilə başa çatıb. 

Azərbaycan Texniki Universitetində (AzTU)  “Azərbaycanda su ehtiyatları: problemlər və yeni çağırışlar” mövzusunda respublika elmi-texniki konfransı keçirilib. Konfransda su sahəsi üzrə tədqiqat aparan alimlər, tədqiqatçılar, professorlar, dövlət qurumlarının, eləcə də müxtəlif şirkətlərin təmsilçiləri iştirak ediblər.  AzTU-nun tədris işləri üzrə prorektoru professor Nurəli Yusifbəyli Bakıda keçiriləcək COP29 tədbirləri çərçivəsində bu cür konfransların keçirilməsinin  əhəmiyyətini, su ehtiyatlarının və ekologiyanın qorunmasının vacibliyini vurğulayıb. Daha sonra Kənd Təsərrüfatı Nazirliyinin Torpaqdan istifadəyə nəzarət şöbəsinin müdiri Firudin Tağıyev konfrans iştirakçılarını salamlayıb və məruzəçilərə uğurlar diləyib. Daha sonra çıxış edənlər su ilə bağlı ölkədə görülmüş işlərə, problemlərə və həll yollarına diqqət çəkiblər. Məruzəçilər konfrans iştirakçılarını Azərbaycanda su ehtiyatlarını qənaətlə və düzgün istifadə etməyə çağırıblar. Onlar çıxışlarında ölkədə su ehtiyatlarını qorumaq üçün tədbirlərin sayını artırmaq, yeni avadanlıqlar almaq, onları iş mühitlərinə inteqrasiya etmək, çirkli suları şirin sulardan  təmizləmək, eləcə də suvarma zamanı su itkisinin qarşısını almaq üçün daha ağıllı texnologiyaların tətbiqini vacib sayıblar. Elmi-texniki konfrans plenar iclaslarla davam edib.

Elm və Təhsil Nazirliyinin və COP29 Sədrliyinin dəstəyi, “STEAM Azərbaycan” layihəsinin təşkilatçılığı ilə keçirilən Beynəlxalq Yaşıl STEAM Azərbaycan Festivalı keçirilib. Beynəlxalq müsabiqədə Azərbaycan Texniki Universitetinin (AzTU) SABAH qrupları tələbəsi Əliyoldaş Əmiraslanlı və Alman mühəndislik fakültəsinin tələbəsi Anabacı Əmiraslanova "Yaşıl Təşəbbüslər" kateqoriyası üzrə ixtira etdikləri “CO2toD” qurğusu ilə təmsil olunublar. Münsiflərin qərarına görə, AzTU tələbələrinin layihəsi birinci yerə layiq görülüb.  Müsabiqədə tələbələrin mentoru AzTU-nun Mühəndis fizikası və elektronika kafedrasının professoru Mehriban Həsənova olub. Qeyd edək ki, builki festivalın final mərhələsinə ümumilikdə 244 komanda üzrə 900-dən çox iştirakçı qatılıb və onlardan 146-sı Böyük Britaniya, Türkiyə, Pakistan, Türkmənistan, Qazaxıstan, Çexiya, Slovakiya və ABŞ də daxil olmaqla 15 ölkəni təmsil edib. Məzmunun hazırlanması və iştirakçıların qiymətləndirilmə prosesində Danimarka, Slovakiya, Kanada və Türkiyə daxil olmaqla, ümumilikdə 10 müxtəlif ölkədən 17 münsif iştirak edib.

Azərbaycan Təhsil İşçiləri Azad Həmkarlar İttifaqı Respublika Komitəsinin sədri Araz Paşayev Azərbaycan Texniki Universitetinin (AzTU) rektoru Vilayət Vəliyev və universitetin kollektivi ilə görüşüb. Tədbirdə çıxış edən AzTU-nun rektoru Vilayət Vəliyev universitetin həyatında Həmkarlar İttifaqı Komitəsinin (HİK) rolundan söz açıb. O, universitetlə HİK arasında imzalanan kollektiv müqavilə əsasında işçilərin əmək şəraitinin yaxşılaşdırılması, əmək hüquqlarının qorunması istiqamətində bundan sonra da birgə fəaliyyət göstərəcəklərini qeyd edib.Daha sonra AzTU HİK sədri Elvin Bəxtiyarlı və Tələbə Həmkarlar İttifaqı Komitəsinin (THİK) sədri Mirməhəmməd Ələkbərli müvafiq olaraq rəhbərlik etdikləri komitələrin fəaliyyətləri və gələcək hədəfləri ilə bağlı geniş təqdimatla çıxış ediblər.Hesabat məruzələrindən sonra çıxış edən Azərbaycan Təhsil İşçiləri Azad Həmkarlar İttifaqı Respublika Komitəsinin sədri Araz Paşayev rektor Vilayət Vəliyevə HİK-in işinin yüksək səviyyədə qurulmasına verdiyi dəstəklərə görə təşəkkürünü bildirərək, hər iki sədrin hesabat məruzəsini müsbət qiymətləndirdiyini və qarşıya qoyulan hədəflərin yüksək səviyyədə icrası məqsədilə Respublika Komitəsi olaraq hər zaman dəstək göstərəcəklərini qeyd edib. Araz Paşayev deyib ki, Respublika Komitəsinin fəaliyyət istiqaməti ittifaq üzvlərinin əmək hüquqlarının və sağlamlıqlarının müdafiəsilə yanaşı onların idealarına, həmçinin əmək bazarının tələblərinə uyğun kadr hazırlığına dəstək verməkdir.Sonda oktyabr ayında yubileyləri olan universitet əməkdaşları AzTU-nun rektoru və Azərbaycan Təhsil İşçiləri Azad Həmkarlar İttifaqı Respublika Komitəsi sədri tərəfindən fəxri fərman və hədiyyələrlə təltif edilib.