Türkiyənin “Robotex” şirkətinin təsisçiləri Zülal İnan, Orxan Çevik və şirkətin nümayədələr AzTU-da olub. Qonaqlar AzTU-nun rektoru Vilayət Vəliyev və universitetin nümayəndələri ilə görüşüblər. Rektor AzTU-da həyata keçirilən layihələr haqqında qonaqlara məlumat verib. Bildirib ki, “Robotex”lə birgə təlimlərin keçirilməsi, mentorların hazırlanması və sahibkarlıq sahəsində seminarların təşkili universitet-sənaye işbirliyinin inkişafına töhfə verə bilər. “Robotex” təsisçiləri şirkətin dünyanın ən böyük robototexnika yarışmasının təşkilatçısı olduğu bildirib. Şirkət robotlar və müvafiq sahələrdə dünyada tanınan bir sıra müəssisə və təşkilatlarla birgə yarışların keçirilməsi üçün əməkdaşlıq edir. Qeyd olunub ki, robotlar sahəsində gənclər üçün müxtəlif sərgilər və seminarların təşkilatçısı olan “Robotex” AzTU ilə əməkdaşlıq etməkdə maraqlıdır. Görüş zamanı perspektiv əməkdaşlıq istiqamətlərinin müəyyənləşdirilməsi ilə bağlı fikir mübadilsi aparılıb.

AzTU-da “Bilişim Vadisi Bakı” Mərkəzinin rezident şirkətlərinin təqdimatına həsr olunan tədbir keçirilib. Tədbirdə 15-dən çox ali təhsil müəssisəsindən nümayəndələr iştirak edib. AzTU-nun rektoru Vilayət Vəliyev universitetlə Bilişim Vadisinin əməkdaşlığından danışıb. Bildirib ki, Bilişim Vadisinin mərkəzinin İzmirdən sonra Bakıda fəaliyyətə başlaması əhəmiyyətli hadisədir. Rektor deyib ki, “Bilişim Vadisi Bakı” Mərkəzi AzTU-da fəaliyyət göstərir. Mərkəzdə universitet-sənaye işbirliyinin inkişafı istiqamətində mühüm layihələr həyata keçiriləcək. Beynəlxalq texnologiyalar üzrə marketinq, texnoloji tədqiqat və transfer fəaliyyətləri, proqram təminatı, dizayn, tədqiqat və inkişaf sahəsində layihələr həyata keçirmək istəyən digər universitetlər də “Bilişim Vadisi Bakı” Mərkəzi ilə əməkdaşlıq edəcəklər. Türkiyənin Alanya Universitetinin rektoru Mesut Güner müasir universitet modelindən danışıb. Bildirib ki, müasir dövrün universitetləri təkcə təhsil verməklə kifayətlənmir, həmçinin sənaye ilə əlaqələrini inkişaf etdirir. AzTU-da fəaliyyətlərin bu standartlara uyğun qurulduğunu deyən rektor “Bilişim Vadisi Bakı” Mərkəzinin işinə uğurlar arzulayıb. Daha sonra “Bilişim Vadisi Bakı”nın rezident şirkətlərinin təqdimatı olub. Sual-cavab formatında keçirilən təqdimatdan sonra qonaqlar AzTU-nun kampusu ilə tanış olublar.

AzTU-nun Elmi şurasının 2022/2023-cü tədris ili üzrə sonuncu iclası keçirilib. Əvvəlcə 2022/2023-cü tədris ilinin yay imtahan sessiyasının nəticələri təhlil olunub. İclasda universitetin təcrübəli və uzunmüddətli elmi-pedaqoji fəaliyyətlə məşğul olan professor-müəllim heyətinin əməyindən səmərəli istifadə olunması ilə bağlı məsələyə baxılıb. Bildirilib ki, qocaman müəllimlər öz vəzifələrindən ayrılsalar da gənc müəllimlər hər zaman onların biliklərindən faydalanmalıdırlar. Bu mənada qocaman müəllimlərin universitetlə əlaqələri daim təmin edilməli, layihələrin həyata keçirilməsində onların məsləhətlərindən istifadə olunmalıdır. Müzakirələrdən sonra təklif şura üzvləri tərəfindən qəbul edilib.   Daha sonra yeni tədris ilində görüləcək işlər və həyata keçiriləcək layihələr barədə müzakirələr aparılıb.

“Azərbaycan Rektorlar Konfransının yaradılması” (ECAR) layihəsi çərçivəsində növbəti səfər İspaniyanın Madrid şəhərinə təşkil olunub. 10-14 iyul tarixlərini əhatə edən səfərin əsas məqsədi tələbə və məzun işləri üzrə İspaniya Rektolar Konfransı və İspaniya ali təhsil müəssisələrinin, eləcə də Fransa, Polşa və Litvadan olan tərəfdaşların iştirakı ilə həmin ölkələrin təcrübəsinin öyrənilməsidir.  Səfərdə Azərbaycan Texniki Universitetini (AzTU) ümumi işlər üzrə prorektor Fariz Mustafayev və Karyera və Məşğulluq Mərkəzinin əməkdaşı Ülviyyə Rəsulova təmsil edir. Bir həftə davam edəcək səfərin ilk günü İspaniya Rektorlar Konfransının Baş katibi Maria Teresa Azərbaycan nümayəndə heyətini salamlayıb və İspaniyada görməkdən məmnun olduqlarını qeyd edib. Daha sonra Azərbayacn Respublikası elm və təhsil nazirinin müşaviri Nicat Məmmədli nümayəndələr adından İspaniyalı həmkarları salamlayıb, ali təhsil müəssisələrinin inkişafına verdiyi töhfələr baxımından ECAR və digər beynəlxalq layihələrin xüsusi önəmindən bəhs edib. Çıxışlardan sonra İspaniya Rektorlar Konfransının Baş katibi Maria Teresa Rektorlar Konfransının yaranması, İspaniya ali təhsil sistemində yeri və rolu, strukturu, fəaliyyət istiqamətləri, müvafiq komitələri haqqında təqimat nümayiş etdirib və sualları cavablandırıb. İspaniya Rektorlar Konfransının Tələbələrlə iş üzrə komissiyasının icraçı katibi Angela Alcala isə məzmunlu təqdimatla çıxış edərək İspaniya universitetlərində tələbələrlə iş üzrə məsələlərdə yeni strateji baxış, o cümlədən sektorlararası münasibətlər və koordinasiyanın vacibliyindən danışıb.

İsrailin “AnD Ventures” şirkətinin təsisçisi və rəhbəri Ariel Cohen Azərbaycan Texniki Universitetində (AzTU) olub.  Qonaq AzTU-nun rektoru Vilayət Vəliyev və universitetin nümayəndələri ilə görüşüb. Rektor Vilayət Vəliyev qonağa AzTU-da innovasiya və startap ekosisteminin inkişaf etdirilməsi, universitet-sənaye əməkdaşlığının gücləndirilməsi istiqamətində son illər həyata keçirilən layihələr barədə danışıb. Şirkət haqqında məlumat verən Ariel Cohen texnologiyaların inkişaf etdiyi müasir dövrdə startapların ilk olaraq universitetlərdə formalaşdığını deyib. O, rəhbərlik etdiyi şirkətin universitet startaplarına dəstək göstərilməsi sahəsindəki təcrübəsini də bölüşüb. Daha sonra startaplarla bağlı əməkdaşlıq imkanları müzakirə olunub.

“Azərbaycanda Rektorlar Konfransının yaradılması” (ECAR) layihəsi çərçivəsində komitə rəhbərlərinin Belçikanın Brüssel şəhərinə növbəti səfəri təşkil olunub. Səfərdə Azərbaycan Texniki Universitetini (AzTU) elm və innovasiyalar üzrə prorektor Sübhan Namazov təmsil edib. 5 günlük səfər çərçivəsində komitə rəhbərləri üçün Avropa tərəfdaşı “EFMD Global” təşkilatı tərəfindən təlim-seminarlar keçirilib. Təlim-seminarlarda “EFMD Global” təşkilatının nümayəndələri beynəlxalq layihələrdəki təcrübələrini, marketinq və kommunikasiya strategiyalarını Azərbaycan ali təhsil müəssisələrinin nümayəndə heyətləri ilə bölüşüblər.   “Belçikanın ali təhsil sistemində Flamand Universitetlərarası Şurasının rolu: Şuranın dövri nəşrləri” və “Belçikanın ali təhsil sistemində Rektorlar Şurasının rolu: Şuranın dövri nəşrləri” kimi mühüm mövzularda təlimlər şuraların məsul şəxsləri Dr. Koen Verlaeckt, Dr. Sophie Dufays tərəfindən keçirilib. Sözügedən təlimlər Azərbaycan Rektorlar Konfransının dövri nəşrinin hazırlanması məqsədilə beynəlxalq təcrübənin, xüsusilə də Belçika təcrübəsinin öyrənilməsinə həsr olunub.

Azərbaycan Texniki Universiteti (AzTU) ilə Layihələrin İdarə Edilməsi Azərbaycan Assosiasiyası (AzPMA) arasında əməkdaşlıq inkişaf etdirilir. Əməkdaşlıq çərçivəsində təşkil edilən təlimlərdə AzTU tələbələri və əməkdaşları ICB®4 standartları üzrə beynəlxalq sertifikata layiq görülüblər. Belə ki, AzTU-nun Universitet-Sənaye Əməkdaşlığı və Ömürboyu Təhsil Mərkəzinin müdiri Aynurə İsmayılova ICB®4 standartları üzrə “Level B” sertifikatı alıb. Universitetin daha 5 əməkdaşı və 7 tələbəsi isə “Level D” sertifikatına layiq görülüb. Qeyd edək ki, ICB®4 standartları layihələrin idarəedilməsi üzrə hazır dərslik və ya vəsait deyil. Bu standartlar layihələrin idarəedilməsi sahəsində bilik, təcrübə və fərdi mükəmməlliyə qapı açaraq bacarığın cilalanması, formalaşması üçün bələdçi rolunu oynayır.   ICB®4 standartları Beynəlxalq Layihə İdarəetmə Assosiasiyası (IPMA) tərəfindən ratifikasiya edilmiş milli assosiasiyaların və onların sertifikatlaşdırma mərkəzlərinin bütün sertifikatlaşdırma proqramlarının əsasını təşkil edir. Azərbaycanda 1999-cu ildən bu günə kimi 500-dən çox mütəxəssis ICB®4 standartları üzrə sertifikata yiyələnib. Maraqlananlar beynəlxalq bazada identifikasiya barədə ətraflı məlumatı linkə daxil olaraq oxuya bilərlər.

Azərbaycan Respublikasının Prezidenti yanında Vətəndaşlara Xidmət və Sosial  İnnovasiyalar üzrə Dövlət Agentliyinin “İnnovasiyalar Mərkəzi” tərəfindən reallaşdırılan “Gələcək üçün bacarıqlar” layihəsi çərçivəsində “100 illiyin gələcəyi” adlı tədbir keçirilib. “BP Azərbaycan” şirkətinin sponsorluğu və "Azərikard" MMC-nin təşkilati dəstəyi ilə keçirilən tədbir ümumilli lider Heydər Əliyevin 100 illik yubileyinə həsr olunub. Tədbirdə müxtəlif dövlət qurumlarının nümayəndələri, layihə çərçivəsində Anlaşma Memorandumunu imzalamış universitetlərin rektorları, sahə üzrə peşəkar mentorlar, təlimçilər və digər qonaqlar iştirak ediblər.   Əvvəlcə I və II Tusi İnkubasiya proqramlarının startaplarının təqdimatı olub. Açılış mərasimində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev, elm və təhsil naziri Emin Əmrullayev, BP-nin Xəzər bölgəsində xarici əlaqələr və kommunikasiya üzrə vitse-prezidenti Bəxtiyar Aslanbəyli çıxış ediblər. Ümumilli lider Heydər Əliyevin ictimai-siyasi və dövlətçilik fəaliyyətinə dair, eləcə də sözügedən layihə çərçivəsində görülmüş işləri əks etdirən videoçarxlar nümayiş etdirilib. Sonra mentorların ümumi inkubasiya proqramlarının yekunu olaraq formalaşdırdıqları 19 startap komandası layihələrini təqdim edib. Azərbaycan Texniki Universitetinin (AzTU) əməkdaşı Günel Məmmədlinin mentoru olduğu AzTU tələbələrinin iştirak etdiyi "ABC" komandası 1-ci yerə layiq görülüb. Qaliblərə mükafatlar təqdim olunub.Tədbir çərçivəsində elm və təhsil naziri Emin Əmrullayevə, həmçinin BP-nin  Xəzər bölgəsində xarici əlaqələr və kommunikasiya üzrə vitse-prezidenti Bəxtiyar Aslanbəyliyə “Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin 10 illiyi (2012-2022)” Azərbaycan Respublikasının yubiley medalı, innovasiya ekosisteminə dəstək olan AzTU-nun rektoru Vilayət Vəliyevə isə “ASAN xidmət” ilə səmərəli əməkdaşlığa görə” Azərbaycan Respublikasının medalı təqdim olunub. Sonda layihənin II Mentorluq Proqramının iştirakçılarına sertifikatlar verilib.

Azərbaycanın aparıcı kibertəhlükəsizlik xidməti təminatçısı olan “Cyberpoint” MMC ilə ölkəmizin ən nüfuzlu universitetlərindən biri olan Azərbaycan Texniki Universiteti (AzTU) arasında əməkdaşlıq haqqında memorandum imzalanıb. Sənədi “Cyberpoint”in direktoru Fuad Niftəliyev və AzTU-nun rektoru Vilayət Vəliyev imzalayıblar. Memorandumun məqsədi tərəflər arasında öz nizamnamələri çərçivəsində kibertəhlükəsizlik sahəsində milli, elmi-texniki və insan resursları potensialının gücləndirilməsi məqsədilə əlaqələrin və işgüzar münasibətlərin qurulmasının, birgə layihələrin həyata keçirilməsinin, səmərəli məlumat mübadiləsinin təşkil olunmasının təşviq edilməsidir. Bununla yanaşı “Cyberpoint”lə AzTU arasında imzalanan memorandum tərəflər arasında əməkdaşlığın həyata keçiriləcəyi ümumi sahələrin müəyyənləşdirilməsi məqsədini də özündə daşıyır. Əməkdaşlıq memomrandumunun başlıca hədəflərindən biri də kibertəhlükəsizlik sahəsi üzrə təhsil alan tələbələrin praktiki təlimlərə cəlb olunması və onların bu sahədə daha geniş biliklərə yiyələnməsi üçün lazımı şəraitin yaradılmasıdır.

“Code Academy”nin #CodeForFuture layihəsinin məzunu olan Azərbaycan Texniki Universitetinin (AzTU) tələbələrinə diplomların təqdim olunması mərasimi keçirilib. Tədbirdə çıxış edən rektor Vilayət Vəliyev bildirib ki, Elm və Təhsil Nazirliyinin dəstəyilə “Code Academy”nin #CodeForFuture layihəsinin icrasına ilk dəfə 2021-ci ildə AzTU-da başlanılıb və uğurla davam etdirilir. Rektor deyib ki, 2022-2023-cü tədris ilinin payız semestrində #CodeForFuture layihəsində iştirak edən 336 AzTU tələbəsi bu gün məzun olur. Onlardan 26 nəfər yüksək şərəf diplomu, 67 tələbə isə şərəf diplomu ilə təltif ediliblər. Həmçinin 71 tələbə beynəlxalq sertifikat imtahanlarında uğurla iştirak edərək CompTIA, CSWA kimi beynəlxalq sertifikatlar əldə ediblər. Tələbələri təbrik edən rektor onlara layihə müddətində əldə etdikləri bilik və bacarıqların gələcək fəaliyyətlərində faydalı olacağına ümid etdiyini bildirib. Daha sonra çıxış edən Təhsildə Keyfiyyət Təminatı Agentliyinin İdarə Heyətinin sədr müavini Kamran Rəsulov, İnnovasiya və Rəqəmsal İnkişaf Agentliyinin əməkdaşı İbrahim Qədirov və “Code Academy” tədris müəssisəsinin təsisçisi və direktoru Ülvi Aslanov layihənin əhəmiyyəti və tələbələrin gələcək fəaliyyətlərində faydalarından danışıb, həmçinin təbriklərini çatdırıblar.   Qeyd edək ki, layihə çərçivəsində AzTU-da proqramlaşdırma, şəbəkə administratorluğu, sistem administratorluğu, “AutoCAD & Solidworks” sahələri üzrə ümumilikdə 536 tələbə təhsil alıb, əmək bazarının tələblərinə uyğun kadr kimi formalaşaraq bir sıra üstünlüklərə sahib olublar. Tədbirin sonunda #CodeForFuture layihəsinin məzunu olan AzTU tələbələrinə diplomlar təqdim olunub.