AzTU-nun Elmi şurasının növbəti iclası keçirilib. İclasda son 4 il ərzində AzTU-da CAD/CAM/CAE proqram təminatı əsaslı mühəndis hazırlığı üzrə görülən işlər dəyərləndirilib. Qeyd olunub ki, AzTU-nun 2022-ci ildə CDIO universitetlər ailəsinə qoşulması mühəndis hazırlığında əsas mərhələ olub. Mühəndis hazırlığı proqramı layihələndirmə, simulyasiya, prototipləndirmə və istehsal zənciri həlqələrini əhatə edir. Odur ki, proqram bu sahədə zəngin təcrübə və resursa malik Türk Aviasiya və Kosmik Sənaye Şirkətinin (TUSAŞ) xüsusi təcrübə proqramı əsasında Milli Aviasiya Akademiyası (MAA) ilə birgə həyata keçiriləcək. Qeyd edilib ki, sentyabrın 18-də AzTU, MAA və TUSAŞ-ın birgə əməkdaşlığı çərçivəsində başladılan “AzTU-Turkish Aerospace, MGP 2023.1” adlı proqram layihə əsaslı öyrənmə-öyrətmə modelinə söykənir. AzTU-nun Universitet-Sənaye Əməkdaşlığı və Ömürboyu Təhsil Mərkəzinin koordinatorluğu ilə həyata keçirilən proqramda baza təhsilləri aerokosmik mühəndislik, informasiya texnologiyaları, mexatronika, maşın mühəndisliyi, elektrik-elektronika, xəbərləşmə (radioelektronika), metallurgiya və s. istiqamətlər olan namizədlər iştirak edir. Hər bir akademik il çərçivəsində 100 nəfərədək, 2030-cu ilədək isə ümumilikdə ən azı 1000 tələbənin hazırlanması nəzərdə tutulur. İclasda SmartTECH İnnovatorlar Mərkəzinin yaradılması ilə bağlı da qərar qəbul edilib. Bildirilib ki, mərkəz istedadlı tələbələrin (olimpiadalarda, startaplarda və s.) seçilməsi, onların inkişafına dəstək verilməsi, həmçinin innovasiyalara cəlb edilməsi üçün yaradılır.

“CIDC 2023” tədbiri çərçivəsində kiberhücumların simulyasiyası ilə keçiriləcək "Kibermüharibə" yarışına qeydiyyat başa çatıb. Yarışda 41 komanda iştirak edəcək. 3 mərhələdə keçiriləcək yarışının ilk 2 mərhələsi sentyabr ayında onlayn, 3-cü mərhələsi isə 26-27 oktyabr tarixlərində 20 finalçı komanda ilə "Baku Convention Center"də "onsite" formatda təşkil olunacaq. Qeyd edək ki, yarışda Azərbaycan Texniki Universitetinin (AzTU) komandası da iştirak edəcək. Qeydiyyatı təsdiqlənmiş komandaların siyahısını təqdim edirik: 1. Azərbaycan Respublikası Prezidentinin İşlər İdarəsi - "0x5041" 2. Azərbaycan Respublikasının Baş Prokurorluğu - "Bas Prokurorluq" 3. Prezident Təhlükəsizlik Xidməti - "Iron Fist" 4. Azərbaycan Respublikası Müdafiə Nazirliyi - "MoD of Azerbaijan" 5. Azərbaycan Respublikası Ədliyyə Nazirliyi - "CyberJustice" 6. Fövqəladə Hallar Nazirliyi - "1 Group" 7. Azərbaycan Respublikasının İqtisadiyyat Nazirliyi - "Cyber Force" 8. Rəqəmsal İnkişaf və Nəqliyyat Nazirliyi - "Digital Rangers" 9. Əmək və Əhalinin Sosial Müdafiəsi Nazirliyi - "KiberDost" 10. Azərbaycan Respublikası Elm və Təhsil Nazirliyi - "TechLockDown" 11. Azərbaycan Respublikası Səhiyyə Nazirliyi - "SN" 12. Azərbaycan Respublikası Dövlət Sərhəd Xidməti - "DSX" 13. Vətəndaşlara Xidmət və Sosial İnnovasiyalar üzrə Dövlət Agentliyi - "AS4NS3C" 14. Naxçıvan Muxtar Respublikası Rabitə və Yeni Texnologiyalar Nazirliyi - "Alinja-Gala Cyber Wizards" 15. Dövlət Gömrük Komitəsi - "Customs" 16. Azərbaycan Respublikasının Mərkəzi Bankı - "CBAR_Team" 17. Azərbaycan Respublikası Dövlət Neft Şirkəti - "UEIB" 18. Azərbaycan İnvestisiya Holdinqi - "AİH" 19. Azərbaycan Dövlət Su Ehtiyatları Agentliyi - "ADSEA" 20. Şirvan Şəhər İcra Hakimiyyəti - "BRAVE" 21. Azercell - "CyberCell" 22. AZINTELECOM - "Seclusion" 23 Azerconnect - "CevahirTeam" 24 Simbrella Bakı LLC - "SIMOPS" 25. Global Service Provider - "NetVault31337" 26. PASHA Bank - "Old School" 27. Expressbank - "Xpr3ss1337" 28. Azer Turk Bank - “Bastion” 29. AFB BANK ASC - "AzeIntruders" 30. Bank "BTB" - "Bank BTB" 31. Unibank - "UniCyberWarriors" 32. Kapital Bank - "CyberKapitalists" 33. Xalq Bank - "XSecurity" 34. Muganbank - "MuganSec" 35. PASHA Technology LLC - "This is the way" 36. Azərbaycan Kibertəhlükəsizlik Mərkəzi (İnnovasiya və Rəqəmsal İnkişaf Agentliyi) - "ACC Predators" 37. ADA Universiteti - "Firewall Force" 38. Azərbaycan Dövlət Pedaqoji Universiteti - "Müəllimlər" 39. French-Azerbaijani University - UFAZ - "CyberSiege" 40. Bakı Ali Neft Məktəbi - "Squadron" 41 Azərbaycan Texniki Universiteti – “AzTU- SEC”

Azərbaycan Texniki Universitetinin (AzTU) Radiotexnika və telekommunikasiya kafedrasının professoru, texnika elmləri doktoru İslam İslamovun monoqrafiyası dünyanın ən nüfuzlu beynəlxalq elmi nəşriyyatlarından olan “Springer”də ingilis dilində nəşr olunub. “Radio Engineering and Telecommunications Waveguide Systems in the Microwave Range - Modeling and Synthesis” (Dalğaötürən tipli ifrat yüksək tezlik diapazonlu radiotexniki və telekommunikasiya sistemləri - modelləşdirilmə və sintez) adlı monoqrafiya radiotexnika və telekommunikasiya üzrə elmi-tədqiqat əsəridir. AzTU professorunun monoqrafiyası Azərbaycan üzrə bu sahədə “Springer” nəşriyyatında çap olunan ilk nəşrdir. Monoqrafiyada düzbucaqlı və dairəvi dalğaötürən tipli ifrat yüksək tezlik diapazonlu radiotexniki və telekommunikasiya sistemlərinin modelləşdirilməsi və sintezi üçün ədədi üsullar sistemləşdirilib və bu sistemlərin analizi, optimal sintezinin nəzəri əsasları verilib, yeni tədqiqat nəticələri təqdim olunub. E-tip və H-tip dalğalarında işləyən ifrat yüksək tezlik diapazonlu sistemlərin analizi, optimallaşdırılması və sintezi üçün ilk dəfə olaraq HFSS kompleksindən istifadə edilib. Analiz və sintez nəticəsində texniki və istismar parametrləri yaxşılaşdırılan ifrat yüksək tezlik diapazonlu müxtəlif qurğular işlənib hazırlanıb və onlar əsasında televiziya qüllələrində verici ilə anteni birləşdirən yeni dalğaötürən trakt sistemi təklif edilib. Monoqrafiya radiotexnika və telekommunikasiya sistemlərinin layihələndirilməsi ilə məşğul olan mühəndis-texniki və elmi işçilər üçün nəzərdə tutulub. Nəşrdən tələbə, magistrant və doktorantlar da yararlana bilərlər.

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “İnnovasiyalar Mərkəzi”nin, “Bilişim Vadisi Bakı”nın və  Azərbaycan Texniki Universitetinin birgə təşkilatçılığı,  Veysəloğlu Şirkətlər Qrupunun, “Code Academy” şirkətinin və “IBIS Baku City Hotel”in dəstəyi ilə həyata keçirilən “DIGIAGE - Bakı” rəqəmsal oyun düşərgəsinin bağlanış tədbiri keçirilib. Tədbirdə Dövlət Agentliyinin sədr müavini Ceyhun Salmanov, Türkiyənin Azərbaycandakı səfiri Cahit Bağçı,  “İnnovasiyalar Mərkəzi”nin direktoru Vüsal Rüstəmov, Azərbaycan Texniki Universitetinin rektoru Vilayət Vəliyev, Türkiyə Sənaye və Texnologiya Nazirliyinin Bilişim Vadisinin direktoru Serdar İbrahimcioğlu, “DIGIAGE” şirkətinin direktoru Emre Yıldız və digər şəxslər iştirak ediblər. Tədbirdə “DIGIAGE - Bakı” rəqəmsal oyun düşərgəsinin ən uğurlu komandaları haqqında videoçarx nümayiş olunub. Komandalar investorlar və münsiflər qarşısında düşərgə müddətində hazırladıqları oyunlarını təqdim ediblər.  14 komandadan müvafiq potensiallı hesab olunan 5-nə investisiya ayrılacaq və Bilişim Vadisi Bakı kampusunda ödənişsiz ofis imkanları veriləcək. Ümumilikdə 14 komandadan 11-nə isə Bilişim Vadisi tərəfindən mentorluq dəstəyi verilməklə investisiya potensiallarının artırılmasına dəstək göstəriləcək. 4 gün davam edən düşərgədə 267 müraciətçidən qəbul mərhələlərini tamamlayan 92 iştirakçı komanda və ya fərdi formada iştirak edib. İştirakçılara oyun hüququ və şirkətləşmə, bu sektorda karyera imkanları barədə məlumat verilib, “Game Art” oyun yaratma  təlimləri keçirilib, həmçinin tanınmış şirkət və oyun dizaynerlərinin motivasiya xarakterli hekayələri paylaşılıb.  Həmçinin komandaların ilkin kapital qazanmasına şərait yaratmaq məqsədilə Türkiyədən dəvət olunmuş investorlar layihələrlə tanış olub, onların investisiya imkanlarını dəyərləndiriblər. Düşərgənin məqsədi peşəkar mentorların iştirakı ilə istedadlı gənclərin oyun hazırlamalarına şərait yaratmaq, layihələrini tanıtmaqdır. Həmçinin dünya bazarına çıxmaq imkanları ilə bağlı onların təcrübə əldə etmələrinə və yeni təşəbbüslərə imza atmalarına dəstək olmaq əsas hədəflərdir.

Avropa Birliyinin maliyyələşdirdiyi “Erasmus+KA2” proqramı çərçivəsində həyata keçirilən  (618860-EPP-1-2020-1-EL-EPPKA2-CBHE-JP)  “Rusiya Federasiyası, Qazaxıstan və Azərbaycanda səhiyyədə strateji keyfiyyət menecmenti və risklərin idarə olunması üzrə açıq və distant təhsil formatında peşə bakalavrı və magistr hazırlığı” (LMQS) layihəsi çərçivəsində beynəlxalq koordinasiya şurasının görüşü keçirilib. Görüş layihənin koordinatoru Yunanıstanın Qərbi Attika Universitetinin təşkilatçılığı və Fransanın Cote d'Azur Universitetinin ev sahibliyi ilə təşkil olunub.  Görüşdə layihənin Avropa, həmçinin Qazaxıstan və Azərbaycandan olan tərəfdaşlarının nümayəndələri də iştirak ediblər. Səfərdə Azərbaycan Texniki Universitetini (AzTU) layihənin koordinatoru professor Həsən Hüseynov təmsil edib. Görüş zamanı layihə çərçivəsində reallaşdırılan fəaliyyətlərin tapşırıqlara uyğunluğu və Qazaxıstan universitetlərinə göstərilən pedaqoji və metodoloji dəstək üzrə müzakirələr aparılıb, həmçinin Azərbaycandan və Qazaxıstandan olan universitetlərin fəaliyyətinə dair təqdimatlar keçirilib. Nümayəndələr qarşıda icrası gözlənilən tapşırıqları müzakirə edərək beynəlxalq koordinasiya şurasının növbəti görüşünün Azərbaycanda keçirilməsi ilə bağlı razılığa gəliblər.  

Türkiyənin Ankara Universitetinin Tətbiqi elmlər fakültəsinin dekanı, Daşınmaz Əmlakın İnkişafı və İdarəedilməsi bölümünün müdiri professor Harun Tanrivermiş və fakültənin professoru Mustafa Tombul Azərbaycan Texniki Universitetinin (AzTU) qonağı olub. Qonaqlar AzTU-nun rektoru Vilayət Vəliyev və universitetin nümayəndələri ilə görüşüblər. Görüş zamanı Ankara Universitetinin Tətbiqi elmlər və AzTU-nun İqtisadiyyat və idarəetmə fakültələrinin bakalavr və magistr hazırlığı istiqamətində birgə proqramlarda iştirakı ilə bağlı fikir mübadiləsi aparılıb. Bundan başqa, daşınmaz əmlakın idarəedilməsi, layihələrin qiymətləndirilməsi və digər sahələrdə Ankara Universiteti ilə birgə tədqiqatların aparılması da müzakirə olunub. 

Azərbaycan Texniki Universitetində (AzTU) “DİGİAGE - Bakı” rəqəmsal oyun düşərgəsinə start verilib. 4 gün davam edəcək düşərgə Vətəndaşlara Xidmət və Sosial İnnovasiyalar üzrə Dövlət Agentliyinin “İnnovasiyalar Mərkəzi”nin, “Bilişim Vadisi Bakı”nın və AzTU-nun birgə təşkilatçılığı, “Code Academy” şirkətinin, Veysəloğlu Şirkətlər Qrupunun və “IBIS Baku City Hotel”in dəstəyi ilə həyata keçirilir. Açılış mərasimində AzTU-nun rektoru Vilayət Vəliyev, “İnnovasiyalar Mərkəzi”nin direktoru Vüsal Rüstəmov, “Bilişim Vadisi Bakı”nın direktoru Qamət Kərimov, “Code Academy”nin rəhbəri Ülvi Aslanov, Veysəloğlu Şirkətlər Qrupunun İnformasiya texnologiyaları direktoru Ülvi Babaşov çıxış edərək düşərgənin işinə uğurlar arzu ediblər. Düşərgənin məqsədi peşəkar mentorların iştirakı ilə istedadlı gənclərin oyun hazırlamalarına şərait yaratmaq, layihələrini tanıtmaqdır. Həmçinin dünya bazarına çıxmaq imkanları ilə bağlı onların təcrübə əldə etmələrinə və yeni təşəbbüslərə imza atmalarına dəstək olmaq əsas hədəflərdir. Müraciət edən 267 nəfərdən qəbul mərhələlərini tamamlayan 92 iştirakçı komanda və ya fərdi formada düşərgədə iştirak edəcək. Düşərgə 2023-cü ildə “İnnovasiyalar Mərkəzi”, “Bilişim Vadisi Bakı” və “Code Academy” arasında imzalanan əməkdaşlıq memorandumuna əsasən təşkil olunub. Memorandumların məqsədi texnoloji bacarıqların birgə inkişaf etdirilməsi, təlimlərin keçirilməsidir. Eyni zamanda ölkəmizdə innovativ həllərin tətbiqinə və inkişafına təkan verəcək hakaton, butkamp modeli əsasında birgə layihələrin hazırlanması prioritetlərdir. 8-ci dəfədir təşkil olunan “DIGIAGE” düşərgəsinə bu günə qədər 18 mindən çox müraciət əsasında 4000-dən çox iştirakçı qatılıb. 70-dən çox komandanın 10-dan çoxu şirkətləşib və 7 komandaya 250 000 dollarlıq investisiya edilib. Əsas hədəflər oyun sektorunda inkişaf etmək istəyən fərdi iştirakçılara, komandalara, şirkətlərə mentorluq dəstəyi göstərmək və investisiya əsasında ekosistemi böyütməkdir.

Azərbaycan Texniki Universitetinin (AzTU) Mexatronika və maşın dizaynı kafedrasının dosenti Nigar Zeynalova uzunsürən xəstəlikdən sonra 52 yaşında vəfat edib. Nigar Zeynalova 1992-ci ildə Azərbaycan Politexnik İnstitutunun (indiki AzTU) Avtomatika və hesablama texnikası fakültəsini bitirib. 1992-ci ildən universitetdə müxtəlif vəzifələrdə çalışıb.   Nigar Zeynalova çoxsaylı metodik vəsait və fənn proqramının müəllifi idi. AzTU-nun rəhbərliyi və kollektivi Nigar Zeynalovanın vəfatından kədərlənir, ailəsinə və yaxınlarına başsağlığı verir. Allah rəhmət eləsin!

Azərbaycan Texniki Universitetinin (AzTU) Beynəlxalq əlaqələr şöbəsinin müdiri Orxan Vətənxah və Universitet Sənaye Əməkdaşlığı və Ömurboyu Təhsil Mərkəzinin müdiri Aynurə İsmayılova Estoniyanın Tallin Texnologiya Universitetində (Taltech) səfərdə olub. “Azərbaycan ali təhsil müəssisələrində davamlı sahibkarlıq ekosisteminin gücləndirilməsi” (ENGAGE) layihəsi çərçivəsində təşkil edilən səfərin əsas məqsədi sahibkarlıq təhsilinin inkişaf etdirilməsi və ali təhsildə sahibkarlıq mühitinin formalaşdırılması üzrə Estoniya təcrübəsinin öyrənilməsi olub.   Səfərin ilk günü Taltech universitetinin rektoru professor Tiit Land qonaqlara universitet haqqında ətraflı məlumat verib. Təlim proqramı çərçivəsində peşəkar mütəxəssislər tərəfindən təqdimatlar həyata keçirilib. Təlimlər sahibklarlığın kurrikuluma inteqrasiyası, sahibkarlıq əlaqələrinin və sahibkarlıq təhsilinin sistemli inkişafı, Estoniya Tədqiqat və İnkişaf, İnnovasiya və Sahibkarlıq Strategiyası, eyni zamanda Estoniyada startap mühiti, sənayenin rəqəmsallaşması, elektron idarəetmə kimi mövzuları əhatə edib.      Təlimin növbəti günlərində iştirakçılar “Mektori” adlanan Taltech İnnovasiya və Biznes Mərkəzinə səfər ediblər. “Mektori” bütün dünyadan olan tələbələrin, professorların, məktəblilərin və investorların bir komanda olaraq birlikdə yeni ideyalar və innovasiyalar yaratmaq üçün birləşdiyi şəbəkədir. Estoniyanın Təhsil və Gənclər Şurasının nümayəndələri ilə görüşdə Sahibkarlıq və Karyera Proqramının meneceri Katrin Kivisild sahibkarlıq təhsilin inkişafından və ölkə üçün əhəmiyyətindən danışıb. Bildirib ki, 1991-ci ildə müstəqillik əldə etdikdən sonra Estoniya bütün diqqətini sahibkarlıq fəaliyyətlərinin yüksək inkişaf etdirilməsinə və dünyanın ən rəqəmsal dövləti kimi tanınmasına yönəldib. Estoniya adambaşına düşən startap və unikorn (gəliri 1 milyard dollar olan startap) sayına görə dünyada birinci yerdədir.   Mingəçevir Dövlət Universitetinin koordinatorluğu ilə keçirilən layihənin konsorsiumunun üzvü olan 11 Azərbaycan ali təhsil müəssisəsinin layihə üzrə məsul şəxsləri sahibkarlıq üzrə universitetlərdə həyata keçirilən fəaliyyətlər və planlar barədə təqimatlarla çıxış edərək təcrübə mübadiləsi aparıblar. Qeyd edək ki, səfərdə Azərbaycan universitetlərinin rektorları, prorektorları, inzibati və akademik heyət üzvləri iştirak ediblər.  

Tükiyənin Karamanoğlu Mehmetbey Universitetinin rektoru professor Mehmet Qavqalının rəhbərlik etdiyi nümayəndə heyəti AzTU-da olub. Qonaqlar AzTU-nun rektoru Vilayət Vəliyev və universitetin nümayəndələri ilə görüşüb. Görüş zamanı ikitərəfli əməkdaşlıq əlaqələri, xüsusilə Avropa İttifaqının proqramlarında birgə iştirak, qida mühəndisliyi və energetika sahələrində tələbə hazırlığı və digər məsələlər müzakirə olunub. Görüşdən sonra universitetlər arasında əməkdaşlıq haqqında memorandum imzalanıb.